រាជធានីភ្នំពេញ ៖ ម៉ូតូម៉ាកហុងដាវ៉េវ មួយគ្រឿង ត្រូវជនមិនស្គាល់មុខមួយក្រុមជិះយកទៅប្លុងចោលនៅក្បែររបងដីឡូត៍មួយកន្លែង ហើយត្រូវបានប្រជាពលរដ្ឋប្រទះឃើញរាយការណ៍ប្រាប់សមត្ថកិច្ចឱ្យទៅពិនិត្យមើល ។ ពេលនោះកំលាំងប៉ូលិស ខណ្ឌដង្កោបានធ្វើការតាមដានស៊ើបអង្កេត និងឃ្លាំមើលអស់រយៈពេល១យប់១ថ្ងៃ មិនឃើញជនណាម្នាក់ទៅយកទើបនាំយកម៉ូតូ នោះទៅរក្សាទុកនៅអធិការដ្ឋានខណ្ឌ ។ម៉ូតូនោះត្រូវបានប្រជាពលរដ្ឋប្រទះ ឃើញកាលពីវេលាម៉ោង៣រសៀលថ្ងៃទី១៧ ឧសភា ឆ្នាំ២០១០ នៅក្បែររបងថ្មដីឡូត៍មួយកន្លែង ស្ថិតក្នុងភូមិគោកចំបក់ សង្កាត់ចោមចៅ ខណ្ឌដង្កោ ។
ម៉ូតូម៉ាកហុងដាវ៉េវ មួយគ្រឿងនេះធុន C១២៥ ពណ៌ខ្មៅ លាយប្រផេះ ពាក់ស្លាកលេខក្លែងក្លាយ ភ្នំពេញ ១AH ៩៧៥៨ ហើយនៅក្បែរម៉ូតូនោះមាន ថ្មទូរស័ព្ទម៉ាកម៉ូតូរ៉ូឡាថ្មីៗជាច្រើនដុំទៀតផង ។ គេមិនបានដឹងថា ជនមិនស្គាល់មុខ បានជិះម៉ូតូនេះយកទៅប្លុងចោលតាំងពីពេលណានោះឡើយ លុះរហូតដល់វេលាម៉ោង៣រសៀល ទើបប្រជាពលរដ្ឋធ្វើដំណើរឆ្លងកាត់ ទីនោះប្រទះឃើញ ហើយមានការសង្ស័យ ក៏រាយការណ៍ប្រាប់សមត្ថកិច្ចមូលដ្ឋានឱ្យពិនិត្យមើល ។ ក្នុងខណៈពេលនោះប៉ូលិស ពុំបានចូលទៅយកចេញភ្លាមៗទេគឺរក្សាទុកនៅកន្លែងដដែលរួចហើយដាក់កំលាំងចាំឃ្លាំមើលក្រែងមានជនសង្ស័យចូលទៅយកចេញ និងឃាត់ខ្លួនដើម្បីសាកសួរ ។
ប្រភពដដែលបានបន្ដទៀតថា ប៉ូលិសបានឃ្លាំមើលអស់រយៈពេល១យប់១ថ្ងៃ ប៉ុន្ដែពុំឃើញមានស្រមោលជនសង្ស័យណាម្នាក់ទៅជិតឡើយ ហើយរហូតដល់ព្រឹកថ្ងៃ ទី១៨ ឧសភា ប៉ូលិសក៏បានហៅជាងធ្វើសោ ទៅឆ្កឹះសោ.ក និងនាំយកម៉ូតូនោះទៅកាន់ អធិការដ្ឋានខណ្ឌ ។ ប៉ូលិសបានសន្និដ្ឋាន ជំហានដំបូងថា ម៉ូតូ១គ្រឿងនេះអាចត្រូវក្រុមជនសង្ស័យធ្វើសកម្មភាពលួចពីកន្លែងណាមួយ ហើយនាំយកចេញទៅមិនរួច ឬក៏អាចជាម៉ូតូដែលគេជិះធ្វើសកម្មភាពបទល្មើសផ្សេងៗ ហើយខ្លាចគេស្គាល់មុខសញ្ញា ទើបយកទៅប្លុងចោលនៅទីនោះតែម្ដង ប៉ុន្ដែទោះបីជាបែបណា ប៉ូលិសកំពុងធ្វើការស្រាវជ្រាវតាមជំនាញហើយ ។
ចែករំលែកព័តមាននេះ