ក្រោយពីបណ្តាប្រទេសមហាអំណាចពិភពលោកបើកការវាយប្រហារតាមអាកាស៣លើកជាប់ៗគ្នា ប្រឆាំងលីប៊ី មេដឹកនាំប្រទេសនេះ វរសេនីយ៍ឯកមូអាម៉ា កាដាហ្វី កាលពីល្ងាចថ្ងៃទី២២ មីនា កន្លងមក បានបង្ហាញខ្លួនជាសាធារណៈលើកដំបូងក្នុងទីក្រុងទ្រីប៉ូលី រដ្ឋធានីលីប៊ី ហើយលោកបានសច្ចាថា លោកនឹងបន្តតស៊ូប្រយុទ្ធប្រឆាំង ខណៈពេលប្រទេសបារាំង និងបណ្តាប្រទេសលោកខាងលិចកំពុងមមាញឹកបង្កើតក្រុមប្រឹក្សាថ្មីមួយដើម្បីដឹកនាំអន្តរាគមន៍នៅលីប៊ី ។
ទូរទស្សន៍រដ្ឋលីប៊ីបង្ហាញពីលោកកាដាហ្វី ស្ថិតនៅចំពោះមុខអ្នកគាំទ្រលោកយ៉ាងច្រើនកុះករ ឯនិវេសនដ្ឋានរបស់លោកក្បែររដ្ឋធានីទ្រីប៉ូលី ។ និវេសនដ្ឋាននោះរបស់លោកកាដាហ្វី ស្ថិតនៅក្នុងតំបន់ Bab Al-Aziziya រងការបំផ្លិចបំផ្លាញដោយមីស៊ីលដែលបាញ់ចេញពីក្នុងសមុទ្រមេឌីទែរ៉ាណេ ក្នុងអំឡុងពេលនៃការវាយប្រហារដោយបណ្តាប្រទេសលោកខាងលិច កាលពីយប់ថ្ងៃទី២០ មីនា កន្លងមក ។
ក្នុងការបង្ហាញខ្លួនជាសាធារណៈលើកដំបូងក្រោយរយៈពេលមួយសប្តាហ៍មកហើយ លោកកាដាហ្វី ថ្លែងសុន្ទរកថាខ្លីមួយទៅកាន់ពួកអ្នកគាំទ្រលោក ដោយលោកអះអាងថា «ទោះបីជាយូរ ឬឆាប់ក៏ដោយ ក៏យើងបានត្រៀមខ្លួនជាស្រេច ដើម្បីប្រយុទ្ធប្រឆាំងជាមួយពួកលោកខាងលិច» ។
លោកម៉ូអាម៉ា កាដាហ្វី បានសម្រេចចិត្តបង្ហាញខ្លួនជាសាធារណៈក្រោយពីកងទ័ពប្រទេសលោកខាងលិច បើកការវាយប្រហារតាមអាកាសដោយសំឡេងផ្ទុះលាន់ឮពីលើក្រុងទ្រីប៉ូលី ។
ជាមួយគ្នានេះរដ្ឋមន្ត្រីការបរទេសបារាំង លោក Alain Juppe ថ្លែងកាលពីថ្ងៃទី២២ មីនា ថា ក្រុមប្រឹក្សានយោបាយថ្មីមួយមិនមែនជាអង្គការអូតង់ នឹងទទួលខុសត្រូវចំពោះការអនុវត្ត និងពង្រឹងតំបន់ហាមហោះហើរនៅប្រទេសលីប៊ី។ លោកថ្លែងទៀតថា ក្រុមប្រឹក្សាថ្មីនេះ ដែលស្នើបង្កើតឡើងដោយប្រទេសបារាំង នឹងរាប់បញ្ចូលទាំងរដ្ឋមន្ត្រីការបរទេសមកពីបណ្តាប្រទេសដែលកំពុងចូលរួមអន្តរាគមន៍នៅក្នុងប្រទេសលីប៊ី និងមកពីបណ្តាប្រទេសអារ៉ាប់ផងដែរ ។
លោក Alain Juppe ថ្លែងបន្តទៀតថា ចំណាត់ការយោធានឹងត្រូវបញ្ឈប់ ដរាបណារបបរបស់លោកកាដាហ្វី គោរពតាមដំណោះស្រាយរបស់ក្រុមប្រឹក្សាសន្តិសុខអង្គការសហប្រជាជាតិ ទទួលយកបទឈប់បាញ់ និងដកទ័ពចេញពីកន្លែងដែលពួកគេកំពុងឈរជើង ។ ដោយឡែកកាលពីថ្ងៃទី២២ មីនា នោះដែរ ប្រធានាធិបតីបារាំង លោកនីកូឡាស់ សាកូហ្ស៊ី និងសមភាគីអាេមរិក លោកបារ៉ាក់ អូបាម៉ា បានឯកភាពគ្នាតាមទូរស័ព្ទពីរបៀបប្រើប្រាស់រចនាសម្ព័ន្ធបញ្ជារបស់អង្គការអូតង់ ដើម្បីគាំទ្រប្រតិបត្តិការសឹកនៅលីប៊ី ៕
ចែករំលែកព័តមាននេះ