ខេត្តស្វាយរៀង ៖ គ្រោះថ្នាក់ចរាចរណ៍មួយបានកើតឡើងនៅភូមិត្រពាំងឆ្លូញ ឃុំញរ ស្រុកកំពង់រោទិ៍ កាលពីថ្ងៃទី២០ កុម្ភៈ វេលាម៉ោង៣រសៀល ធ្វើឱ្យស្ត្រីចំណាស់ម្នាក់ឈ្មោះរ័ត្ន សុខ អាយុ៥០ឆ្នាំ នៅភូមិ-ឃុំកើតហេតុខាងលើ ដួលបោកក្បាលទៅលើថ្នល់ហើមពោរសន្លប់នៅនឹងកន្លែង ។ បើតាមអ្នកភូមិម្នាក់ដែលនៅជិតផ្ទះស្ត្រីរងគ្រោះបានប្រាប់កោះសន្តិភាពថា
ខេត្តស្វាយរៀង ៖ គ្រោះថ្នាក់ចរាចរណ៍មួយបានកើតឡើងនៅភូមិត្រពាំងឆ្លូញ ឃុំញរ ស្រុកកំពង់រោទិ៍ កាលពីថ្ងៃទី២០ កុម្ភៈ វេលាម៉ោង៣រសៀល ធ្វើឱ្យស្ត្រីចំណាស់ម្នាក់ឈ្មោះរ័ត្ន សុខ អាយុ៥០ឆ្នាំ នៅភូមិ-ឃុំកើតហេតុខាងលើ ដួលបោកក្បាលទៅលើថ្នល់ហើមពោរសន្លប់នៅនឹងកន្លែង ។
បើតាមអ្នកភូមិម្នាក់ដែលនៅជិតផ្ទះស្ត្រីរងគ្រោះបានប្រាប់កោះសន្តិភាពថា ស្ត្រីរងគ្រោះជាជនទុរគតរស់នៅជាមួយម្តាយឈ្មោះរស់ ខិត អាយុ៨០ឆ្នាំ ចាស់ជរាវង្វេងវង្វាន់នៅតែក្នុងផ្ទះ រីឯស្ត្រីជាកូនជាក្រមុំចាស់រស់នៅជាមួយម្តាយ រកស៊ីដើរលាងចានឱ្យគេតាមផ្ទះបុណ្យផ្ទះការគ្រាន់បានប្រាក់បន្តិចបន្តួចយកមកចិញ្ចឹមម្តាយ ហើយនៅថ្ងៃកើតហេតុស្ត្រីរងគ្រោះបានទៅលាងចានឱ្យផ្ទះការគេនៅក្នុងភូមិជាមួយគ្នា ។ ក្រោយពីលាងចានឱ្យគេរួចហើយ ក៏ដើរដឹកកង់ចេញពីផ្ទះការមកដល់លើផ្លូវលំបម្រុងនឹងឡើងជិះកង់ ស្រាប់តែមានម៉ូតូមួយគ្រឿងបើកមកបុកចំពីក្រោយបណ្តាលឱ្យប៉ើងចម្ងាយ៣ម៉ែត្រ ដួលបោកក្បាលទៅលើផ្លូវសន្លប់នៅនឹងកន្លែង ។
ប្រភពដដែលបន្តថា មុនពេលកើតហេតុគេឃើញរថយន្តមួយគ្រឿងបើកបញ្ច្រាសម៉ូតូ ដោយបើកក្នុងល្បឿនយ៉ាងល្បឿនពេញផ្លូវលំ ធ្វើឱ្យអ្នកជិះម៉ូតូភ័យខ្លាចរថយន្តបុកក៏សម្រេចចិត្តបុកស្ត្រីរងគ្រោះដើម្បីគេចពីរថយន្ត ។ អ្នកបើកម៉ូតូក៏ជិះក្នុងល្បឿនលឿនដែរ លុះពេលវ៉ាក់នឹងរថយន្តមិនជាន់ហ្វ្រាំងឈប់ទេ បែរជាគេចមកបុកជនរងគ្រោះពីក្រោយបណ្តាលឱ្យដួលបោកក្បាលធ្ងន់ធ្ងរសន្លប់នៅនឹងកន្លែងតែម្តង។
ក្រោយពេលកើតហេតុសមត្ថកិច្ចបានហៅរថយន្តសង្គ្រោះដឹកស្ត្រីរងគ្រោះទៅកាន់មន្ទីរពេទ្យខេត្ត ដើម្បីសង្គ្រោះ។
រហូតមកដល់ម៉ោង១១ព្រឹក ថ្ងៃទី២១ កុម្ភៈ ស្ត្រីរងគ្រោះមិនទាន់ដឹងខ្លួននៅឡើយទេ ដោយសារដួលបោកក្បាលទៅក្រោយធ្ងន់ធ្ងរ តែពុំមានហូរឈាមដែលស្ថានភាពនេះតម្រូវឱ្យយកទៅស្គែនមើលខួរក្បាលនៅរាជធានីភ្នំពេញ ។ ប៉ុន្តែដោយសារស្ត្រីរងគ្រោះជាទុរគតជនមានតែម្តាយចាស់ជរាពុំមានអ្នកណាយកស្ត្រីនេះទៅភ្នំពេញ ទើបគ្រូពេទ្យអំពាវនាវរកសប្បុរសជនមេត្តាជួយឧបត្ថម្ភថវិកាដើម្បីសង្គ្រោះ និងឧបត្ថម្ភដល់ស្ត្រីជាម្តាយជរានៅផ្ទះដែលគ្មានអាហារកំពុងនៅរង់ចាំកូន ។ គេពុំហ៊ានប្រាប់លោកយាយពីរឿងកូនជួបគ្រោះថ្នាក់នេះទេ ហើយគាត់គិតតែពីចាំមើលផ្លូវកូន ៕
ចែករំលែកព័តមាននេះ