រាជធានីភ្នំពេញ ៖ ក្នុងនាមជាមិត្តភក្តិរាប់អានគ្នាក្នុងរង្វង់សិល្បៈ តារាចម្រៀង លោកខេមរៈ សិរីមន្ត បានព្យាយាមជួយលោក អាន វិសាល ជាបន្តបន្ទាប់…
រាជធានីភ្នំពេញ ៖ ក្នុងនាមជាមិត្តភក្តិរាប់អានគ្នាក្នុងរង្វង់សិល្បៈ តារាចម្រៀង លោកខេមរៈ សិរីមន្ត បានព្យាយាមជួយលោក អាន វិសាល ជាបន្តបន្ទាប់ ក្រោយពេលដែលអតីតតារាចម្រៀងរូបនេះខ្វះខាតផ្នែកជីវភាព និងកំពុងរួមរិតដោយជំងឺប្រចាំកាយផងដែរ ។
អតីតារាចម្រៀងលោក អាន វិសាល ត្រូវបានគេដឹងថា រូបលោកកំពុងពើបប្រទះនូវជំងឺក្រិនថ្លើម ហើយជំងឺនេះអាចនឹងវិវត្តន៍កាន់តែធ្ងន់ធ្ងរ ប្រសិនបើមិនព្យាបាលអោយទាន់ពេលវេលាទេនោះ ។
យ៉ាងណាកន្លងមក ដោយសារខ្វះខាតជីវភាពខ្លាំង និងមិនមានថវិកាគ្រប់គ្រាន់សម្រាប់ព្យាបាលនោះ លោក អាន វិសាល ក៏ធ្លាប់ចេញមុខស្នើសុំជំនួយពីសប្បុរសជននានាផងដែរ ។
ដោយឃើញបញ្ហាដ៏លំបាកនេះ ក្នុងនាមជាមិត្តភក្តិតារាចម្រៀងលោក ខេមរៈ សិរីមន្ត ក៏បានចេញមុខជួយលោក អាន វិសាល ជាបន្តបន្ទាប់ផងដែរ ជាពិសេសទៀតនោះ លោកក៏ផ្តល់ឱកាសអោយលោក អាន វិសាល ចេញបទចម្រៀងច្រៀងរួមគ្នា ជាមួយលោក ដើម្បីអោយលោកអាចមានចំណូលខ្លះសម្រាប់ព្យាបាលជំងឺ ។
តាមរយៈសំណេរបង្ហោះលើបណ្តាញសង្គមតារាចម្រៀងលោក ខេមរៈ សិរីមន្ត បានអះអាងថា ជួយគ្នាក្នុងគ្រាលំបាក ដើម្បីជួយបង «អាន វិសាល» ឱ្យមានប្រជាប្រិយភាពឡើងវិញក្រែងមានចំណូលខ្លះមើលជំងឺ ។ លោកថា ខ្ញុំបានច្រៀងរួមគ្នាជាមួយគាត់រួចហើយ កាលពីមួយខែមុន និងត្រៀមចេញឆាប់ៗនេះ សូមបងប្អូនជួយគាំទ្រគាត់ផង ដោយក្តីគោរព ។
តារាចម្រៀងរូបនេះបានបញ្ជាក់ថា កន្លងមក ខ្ញុំបានជួយថវិកាគាត់ញឹកញាប់ដែរហើយ តែមិនគ្រប់ទេ ព្រោះជំងឺគាត់ធ្ងន់ធ្ងរពេកសង្ឃឹមបងប្អូនជួយគាំទ្រ និងលើកទឹកចិត្តគាត់នឹងជួយជាថវិកា ដើម្បីព្យាបាលជំងឺជួយគ្នាក្នុងគ្រាលំបាកខ្មែរស្រឡាញ់ខ្មែរ ។
គួរបញ្ជាក់ថា លោក អាន វិសាល បានចូលប្រឡូកក្នុងវិស័យសិល្បៈចម្រៀងក្នុងអំឡុងឆ្នាំ២០១៣ ហើយបទចម្រៀងរបស់លោកមួយចំនួនក៏មានភាពល្បីល្បាញ និងពេញនិយមសម្រាប់ប្រិយមិត្តអ្នកស្តាប់ផងដែរ ។
យ៉ាងណា ក្រោយបាត់មុខពីសិល្បៈអស់ពេលជាច្រើនឆ្នាំ លោកក៏បានគេដឹងថា លោកបានកសាងគ្រួសារ និងបានបើករបរលក់បាយម្ហូបមួយកន្លែង ។ អ្វីដែលគួរអោយភ្ញាក់ផ្អើលនោះ គឺនៅរយៈពេលចុងក្រោយនេះ មហាជនបានឃើញសភាពរបស់លោក អាន វិសាល ធ្លាក់ខ្លួនស្លេកស្លាំង និងស្គមស្គាំងខុសពីរូបរាងដើមស្ទើរយ៉ាងខ្លាំង ។
យ៉ាងណា លោក អាន វិសាល បានទទួលស្គាល់ថា សភាពរបស់លោកនាពេលនេះ គឺមិនដូចមុនឡើយ ដោយសារតែលោកកំពុងផ្ទុកនូវជំងឺថ្លើម ៕
ចែករំលែកព័តមាននេះ