សង្គ្រាមអ៉ីរ៉ង់ ៖ ប្រធានាធិបតីអាមេរិក លោកដូណាល់ត្រាំ ដែលមុននេះ ប្រកាសពីការបន្តវាយកម្ទេចអ៉ីរ៉ង់ជាថ្មី នាថ្ងៃទី១៩ ឧសភា នោះ បានប្រកាសនាថ្ងៃទី១៨…
សង្គ្រាមអ៉ីរ៉ង់ ៖ ប្រធានាធិបតីអាមេរិក លោកដូណាល់ត្រាំ ដែលមុននេះ ប្រកាសពីការបន្តវាយកម្ទេចអ៉ីរ៉ង់ជាថ្មី នាថ្ងៃទី១៩ ឧសភា នោះ បានប្រកាសនាថ្ងៃទី១៨ ឧសភា ពីការផ្អាកការវាយប្រហារនោះវិញ តាមសំណើរបស់មេដឹកនាំនៃបណ្ដាប្រទេសនៅតំបន់ឈូងសមុទ្រពែរ្ស៍ ។ លោកក៏អះអាងដែរថា ការចរចាកំពុងបន្តយ៉ាងសកម្មទៀត ។
ទោះបីយ៉ាងណា ក្នុងសារមួយតាមបណ្ដាញសង្គម TRUTH SOCIAL លោកត្រាំអះអាងថា អាមេ
រិកនៅតែត្រៀមជានិច្ច ធ្វើការវាយប្រហារទាំងស្រុង និងទ្រង់ទ្រាយធំប្រឆាំងអ៉ីរ៉ង់គ្រប់ពេល ប្រសិនបើកិច្ចព្រមព្រៀងមួយដែលអាចទទួលយកបាន មិនត្រូវបានរកឃើញជាមួយអ៉ីរ៉ង់ទេនោះ។ លោកបញ្ជាក់ថា សំណើផ្អាកប្រតិបត្តិការយោធា ដែលលោកមិនបាននិយាយរហូតមកទល់ពេលនេះ មកពីមេដឹកនាំកាតា អារ៉ាប៊ីសាអូឌីតនិងអេមីរ៉ាត់អារ៉ាប់រួម ដោយមេដឹកនាំប្រទេសទាំងនេះយល់ថា កិច្ចព្រមព្រៀងមួយនឹងអាចសម្រេចបាន។ លោកត្រាំបន្តថាកិច្ចព្រមព្រៀងនោះត្រូវធានាថា អ៉ីរ៉ង់មិនអាចបំពាក់អាវុធនុយក្លេអ៊ែរ ។
នាថ្ងៃទី១៧ ឧសភា លោកត្រាំគំរាមថា អ៉ីរ៉ង់នឹងគ្មានសល់អ្វីឡើយ ប្រសិនបើប្រទេសនេះមិនព្រមធ្វើឲ្យសម្រេចបានកិច្ចព្រមព្រៀងមួយដោយឆាប់រហ័សជាមួយសហរដ្ឋអាមេរិកទេនោះ។ លោកបានព្រមានទៀតថា សម្រាប់អ៉ីរ៉ង់ពេលវេលាត្រូវបានតម្រូវ។ អ៉ីរ៉ង់ត្រូវធ្វើសកម្មភាពល្អប្រសើរដោយឆាប់រហ័ស បើមិនដូច្នេះទេនឹងមិននៅសល់អ្វីឡើយសម្រាប់ខ្លួន។
មុនសារថ្មីនេះរបស់លោកត្រាំអ៉ីរ៉ង់និយាយថា ត្រៀមខ្លួនពេញលេញរួចហើយសម្រាប់គ្រប់យថាភាព ក្រោយការគំរាមថ្មីរបស់លោកត្រាំ។ ក្រសួងការបរទេសអ៉ីរ៉ង់និយាយថា ការប្រាស្រ័យទាក់ទងគ្នាបន្តធ្វើជាមួយក្រុងវ៉ាស៊ីនតោន តាមរយៈអាជ្ញាកណ្ដាលប៉ាគីស្ថាន។ អ៉ីរ៉ង់នៅតែលើកឡើងកាលពីថ្ងៃទី១៨ ឧសភា ការទាមទាររបស់ខ្លួនពិសេសការបញ្ឈប់បង្កកទ្រព្យសម្បត្តិរបស់ខ្លួននៅបរទេស និងលុបចោលបណ្ដាទណ្ឌកម្មអន្តជាតិដែលធ្វើឲ្យស្ទះដង្ហើមសេដ្ឋកិច្ចរបស់ខ្លួន ។
អ៉ីរ៉ង់កាលពីថ្ងៃទី១៧ ឧសភា បានធ្វើការព្រមានមួយដល់អាមេរិក ដោយអ្នកនាំពាក្យម្នាក់របស់កងទ័ពអ៉ីរ៉ង់លោកអាបុលហ្វាស៊ីសេកាជីបានព្រមានថា ប្រធានាធិបតីអាមេរិកត្រូវតែដឹងថា បើអ៉ីរ៉ង់រងការឈ្លានពានជាថ្មី នោះបណ្ដាធនធាននិងកងទ័ពអាមេរិក នឹងជួបប្រទះសេណារីយ៉ូនឹកស្មានមិនដល់ ដែលនោះជាការវាយលុក ដ៏គួរឲ្យភ្ញាក់ផ្អើលមួយ។ ចំណែកអនុប្រធានសភាអ៉ីរ៉ង់លោកហាមីតឌ្រឺហ្សាហាជិបាបៃអ៉ីថ្លែងថា ប្រសិនបើបណ្ដាទីតាំងប្រេងអ៉ីរ៉ង់រងការវាយប្រហារ នោះអ៉ីរ៉ង់នឹងវាយប្រហារ បណ្ដាទីតាំងប្រេងក្នុងតំបន់ទាំងមូល៕
ចែករំលែកព័តមាននេះ