រាជធានីភ្នំពេញ ៖ ឆ្លើយតបទៅនឹងបណ្តាញផ្សព្វផ្សាយមួយចំនួនដែលបានចុះផ្សាយធ្វើឱ្យមតិសាធារណជនយល់ច្រឡំថាមានការដំឡើងថ្លៃភ្លើងអគ្គិសនីនោះ នៅអគ្គិសនីកម្ពុជាកាលពីថ្ងៃទី៤ កក្កដា មានរៀបចំធ្វើសន្និសីទកាសែតមួយដើម្បីប្រកាសថា ការផ្សព្វផ្សាយនោះមិនពិតទេ ការពិតអគ្គិសនីកម្ពុជាមិនបានធ្វើការដំឡើងថ្លៃភ្លើងអគ្គិសនីឡើយ តែបានរាប់បញ្ចូលចំពោះលំនៅឋានទាំងឡាយណាដែលបានប្រើភ្លើងអស់លើសពី២០០គីឡូវ៉ាត់ម៉ោង ក្នុងមួយខែ ត្រូវចាត់ទុកចូលក្នុងប្រភេទលក់តម្លៃ៨២០រៀល ក្នុង១គីឡូវ៉ាត់ម៉ោង ដែលពីមុនមកលំនៅឋានដែលប្រើអស់ជាង២០០គីឡូវ៉ាត់ ម៉ោង គឺស្ថិតនៅក្នុងតម្លៃលក់៧២០រៀល ក្នុង១គីឡូវ៉ាត់ម៉ោង ។
លោកចាន់ សុដាវ៉ាត អគ្គនាយករងទទួល បន្ទុកការងារផែនការនិងបច្ចេកទេសនៃអគ្គិសនី កម្ពុជាមានប្រសាសន៍ថា បច្ចុប្បន្នអគ្គិសនីលក់ថ្លៃភ្លើងមាន៣ប្រភេទ គឺទី១-សម្រាប់លំនៅឋានដែលប្រើភ្លើងក្នុងមួួយខែមិនលើសពី៥០គីឡូវ៉ាត់ម៉ោង (KWH) តម្លៃ៦១០រៀលក្នុងមួយគីឡូវ៉ាត់ម៉ោង ។ ទី២-លំនៅឋានដែលប្រើចាប់ពី៥១គីឡូវ៉ាត់ម៉ោងឡើងទៅលក់៧២០រៀល ក្នុង១គីឡូវ៉ាត់ម៉ោង ហើយទី៣-គឺស្ថាប័នរដ្ឋ ស្ថានទូត និងគេហដ្ឋានបរទេសលក់តម្លៃ៨២០រៀលក្នុង១គីឡូវ៉ាត់ម៉ោង ។ ប៉ុន្តែចាប់ពីថ្ងៃទី១ ខែកញ្ញាខាងមុខនេះ អគ្គិសនីកម្ពុជាបានកាត់ប្រភេទលំនៅឋានទាំងឡាយណាដែលប្រើភ្លើងអស់លើសពី២០០គីឡូវ៉ាត់ម៉ោង ចូលទៅក្នុងប្រភេទលក់ទី៣ គឺតម្លៃ៨២០រៀល ក្នុង១គីឡូវ៉ាត់ម៉ោង ដូចលក់ឱ្យស្ថាប័នរដ្ឋ ស្ថានទូត និងគេហឋាន ជនបរទេសដែរ។ ដូច្នេះតម្លៃភ្លើងអគ្គិសនីមិនមានការឡើងថ្លៃអ្វីទេ គឺគ្រាន់តែប្រភេទលំនៅឋានដែលមានលទ្ធភាពប្រើលើសពី២០០គីឡូវ៉ាត់ម៉ោង ឡើងទៅឱ្យទទួលយកតម្លៃដូចលក់ឱ្យស្ថាប័នរដ្ឋ ស្ថានទូត និងគេហដ្ឋានជនបរទេសតែប៉ុណ្ណោះ ។
លោកចាន់ សុដាវ៉ាត បញ្ជាក់ថា មូលហេតុដែលអគ្គិសនីកម្ពុជាធ្វើបែបនេះគឺមានពីរមូលហេតុ ទី១-កម្ពុជាជាប្រទេសមួយដែលទទួលទិញអគ្គិសនីពីប្រទេសជិតខាងរបស់ខ្លួនដូចជាវៀតណាម ឡាវ និងថៃ ។ បច្ចុប្បន្ន ទាំងថៃនិងវៀតណាម បានឡើងថ្លៃភ្លើងអគ្គិសនីមកលើកម្ពុជា ចំនួន៣០% ទៅហើយគឺឡើងចាប់ពីថ្ងៃទី១ មករា ឆ្នាំ២០១២ នេះ តែការចរចាសុំពន្យារពេលបានអូសបន្លាយរហូតមកទល់នឹងពេលនេះ ទើបការឡើងថ្លៃនោះបានឈានមកដល់ការសម្រេចជាស្ថាពរ ។
ទី២-នៅ៥ខែ ដើមឆ្នាំ២០១២នេះអគ្គិសនីកម្ពុជាបានខាតបង់ទឹកប្រាក់ចំនួន១២.៧៧៥លានរៀល គិតតែត្រឹមការប្រើភ្លើងនៅភ្នំពេញ ខេត្តកណ្តាល និងកំពង់ស្ពឺប៉ុណ្ណោះដោយមិនទាន់គិតជាលក្ខណៈទូទាំងប្រទេសនៅឡើយទេ ។
លោក ចាន់ សុដាវ៉ាត បានបន្តថា នៅឆ្នាំ២០១៣ ខាងមុខនេះ កម្ពុជាអាចនឹងជួបប្រទះនូវវិបត្តិខ្វះភ្លើងប្រើ បើសិនជាប្រទេសវៀតណាមមិនអាចលក់ភ្លើងឱ្យកម្ពុជាគ្រប់២០០មេហ្គាវ៉ាត់ តាមកិច្ចព្រមព្រៀងទេនោះ ។
គួរបញ្ជាក់ឱ្យដឹងដែរថា តាមកិច្ចព្រមព្រៀងរវាងកម្ពុជា-វៀតណាម រយៈកាលកន្លងមកភាគីទាំងពីរបានយល់ព្រមទទួលទិញលក់ភ្លើងអគ្គិសនីពីប្រទេសវៀតណាមចំនួន២០០មេហ្គាវ៉ាត់ តែបច្ចុប្បន្នវៀតណាមលក់ឱ្យកម្ពុជាបានតែ១៣៥មេហ្គាវ៉ាត់ប៉ុណ្ណោះ ធ្វើឱ្យកម្ពុជានៅជួបវិបត្តិខ្វះភ្លើងប្រើប្រាស់នៅឡើយ សម្រាប់ផ្គត់ផ្គង់តាមបណ្តាខេត្តភាគខាងកើតប្រទេស ។
លោកថ្លែងថា ការកាត់លំនៅដ្ឋានដែលប្រើភ្លើងអគ្គិសនីក្នុងមួយខែលើសពី២០០គីឡូវ៉ាត់ម៉ោង ឡើងទៅឱ្យទទួលយកតម្លៃលក់ប្រភេទទី៣នោះ គឺស្ថិតនៅក្នុងដំណាក់កាលសេចក្តីព្រាងនៅឡើយទេ ។ ចាប់ពីពេលនេះរហូតដល់ថ្ងៃទី១ កញ្ញាទើបអនុវត្ត ហើយដំណាក់កាលព្រាងនេះ គឺត្រូវឆ្លងកាត់ការពិគ្រោះពិភាក្សាជាច្រើនដំណាក់កាលទៀត ទើបឈានទៅដល់ការសម្រេចនៅថ្ងៃទី១ កញ្ញា ខាងមុខ ដូចមានតារាងតម្លៃខាងក្រោមនេះ ។ 
ចែករំលែកព័តមាននេះ