បរទេស ៖ ឧបទ្ទវហេតុ​ធ្លាក់​យន្តហោះ​ដឹក​អ្នកដំណើរ​ខ្នាត​តូច​២​គ្រឿង បាន​កើតឡើង​នៅ​ប្រទេស​វ៉ា​នូ​អា​ទូ​(Vanuatu) និង​ប្រទេស​អូស្ត្រាលី ។

ករណី​ទី​១ ៖ សារព័ត៌មាន dailypost ចេញផ្សាយ​នៅ​ថ្ងៃ​ទី​០១ ខែកុម្ភៈ ឆ្នាំ​២០២៤ ក្រោម ចំណងជើង​ថា «​អ្នកដំណើរ​ទាំងអស់​មាន​សុវត្ថិភាព បន្ទាប់​ពី​ធ្លាក់​យន្តហោះ​» ។ អ្នកដំណើរ និង​បុគ្គលិក​ទាំង​អស់​ដែល​ជិះ​នៅ​យន្តហោះ​ធុន​តូច​មួយ​គ្រឿង​ដែល​បាន​ធ្លាក់​ចូល​ទៅ​ក្នុង​គុម្ពោត​ព្រៃ​នៅ​ពេល​ហោះ​ឡើង​នៅ​អាកាសយានដ្ឋាន Solar នៅ​លើ​កោះ Vanua Lava ប្រទេស​វ៉ា​នូ​អា​ទូ ភាគ​និរតី​នៃ​មហាសមុទ្រ​ប៉ា​ស៊ី​ហ្វិ​ក កាលពី​ថ្ងៃ​ទី​៣១ ខែមករា ឆ្នាំ​២០២៤ គឺ​មាន​សុវត្ថិភាព លោក John Salong រដ្ឋមន្ត្រីក្រសួង​ហិរញ្ញវត្ថុ​ប្រទេស​វ៉ា​នូ​អា​ទូ គឺ​ដែល​ជា​អ្នកដំណើរ​ម្នាក់ ក្នុង​ចំណោម​អ្នក​កំពុង​ជិះ​យន្តហោះ​៧​នាក់​ផ្សេង​ទៀត ដែល​រួម​មន្ត្រី​៥​នាក់​ផ្សេង​ទៀត និង​បុគ្គលិក​យន្តហោះ​២​នាក់ ។

យន្តហោះ​នេះ បាន​ធ្លាក់​ក្នុង​ពេល​ដែល​លោក​រដ្ឋមន្ត្រី និង​មន្ត្រី​របស់​ខ្លួន ជិះ​ទៅ​បំពេញបេសកកម្ម​ដើម្បី​រៀបចំ​កម្មវិធី​មួយ​នៅ​លើ​កោះ​នោះ​ដោយ​លោក​អះអាង​ថា ទាំងអស់​គ្នា​លើ​យន្តហោះ​គឺ​មាន​សុវត្ថិភាព​ដោយ​មិន​មាន​អ្នក​រង​របួស​នោះ​ទេ ប៉ុន្តែ​យន្តហោះ​វិញ​រង​ការ​ខូចខាត​ដំណំ​។

ខណៈ​ពេល​ដែល​មិន​មានការ​បញ្ជាក់​ផ្លូវការ​អំពី​មូលហេតុ​នៃ​ការ​ធ្លាក់​យន្តហោះ​នេះ ប៉ុន្តែ​បើ​អ្នក​ស្រុក​នៅ​ក្នុងភូមិ​Sola​បាន​និយាយ​ថា ជា​ធម្មតា​យន្តហោះ​ប្រឈម​នឹង​ការ​លំបាក​ក្នុង​ការ​ចុះ​ចត​នៅ​ព្រ​លាន​យន្តហោះ​នេះ ក្នុងអំឡុងពេល​អាកាសធាតុ​អាក្រក់​ដោយសារ​តែ​រអិល​ភក់ ហើយ​កាលពី​ខែ​មុន​មាន​យន្តហោះ​២​ក៏​បាន​ជួប​ហេតុការណ៍​ដូច​គ្នា​នេះ​ផង​ដែរ ។

បើ​តាម​រដ្ឋមន្ត្រី​ដដែល​អះអាង​ថា ពុំ​មាន​ភ្លៀង​ធ្លាក់​នៅ​ពេល​ពួក​គេ​មក​ដល់​កោះ​នោះ​ទេ​។ ប៉ុន្តែ​ភ្លៀង​ធ្លាក់​ខ្លាំង​នៅ​ក្នុង​ពេល​និង​ក្រោយ​កម្មវិធី​។ ពេល​ដែល​ពួក​គេ​ត្រឡប់​មក​អាកាសយានដ្ឋាន​វិញ​នៅ​ម៉ោង​2:25 នាទី​រសៀល អ្នក​បើក​យន្តហោះ​បាន​ពិនិត្យ និង​កំណត់​ថា វា​មិន​អី​ទេ​ក្នុង​ការ​ហោះហើរ ដូច្នេះ​ពួក​គេ​ឡើង​យន្តហោះ ។

ទោះជា​យ៉ាងណា ប៉ុន្មាន​នាទី​បន្ទាប់​ពី​ហោះ​ឡើង ក្នុង​ពេល​ដែល​អ្នក​បើក​បាន​ព្យាយាម​បង្កើន​ល្បឿន ប៉ុន្តែ​យន្តហោះ​មិន​អាច​ហោះ​ឡើង​ខ្ពស់​បាន​ទេ ។ ដោយ​ឃើញ​ថា មិន​ស្រួល​ហើយ អ្នក​បើក​យន្តហោះ​បាន​ព្យាយាម​បន្ថយល្បឿន និង​បើក​យន្តហោះ​ចុះ​មក​ដី​វី​ញ ប៉ុន្តែ​ផ្លូវ​រត់​នៅ​ក្នុង​ព្រ​លាន​យន្តហោះ​រអិល​ពេក ទើ​ធ្វើ​ឱ្យ​យន្តហោះ បោល​ចូល​ទៅ​ក្នុង​ព្រៃ​ដែល​នៅ​សងខាង​។

សាក្សី​នៅ​នឹង​កន្លែង​កើតហេតុ​បាន​សង្កត់ធ្ងន់​ថា ជា​សំណាងល្អ ដោយ​តែ​ទីតាំង​នោះ​សំបូរ​ទៅ​ដោយ​ឫស​នៃ​ដើមឈើ Burao ទើប​អាច​ទប់​យន្តហោះ​នោះ​មិន​ឱ្យ​ចូល​ទៅ​ក្នុង​ព្រៃ​ក្រាស់​និង​វាលភក់ ។ យ៉ាងណា​ក៏​ដោយ នាយក​ស្តីទី​នៃ​អាជ្ញាធរ​អាកាសចរណ៍​ស៊ី​វិល​នៃ​វ៉ា​នូ​អា​ទូ​បាន​ប្រកាស​ថា មន្ត្រី​ជំនាញ​នឹង​ត្រូវ​បញ្ជូន​ទៅ​កាន់​ទីតាំង​កើតហេតុ​ដើម្បី​ពិនិត្យ​មើល​ការ​ធ្លាក់​យន្តហោះ​នេះ​។

ករណី​ទី​២៖ សារព័ត៌មាន dailymail ចេញផ្សាយ​នៅ​ថ្ងៃ​ទី​០១ ខែកុម្ភៈ ឆ្នាំ​២០២៤ ដោយ​បញ្ជាក់​ថា «​ជា​អព្ភូតហេតុ​! អ្នក​បើក​យន្តហោះ​បាន​រស់រាន​មានជីវិត​បន្ទាប់​ពី​យន្តហោះ​ធ្លាក់​ហើយ​ផ្ទុះ​ឆេះ​»
យន្តហោះ​ខ្នាត​តូច​ប្រភេទ Cessna មួយ​គ្រឿង​បាន​ធ្លាក់​និង​ផ្ទុះ​ឆេះ​នៅ​ក្បែរ​ឆ្នេរសមុទ្រ​មួយ​ក្នុង​តំបន់​Hervey នៃ​រដ្ឋ Queensland ប្រទេស​អូស្ត្រាលី នៅ​ម៉ោង​២​រសៀល ថ្ងៃ​ទី​៣១ ខែកុម្ភៈ ឆ្នាំ​២០២៤​។ ជា​សំណាងល្អ​ណាស់ ក្រោយ​ពេល​ធ្លាក់ អ្នកបើកបរ​យន្តហោះ ដែល​ជា​មនុស្ស​តែ​ម្នាក់​ជិះ​លើ​យន្តហោះ​នោះ បាន​វា​ចេញពី​យន្តហោះ​ភ្លាម​ៗ​ដោយ​ប្រើ​ពេល​តែ​៣០​វិនាទី​មុន​ពេល ដែល​វា​ផ្ទុះ​ឆេះ តែ​គាត់​បានរ​រង​របួស​ក្បាល ហើយ​កំពុង​ត្រូវ​បាន​ក្រុម​គ្រូពេទ្យ​ផ្តា​ល់​ការ​ព្យាបាល​យ៉ាង​យកចិត្តទុកដាក់ ដោយ​ពី​គេ​បញ្ជូន​ទៅ​ដល់​មន្ទីរពេទ្យ Hervey Bay ។

បុរស​វ័យ​៣០​ឆ្នាំ រូប​នេះ បាន​អះអាង​ថា មុន​ពេល​យន្តហោះ​ធ្លាក់​បាន​ទាក់ទង​ទៅ​កាន់​អាកាស​យានដ្ឋាន Hervey Bay ដើម្បី​ស្នើ​សុំ​ចុះ​ចត​ដោយសារ​យន្តហោះ​មាន​បញ្ហា​បច្ចេកទេស ប៉ុន្តែ​គាត់​មិន​អាច​ចុះ​ចត​បាន ភ្លាម​ៗ​នោះ​គាត់​ក៏​គ្របគ្រង​យន្តហោះ​លែង​បាន ហើយ​យន្តហោះ​ក៏​ធ្លាក់​តែ​ម្តង ៕ អត្ថបទ​៖ អោម ចែត​ច័ន្ទ​ណា​រ៉ា