ខេត្តកណ្ដាល ៖ លំនៅឋានចំនួន៣ខ្នង នៅភូមិស្វាយជ្រំ សង្កាត់ស្វាយជ្រំ ក្រុងអរិយក្សត្រ បានក្លាយជាចំណីភ្លើង កាលពីល្ងាចថ្ងៃទី១១ ខែមីនា ឆ្នាំ២០២៦…
ខេត្តកណ្ដាល ៖ លំនៅឋានចំនួន៣ខ្នង នៅភូមិស្វាយជ្រំ សង្កាត់ស្វាយជ្រំ ក្រុងអរិយក្សត្រ បានក្លាយជាចំណីភ្លើង កាលពីល្ងាចថ្ងៃទី១១ ខែមីនា ឆ្នាំ២០២៦ កន្លងទៅ ។ នៅក្នុងហេតុការណ៍នេះ លោក ចាន់ តារា អភិបាលក្រុងអរិយក្សត្រ បានដឹកនាំកម្លាំងគណៈបញ្ជាការឯកភាពរដ្ឋបាលក្រុង ទៅធ្វើអន្តរាគមន៍ពន្លត់អគ្គិភ័យនេះ ។ ដោយមានការខិតខំប្រឹងប្រែងរបស់អាជ្ញាធរ កងកម្លាំងគ្រប់ប្រភេទ និងក្រុមការងារ ក៏គ្រប់គ្រងស្ថានការណ៍បានទាំងស្រុង ដោយមិនអាចឆេះរាលដាលបន្តបានឡើយ ។
នៅក្នុងការធ្វើអន្តរាគមន៍ពន្លត់អគ្គិភ័យនេះ កម្លាំងសមត្ថកិច្ចបានប្រើប្រាស់រថយន្តពន្លត់ភ្លើងចំនួន៦គ្រឿង និងប្រើប្រាស់ទឹកអស់៥៦ម៉ែត្រគូប ។ អភិបាលក្រុងលោក ចាន់ តារា បានថ្លែងអំណរគុណ និងកោតសរសើរក្រុមរថយន្តពន្លត់អគ្គិភ័យរបស់អធិការដ្ឋាននគរបាលក្រុង រថយន្តពន្លត់អគ្គិភ័យរបស់បុរីវីឡាទួលសង្កែអរិយក្សត្រ និងរថយន្តពន្លត់អគ្គិភ័យរបស់រដ្ឋបាលស្រុកល្វាឯម បងប្អូនប្រជាការពារ កងកម្លាំងទាំង៣ប្រភេទ និងអាជ្ញាធរពាក់ព័ន្ធ ដែលបានមកជួយអន្តរាគមន៍ពន្លត់អគ្គិភ័យនេះបានទាន់ពេលវេលា អត់មានឆេះរាលដាលបន្តឡើយ ។
តាមការសន្និដ្ឋានជំហានដំបូង មូលហេតុដែលនាំឲ្យកើតមានអគ្គិភ័យនេះ គឺបណ្ដាលមកពីឆ្លងចរន្តអគ្គិសនី ៕
ចែករំលែកព័តមាននេះ