ខេត្តកំពង់ឆ្នាំង ៖ លោកបណ្ឌិតអ៊ុក រ៉ាប៊ុន រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការក្រសួងសេដ្ឋកិច្ច និងហិរញវត្ថុ និងលោកជំទាវគឹម រ៉ាវី លោកឧកញ៉ាស្រី ងួន និងលោកជំទាវឧកញ៉ាស្រី វុទ្ធី ដោយក្តីមេត្តា និងអាណិតអាសូរដល់កុមារកំព្រា៥នាក់បងប្អូនដែលត្រូវឪពុកម្តាយបោះបង់ចោលរស់នៅជាមួយជីដូនអាយុ៦២ឆ្នាំ ហើយថ្មីៗនេះកុមារា២នាក់បងប្អូនបានលង់ទឹកស្លាប់យ៉ាងអាណោចអាធ័មទៀតនោះ ក៏បានជួយឧបត្ថម្ភថវិកាចំនួន២០០ដុល្លារ និង៥០ម៉ឺនរៀល។
ដល់កុមារកំព្រាទាំងនោះ អំណោយទាំងនេះត្រូវបាននាំយកទៅប្រគល់ជូនតាមរយៈលោកសោម វ៉ឺន អភិបាលរងស្រុករលាប្អៀរកាលពីរសៀលថ្ងៃទី១៦ មិថុនា ដល់លំនៅឋានក្មេងកំព្រាខាងលើស្ថិតក្នុងភូមិជ្រៃបាក់ ឃុំជ្រៃបាក់ ស្រុករលាប្អៀរ ដោយមានការអញ្ជើញចូលរួមដឹងឮពីលោកតាំង ប៊ុនទត មេឃុំជ្រៃបាក់លោកមេភូមិ និងប្រជាពលរដ្ឋដែលបានចូលរួមក្នុងពិធីបញ្ចប់បុណ្យសពកុមារ២នាក់បងប្អូនដែលស្លាប់ដោយលង់ទឹកផងដែរ ។
លោកសោម វ៉ឺន មានប្រសាសន៍ថា តាមរយៈសារព័ត៌មានកោះសន្តិភាព ដែលបានចេញផ្សាយនៅថ្ងៃទី១៥ មិថុនា ស្តីពីទុក្ខលំបាករបស់ក្មេងកំព្រាទាំង៥នាក់ដែលត្រូវឪពុកម្តាយបោះបង់ចោលរស់នៅជាមួយជីដូន ហើយកុមារពីរនាក់ក្នុងចំណោមបងប្អូនទាំង៥នាក់បានលង់ទឹកស្លាប់ទៀតនោះ គឺទុក្ខផ្ទួនលើទុក្ខទើបលោកបណ្ឌិត និងលោកជំទាវ លោកឧកញ៉ា និងលោកជំទាវឧកញ៉ាបានជួយឧបត្ថម្ភជាថវិកាជូនដល់ក្រុមគ្រួសារកុមារកំព្រាខាងលើ ដែលក្នុងនោះលោកបណ្ឌិតអ៊ុក រ៉ាប៊ុន និងលោកជំទាវគឹម រ៉ាវី បានឧបត្ថម្ភទឹកប្រាក់ចំនួន៥០ម៉ឺនរៀលនិង១០០ដុល្លារ លោកឧកញ៉ាស្រី ងួន និងលោកជំទាវឧកញ៉ាស្រី វុទ្ធី ឧបត្ថម្ភទឹកប្រាក់១០០ដុល្លារ ។
លោកយាយឡេង ផេន អាយុ៦២ឆ្នាំ ដែលត្រូវជាជីដូនកុមារកំព្រាទាំង៥នាក់បានសម្តែងនូវទឹកចិត្តរីករាយត្រេកអរក្រៃលែង និងបានលើកដៃសំពះដោយបង្ហូរទឹកភ្នែកថា លោកយាយសូមថ្លែងអំណរគុណយ៉ាងជ្រាលជ្រៅ ចំពោះលោកបណ្ឌិត និងលោកជំទាវ លោកឧកញ៉ា និងលោកជំទាវឧកញ៉ា ដែលបានជួយឧបត្ថម្ភដល់ក្រុមគ្រួសារគាត់កំពុងជួបការលំបាកនេះ និងសូមជូនពរដល់លោកបណ្ឌិត និងលោកជំទាវព្រមទាំងក្រុមគ្រួសារ លោកឧកញ៉ាទាំងពីរនិងក្រុមគ្រួសារ សូមជួបតែពុទ្ធពរទាំង៤ប្រការគឺអាយុៈ វណ្ណៈ សុខៈ និងពលៈ កុំបីឃ្លាងឃ្លាតឡើយ ។
លោកតាំង ប៊ុនទត បានរំលឹកថា កុមារកំព្រាទាំង៥នាក់នេះ គឺឪពុកម្តាយបានបោះបង់ទៅមានប្តី ប្រពន្ធថ្មី ចោលពួកគេឱ្យរស់នៅជាមួយជីដូនអាយុ៦២ឆ្នាំ ហើយកាលពីរសៀលថ្ងៃទី១៤ មិថុនា កុមារាឈ្មោះរ៉េត កុសល អាយុ១៣ឆ្នាំ និងកុមារាឈ្មោះរ៉េត ណារាជ អាយុ៩ឆ្នាំ បានលង់ទឹកស្លាប់ពីរនាក់បងប្អូននៅទឹកស្ទឹងជ្រៃបាក់។ សព្វថ្ងៃនៅសល់៣នាក់បងប្អូន គឺកូនស្រីបង ឈ្មោះ រ៉េត ចាន់ឌី អាយុ១៧ឆ្នាំ កុមារារ៉េត ណារ៉ូត អាយុ១១ឆ្នាំ និងកុមារារ៉េត វីរៈ អាយុ៧ឆ្នាំ ៕
ចែករំលែកព័តមាននេះ