ថៃ ៖ យោងតាមការចេញផ្សាយរបស់សារព័ត៌មានថៃ PBS World នៅថ្ងៃទី០៤ ខែកុម្ភៈ ឆ្នាំ២០២៤ បានបញ្ជាក់ថា រថយន្តក្រុងដឹកកម្មករមួយគ្រឿងបានជួបគ្រោះថ្នាក់ធ្លាក់ពីលើស្ពានលិចចូលទឹកព្រែកនៅក្នុងតំបន់ឧស្សាហកម្មWellgrow ក្នុងស្រុកបាងបូ ខេត្តសាមុតប្រាកាន បណ្តាលឱ្យកម្មករប្រមាណ២០នាក់ រងរបួស៣នាក់ស្លាប់ ។

ព័ត៌មានថៃ PBS World បញ្ជាក់ថា ហេតុការណ៍គ្រោះថ្នាក់ដ៏រន្ធត់នេះ កើតឡើងនាវេលាម៉ោងប្រហែល7:30យប់ ថ្ងៃទី០៣ ខែកុម្ភៈ ឆ្នាំ២០២៤ ដោយរថយន្តក្រុងដឹកកម្មកចេញពីរោងចក្រKimpac ក្នុងតំបន់ឧស្សាហកម្មWellglow ដែលកំពុងធ្វើដំណើរ នៅតាមបណ្ដោយផ្លូវមួយខ្សែ ស្រាប់តែអ្នកបើកបរបានបាត់បង់ការគ្រប់គ្រង ហើយរេចង្កូតធ្លាក់ចេញពីស្ពានចូល ទៅក្នុងទឹកព្រែកដែលនៅផ្នែកខាងក្រោម ។ ក្រោយកើតហេតុ កម្មករជាច្រើនក្បែរទីតាំងកើតហេតុបាននាំគ្នាជួយវាយបំបែកកញ្ចក់រថយន្ត ដើម្បីជួយអ្នកដំណើរដែលនៅក្នុងចេញរថយន្តទំរាំក្រុមសង្គ្រោះមកដល់។

ក្រោយទទួលបានសេចក្ដីរាយការណ៍អំពីហេតុការណ៍រថយន្តក្រុងដឹកកម្មកររោងចក្រធ្លាក់ពីលើស្ពានឆ្លងប្រឡាយ មន្ត្រីជំនាញនិងស្ថាប័នពាក់ព័ន្ធបានប្រញាប់ប្រញាល់បើកការជួយសង្គ្រោះនិងស៊ើបអង្កេតដើម្បីកំណត់ពីមូលហេតុភ្លាមៗ ។ នៅកន្លែងកើតហេតុប៉ូលិសឃើញថា តួរថយន្តក្រុងទាំងមូលបានលិចចូលទឹកព្រែកនៅខាងក្រោមស្ពាននោះ ហើយក្រុមសង្គ្រោះបានព្យាយាមជួយសង្គ្រោះមនុស្សចេញពីរថយន្តក្រុងនោះ ខណៈអ្នករបួសត្រូវបានរថយន្តសង្គ្រោះបញ្ជូនទៅកាន់មន្ទីរពេទ្យធំៗ ចំនួន៣ក្នុងខេត្តនេះ ។ អ្នកស្លាប់ភ្លាមៗ ២នាក់ត្រូវបានទាញពីរថយន្ត ហើយក្នុងចំណោមអ្នករបួសទាំង២១ មានម្នាក់បានស្លាប់ ដែលធ្វើឱ្យចំនួនអ្នកស្លាប់កើនដល់៣នាក់ ។

ការស៊ើបអង្កេតបឋមបានរកឃើញថា រថយន្តក្រុងខ្នាតតូចប្រភេទកង់៦នេះ គឺបើកបរក្នុងល្បឿនលឿន ពេលដល់ស្ពានជាកន្លែងងងឹតគ្មានភ្លើង ទើបជ្រុលទៅបុករនាំងបេតុងនៅផ្នែកម្ខាងនៃផ្លូវ ទើបបណ្ដាលឱ្យបាត់បង់ម្ចាស់ការ ហើយធ្លាក់ចូលប្រឡាយ។ យ៉ាងណាក៏ដោយចំពោះមូលហេតុនៃគ្រោះថ្នាក់ មន្ត្រីជំនាញកំពុងបន្តស៊ើបអង្កេតបន្ថែមដើម្បីកំណត់មូលហេតុឱ្យបានច្បាស់លាស់ជាងនេះ។

យ៉ាងណា បើតាមការបញ្ជាក់ពីសមត្ថកិច្ចដែលបានចុះទៅជួយសង្គ្រោះអះអាងថា ការជួយជន​រងគ្រោះចេញគឺលំបាកដោយសារភក់ច្រើននៅបាតព្រែក ហើយសាកសពជនរងគ្រោះត្រូវបានរកឃើញនៅក្នុងភក់។ គេនៅមិនដឹងថា មានកម្មករប៉ុន្មាននាក់សរុបដែលជិះក្នុងរថយន្តឱ្យច្បាស់នៅ​ឡើយទេ ខណៈដែលសាកសពរថយន្តក្រុងត្រូវបានស្ទូចចេញពីប្រឡាយដើម្បីស្វែងរកមនុស្សបន្ថែម ដែលអាចជាប់ក្នុងរថយន្ត ក៏ដូចជាស្វែងរកជនរងគ្រោះបន្ថែមដែលអាចលិចនៅក្នុងភក់ ៕ អត្ថបទ៖ អោម ចែតច័ន្ទណារ៉ា