ខេត្តកំពង់ឆ្នាំង ៖ ប្រាក់ចំនួន១០ម៉ឺនរៀលរបស់ក្រុមហ៊ុនទេសចរណ៍វើលដ៍ផប (WORLD POP TRAVEL & TOUR) ផ្តល់ជូនគ្រួសារក្រីក្រមួយដែលត្រូវខ្យល់ព្យុះប៉ះផ្ទះបណ្តែតទឹករបស់គាត់លិចកាលពីពាក់កណ្តាលខែធ្នូ ឆ្នាំ២០១០ កន្លងទៅ ត្រូវភ្នាក់ងារកោះសន្តិភាពយកទៅប្រគល់ជូនហើយកាលពីថ្ងៃទី៣០ មករា។ មូលហេតុនៃការយឺតយ៉ាវប្រគល់ប្រាក់ ព្រោះក្រោយពីផ្ទះរលំលិចទឹកមក គ្រួសារនេះបានចល័តទៅដាក់មងចងសន្ទូចក្នុងទន្លេក្រៅបាត់ ម៉្លោះហើយភ្នាក់ងាររបស់យើងមិនមានលទ្ធភាពតាមរកឃើញទេ គឺត្រូវរង់ចាំរហូតដល់គាត់ត្រឡប់មកផ្ទះវិញ។
គ្រួសារនោះមានប្តីឈ្មោះមាស លាប អាយុ២៩ឆ្នាំ ប្រពន្ធឈ្មោះឡេង ណាង អាយុ២២ឆ្នាំ និងមានកូន៦នាក់ រស់នៅភូមិកំពង់អូរ ឃុំខុនរ៉ង់ ស្រុកបរិបូណ៌។ ផ្ទះបណ្តែតទឹករបស់ពួកគាត់ត្រូវខ្យល់ព្យុះប៉ះបណ្តាលឱ្យក្រឡាប់លិចចូលទៅក្នុងទន្លេកាលពីថ្ងៃទី១៦ ខែធ្នូ។ ពេលទទួលអំណោយ១០ម៉ឺនរៀលនេះ ទាំងប្តី និងប្រពន្ធមានក្តីរីករាយ និងបានថ្លែងអំណរគុណដល់ក្រុមហ៊ុនទេសចរណ៍ដែលមានសន្តានចិត្តអាណិតដល់ពួកគាត់ និងជូនពរឱ្យក្រុមហ៊ុនដំណើរការកាន់តែល្អប្រសើរឡើង និងមានការរីកចំរើនកុំបីអាក់ខាន ៕
ចែករំលែកព័តមាននេះ