ខេត្ដព្រះវិហារ ៖ កាលពីរសៀលថ្ងៃ ទី១៥ មិថុនា កន្លងទៅនេះ សាខាកាកបាទក្រហមកម្ពុជាខេត្ដ បាននាំយកអំណោយទៅប្រគល់ជូនអតីតយុទ្ធជនពិការភ្នែកទាំងពីរ និងដៃឆ្វេងឈ្មោះភួង សាវឿត រស់នៅក្រោមដំបូលផ្ទះម្ដាយជាទុរគតជនអាយុ៧៥ឆ្នាំ ក្នុងភូមិកំពង់ចម្លង សង្កាត់កំពង់ប្រណាក ក្រុងព្រះវិហារ ។ ពិធីនេះធ្វើឡើងក្រោម អធិបតីភាពលោកអ៊ុំ ម៉ារ៉ា អភិបាលខេត្ដ និងជាប្រធានកិត្ដិយសសាខាកាកបាទក្រហមកម្ពុជាខេត្ដ ដោយមានការចូលរួមពីសមា ជិក-សមាជិកា កាកបាទក្រហមកម្ពុជាខេត្ដ មន្ដ្រីរាជការជុំវិញខេត្ដ និងអាជ្ញាធរក្រុងព្រះវិហារ ។
អំណោយនេះត្រូវបានលោកស្រីចិក ហេង សមាជិកក្រុមប្រឹក្សាខេត្ដនិងជាប្រធានសាខាកាកបាទក្រហមកម្ពុជាខេត្ដ នាំយកទៅឧបត្ថម្ភដល់យោធិនពិការឈ្មោះភួង សាវឿត អតីតកងទ័ពវរសេនាតូចលេខ៥ចំណុះតំបន់សឹករងព្រះវិហារ ដែលបានប្រយុទ្ធយ៉ាង ក្រាញននាលជាមួយក្រុមឧទ្ទាមខ្មែរក្រហម នៅច្រកអានសេះក្នុងអំឡុងឆ្នាំ១៩៩៥ ដែលបណ្ដាលឱ្យយុទ្ធជនរូបនេះដាច់ដៃឆ្វេង និងខ្វាក់ភ្នែកទាំង២ ។ ក្រោយពីត្រូវពិការ អតីតយោធិនរូបនេះ ក៏បានមករស់នៅ ក្រោមដំបូលផ្ទះតែមួយជាមួយម្ដាយអាយុ៧៥ឆ្នាំ បងស្រីម៉េមាយ និងមានក្មួយកំព្រា៣នាក់ផងដែរ ស្ថិតក្នុងជីវភាពដ៏លំបាកបំផុត ។
លោកអ៊ុំ ម៉ារ៉ា បានមានប្រសាសន៍ ពាំនាំនូវការផ្ដាំផ្ញើសាកសួរសុខទុក្ខពីសំណាក់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា និងលោកជំទាវបណ្ឌិតប៊ុន រ៉ានី ហ៊ុន សែន ប្រធានកាកបាទក្រហមកម្ពុជាដែលគ្រប់ពេលវេលាសម្ដេច និងលោកជំទាវតែងតែ យកចិត្ដទុកដាក់បំផុតដល់ អតីតយុទ្ធជន និងទុរគតជនទាំងឡាយ ។ លោកអភិបាលខេត្ដ បានមានប្រសាសន៍ទៅកាន់អតីតយុទ្ធជនរូបនេះព្រមទាំងម្ដាយចំណាស់អាយុ៧៥ឆ្នាំ ថាចាប់ពីពេលនេះទៅសូមកុំបារម្ភ ព្រោះអីនៅមានអាជ្ញាធរដែនដីទទួលខុសត្រូវជួយទ្រទ្រង់ជីវភាពរស់នៅជាប្រចាំមិនទុកឱ្យជួបនូវភាពលំបាកក្រខ្សត់ឡើយ ។
អាជ្ញាធរត្រូវតែអនុវត្ដជាប្រចាំនូវអនុសាសន៍ដ៏ខ្ពង់ខ្ពស់របស់សម្ដេចតេជោ ហ៊ុន សែន ត្រូវយកចិត្ដទុកដាក់ចំពោះការរស់នៅរបស់អតីតយុទ្ធជន និងទុរគតជនទូទៅ ។ នៅក្នុងឱកាសនោះដែរ លោកស្រីចិក ហេង ប្រធានសាខាកាកបាទក្រហមកម្ពុជាខេត្ដ ក៏បានមានប្រសាសន៍ទៅកាន់យោធិនពិការភួង សាវឿត ព្រមទាំងលោកយាយ ជាម្ដាយថា សាខាកាកបាទក្រហមកម្ពុជាខេត្ដ និងប្រមូលសមាជិកអ្នកស្ម័គ្រចិត្ដកាកបាទក្រហមខេត្ដដើម្បីជួយជួសជុលលំនៅឋានដ៏ទ្រុឌទ្រោមដែលកំពុងរស់នៅសព្វថ្ងៃនេះឱ្យបានសមរម្យឡើងវិញដោយមិនទុកឱ្យដំបូលស្បូវរហែក និងជញ្ជាំងធ្លុះធ្លាយដូចមុនទៀតទេ ។
ចំពោះអំណោយរបស់សាខាកាកបាទ ក្រហមកម្ពុជាខេត្ដដែលបាននាំយកទៅឧបត្ថម្ភដល់យោធិនពិការភួង សាវឿត នារសៀលថ្ងៃនោះមានអង្ករ៥០គីឡូក្រាម ធុង ចំរោះទឹក១ ទឹកស៊ីអ៊ីវ៤យួរ ទឹកត្រី៤យួរ មី១កេស ត្រីខ១ឡូ ឆ្នាំង២ ចានដែក១ បំពង់ ទឹកក្ដៅ១ ចានបាយ និងចានសម្ល៥ ខ្ទះឆា វែកឆា១ ស្លាបព្រា៣ កំសៀវទឹក១ មុង ភួយ ក្រមា និងកន្ទេល ។ ដោយឡែក នារសៀល ថ្ងៃនោះ លោកមុំ ចន្ទលី អតីតមន្ដ្រីចូលនិវត្ដន៍ ព្រមទាំងលោកជំទាវចិក ហេង ជា ភរិយា ដែលជាប្រធានសាខាកាកបាទក្រហមកម្ពុជាខេត្ដក៏បានចូលរួមឧបត្ថម្ភជាថវិកាផ្ទាល់ខ្លួនចំនួន៥០ម៉ឺនរៀល លោកកុក ឈួន ចៅសង្កាត់បំពង់ប្រណាកឧបត្ថម្ភ៥ម៉ឺនរៀលផងដែរ ។
ក្រោយពីទទួលបានអំណោយនេះយោ ធិនពិការភួង សាវឿត និងលោកយាយជាម្ដាយ ព្រមទាំងក្រុមគ្រួសារបានលើកដៃប្រណមថ្លែងនូវអំណរគុណដល់សម្ដេចហ៊ុនសែន និងលោកជំទាវដែលគ្រប់ពេលវេលា សម្ដេច និងលោកជំទាវតែងតែយកចិត្ដទុក ដាក់ដល់ជីវភាពជនទីទាល់ក្រដូចជារូបគាត់ឱ្យកាន់តែមានភាពកក់ក្ដៅក្នុងជីវិតឡើងវិញ ៕
ចែករំលែកព័តមាននេះ