កុំប្រហែស! នគរបាលខេត្តកំពង់ស្ពឺ បង្កើនការត្រួតពិនិត្យយានយន្តគ្រប់ប្រភេទលើផ្លូវជាតិ
- កំពង់ស្ពឺ
ខេត្តកំពង់ស្ពឺ ៖ ការចូលរួមគោរពច្បាប់ចរាចរណ៍ផ្លូវគោក ត្រូវរួមគ្នាពីយើងទាំងអស់គ្នា ចូលរួមកាត់បន្ថយគ្រោះថ្នាក់ចរាចរណ៍ផ្ដើមពីយើងទាំងអស់គ្នាទើបគ្រោះថ្នាក់មិនកើតមាន ។ នេះបើយោងតាមផេកស្នងការដ្ឋាននគរបាលខេត្តកំពង់ស្ពឺបានប្រកាសនាព្រឹកថ្ងៃទី២០ ខែតុលានេះ ។
ដោយអនុវត្ដតាមបញ្ជាដឹកនាំដ៏ខ្ពង់ខ្ពស់លោកឧត្ដមសេនីយ៍ទោ ឃឹម សុកខៃ ស្នងការនគរបាលខេត្តកំពង់ស្ពឺ កងកម្លាំងនគរបាលបានអនុវត្តការរឹតបន្តឹងការប្រើប្រាស់មធ្យោបាយ យានយន្តគ្រប់ប្រភេទ ដែលធ្វើដំណើរនៅលើផ្លូវជាតិ និងការដឹកជញ្ជូនសម្ភារៈទំនិញគ្រប់ប្រភេទ ចំណុចពិសេសសូមបងប្អូនបើកបរដោយការទទួលខុសត្រូវ គោរពល្បឿនកំណត់ រាល់ការដឹកជញ្ជូនសម្ភារៈទំនិញអោយមានការគិតអំពីលក្ខណៈសុវត្ថិភាពរួម ការបើកបរគ្មានជាតិស្រវឹង «បើស្រវឹងកុំបើកបរ» ។
ស្នងការដ្ឋាននគរបាលខេត្តកំពង់ស្ពឺ បានគូសបញ្ជាក់បន្ថែមថា កងកម្លាំងនគរបាលតែងតែជ្រើសរើសយកវិធានការអប់រំ និងណែនាំច្រើនជាងការផាកពិន័យ ប៉ុន្តែដាច់ខាតមិនបណ្តែតបណ្តោយឱ្យល្មើសច្បាប់ ឬបណ្តាលឱ្យគ្រោះថ្នាក់ចរាចរណ៍បន្តកើតមាន និងកើនឡើងនោះឡើយ៕
ចែករំលែកព័តមាននេះ