ខេត្ដរតនគិរី ៖ ការកាប់ទន្ទ្រានយកឈើលក់ដោយក្រុមឧក្រិដ្ឋជនព្រៃឈើ និងការរានយកដីធ្វើស្រែចំការរបស់បងប្អូនជនជាតិភាគតិច នៅតែបន្ដកើតមាននៅស្រុកតាវែង បើទោះបីជាមានបទបញ្ជាពីប្រមុខរដ្ឋាភិបាលក៏ដោយ ។ មានការលើកឡើងថា បើនៅតែបណ្ដែតបណ្ដោយឱ្យមានការកាប់ទន្ទ្រានព្រៃឈើដោយបែបនេះតទៅទៀត ព្រៃឈើនៅតំបន់នោះច្បាស់ជាអន្ដរាយអស់មិនខានឡើយ ។លោកប៉ាវ ហមផាន អភិបាលខេត្ដបានថ្លែងថា នៅក្នុងខេត្ដរតនគិរីទាំងមូលមាន៩ ស្រុក-ក្រុង និងមានប្រជាជន៣ម៉ឺនគ្រួសារ ស្មើនឹងជាង១៥ម៉ឺននាក់ ភាគច្រើនជាជនជាតិភាគតិចម្ល៉ោះហើយការកាប់ទន្ទ្រានព្រៃឈើយកដីធ្វើស្រែចំការច្រើនតែបងប្អូនជនជាតិភាគតិច ដែលគាត់ធ្វើស្រែចំការវិលជុំ ។ ក្នុងមួយឆ្នាំដីព្រៃឈើនៅខេត្ដរតនគិរីបានបាត់បង់ប្រមាណ២,០០០ហិកតាឯណោះ ។
ព្រោះបងប្អូនជនជាតិភាគតិចគាត់កាប់ព្រៃឈើរួចធ្វើចំការ តែក្នុងរយៈពេល៤ឆ្នាំគាត់រើចេញពី ដីនោះហើយទៅកាប់ទន្ទ្រានកន្លែងថ្មីទៀត ។ សព្វថ្ងៃនេះ ខេត្ដកំពុងតែរិះរកវិធានការណែនាំហាមឃាត់ និងទប់ស្កាត់ចំពោះបទល្មើសព្រៃឈើដែលបងប្អូនប្រជាពលរដ្ឋជាជនជាតិភាគតិចកាប់បំផ្លាញ ។ យើងត្រូវបង្ហាត់បង្ហាញគាត់ ដើម្បីឱ្យគាត់យល់ដឹងអំពីការប៉ះពាល់បរិស្ថានចំពោះការកាប់បំផ្លាញព្រៃឈើយកដីធ្វើចំការវិលជុំ ។លោកប៉ាវ ហមផាន បានអំពាវនាវផងដែរថា សូមឱ្យមន្ដ្រីស្ថាប័នផ្សេងៗដែលពាក់ព័ន្ធនឹងព្រៃឈើ បរិស្ថាន មេត្ដាជួយចុះធ្វើ អន្ដរាគមន៍ទប់ស្កាត់ពន្យល់បង្ហាត់បង្ហាញ ដល់បងប្អូនជនជាតិភាគតិចឱ្យយល់់ដឹងពីបរិស្ថានពីការកាប់បំផ្លាញព្រៃឈើនាំឱ្យបាត់ បង់ព្រៃឈើ ខូចបរិស្ថាន មានគ្រោះទឹកជំនន់ ខ្យល់ព្យុះ និងគ្រោះរាំងស្ងួតជាដើម ។ យើងទាំងអស់គ្នា ត្រូវងាកមកនាំគ្នាថែរក្សាព្រៃឈើរក្សាបរិស្ថានធម្មជាតិដែលជាជីវិតរបស់យើងទាំងអស់គ្នា ។
ចែករំលែកព័តមាននេះ