រាជធានីភ្នំពេញ ៖ មានពលរដ្ឋភាគតិចណាស់មិនស្គាល់ដំរីឡាក់គី ។ និយាយរួមសម្រាប់អ្នកទៅលេងសួនសត្វភ្នំតាម៉ៅ ពិតជាស្គាល់ដំរីឡាក់គី គឺដែលជាដំរីមួយក្បាលចេះរាំតាមបទភ្លេង ។ តែពេលនេះ ដំរីឡាក់គីកំពុងតែមានវិបត្តិផ្លូវចិត្ត…
រាជធានីភ្នំពេញ ៖ មានពលរដ្ឋភាគតិចណាស់មិនស្គាល់ដំរីឡាក់គី ។ និយាយរួមសម្រាប់អ្នកទៅលេងសួនសត្វភ្នំតាម៉ៅ ពិតជាស្គាល់ដំរីឡាក់គី គឺដែលជាដំរីមួយក្បាលចេះរាំតាមបទភ្លេង ។ តែពេលនេះ ដំរីឡាក់គីកំពុងតែមានវិបត្តិផ្លូវចិត្ត ដោយសារតែហ្ម ឬអ្នកថែទាំខ្លួនតាំងពីដើមមក បានឈប់បម្រើការងារនៅឧទ្យានសួនសត្វភ្នំតាម៉ៅ ។
ព័ត៌មានពីដំរីឡាក់គីរត់តាមអ្នកមើលថែ ដែលបានឈប់បម្រើការងារនៅឧទ្យានសួនសត្វភ្នំតាម៉ៅ មហាជនស្នើឱ្យមានការឆ្លើយតបដល់ផ្លូវចិត្តរបស់សត្វ ខណៈដែលដំរីនេះ បានចាត់ទុកអ្នកមើលថែខ្លួនជាគ្រួសារ ។ ម្យ៉ាងមហាជនបានបារម្ភថា ដំរីមួយក្បាលនេះ អាចនឹងកើតទុក្ខទៅជាលែងសុីចំណី ប្រឈមនឹងគ្រោះថ្នាក់ ។
លោក ទ្រី សុីថេង ជាអ្នកមើលថែ និងស្និទ្ធស្នាលបំផុតជាមួយនឹងឡាក់គីច្រើនឆ្នាំមកហើយ ដែលអាចចាត់ទុកថា ជាគ្រួសារម្នាក់របស់ដំរីមួយក្បាលនះ ។ ប៉ុន្តែសុខៗ ក៏ស្រាប់តែលោកបញ្ចេញវីដេអូមួយដែលត្រូវឃ្លាតឆ្ងាយពីសត្វដ៏ឆ្លាតដែលខ្លួនធ្លាប់មើលថែ ខណៈដំរីនេះពិតជាមិនចង់ឃ្លាតឆ្ងាយពីលោកដែរ ដោយបានរត់តាមម៉ូតូលោក នៅពេលដែលលោកចេញដំណើរទៅផ្ទះ ហាក់សុំក្តីអាណិតកុំឱ្យចាកចោលរូបគេឱ្យនៅកំព្រា ។
ឃើញសកម្មភាពនេះ មហាជនជាច្រើន ហាក់បង្ហាញចម្ងល់ចំពោះការចាកចេញរបស់លោក ទ្រី សុីថេង ផងដែរ ។ តែទោះបីជាមិនដឹងលម្អិតពីការចាកចេញរបស់លោកពីការងារនេះក្ដី មហាជនជាច្រើន រួមទាំងសិល្បករ ក៏ដូចជាក្រុមអ្នកស្រឡាញ់សត្វផង បានស្នើឱ្យមានការគិតគូរចំពោះផ្លូវចិត្តដំរីមួយក្បាលនេះ ព្រោះបារម្ភថា វានឹងសោកសៅលែងសុីចំណី ហើយនឹងធ្លាក់ខ្លួនឈឺ ។
ក្រុមអ្នកសង្គ្រោះសត្វបានបញ្ចេញមតិបន្ថែមថា “បេីចង់ឱ្យគាត់ចាកចេញ គួរតែផ្ដល់ពេលវេលាសម្រាប់ឱ្យមានម្នាក់ដែលអាចមកស្និទ្ធស្នាល និងយល់ចិត្តជាមួយដំរីនេះសិនដែរ ព្រោះសត្វមានមនោសញ្ចេតនាជ្រាលជ្រៅ ធ្វេីបែបនេះ វាប៉ះពាល់សុខភាពសត្វ និងអាយុជីវិតសត្វ“ ។ ម្យ៉ាង មានករណីសត្វដែលបាត់បង់ម្ចាស់ ក៏ឈប់ទទួលអាហារ នឹកម្ចាស់ ស្ត្រេស ធ្លាក់ខ្លួនឈឺរហូតដល់ស្លាប់ ។
មហាជនមិនបានជ្រាបច្បាស់ពីការពាក់ព័ន្ធនឹងមូលហេតុ នៃការឈប់ពីការងាររបស់លោក ទ្រី សុីថេង ប៉ុន្តែក៏សំណូមពរដល់គណៈគ្រប់គ្រងឧទ្យានសួនសត្វភ្នំតាម៉ៅ ពិសេសអ្នកមើលថែដំរីឡាក់គីរូបនេះផ្ទាល់ គិតគូរដល់ផ្លូវចិត្តសត្វ ។
គួររំលឹកថា ឡាក់គី ជាដំរីដែលធ្លាប់បានចូលរួមសម្តែងជាមួយកំពូលតារាចម្រៀង ព្រាប សុវត្ថិ តាមរយៈបទ ដំរីថ្នមស្នេហ៍ កាលពី១៩ឆ្នាំមុន ខណៈបច្ចុប្បន្ន ដំរីមួយក្បាលនេះ ក៏កំពុងទទួលបានការចាប់អារម្មណ៍ផងដែរ ពីទេសចរណ៍ក្នុងស្រុក ។
នឹកដល់គ្រាថតបទ«ដំរីថ្នមស្នេហ៍»ជាមួយដំរីឡាក់គី កន្លងផុតទៅជិត២០ឆ្នាំទៅហើយ តាមពិតកូនដំរីឈ្មោះ ឡាក់គី ដែលធ្លាប់បានចូលរួមសម្តែងជាមួយកំពូលតារាចម្រៀងលោក ព្រាប សុវត្ថិ ពេញវ័យទៅហើយ និងកំពុងរស់នៅយ៉ាងមានក្តីសុខក្នុងសួនសត្វភ្នំតាម៉ៅ ហើយក៏បម្រើដល់វិស័យទេសចរណ៍នៅទីនោះផងដែរ ។
បន្ទាប់ពីបានមើលឃើញនូវវត្តមានដំរីមួយក្បាលនេះ តាមរយៈការផ្សព្វផ្សាយ ឧកញ៉ា ព្រាប សុវត្ថិ បានបង្ហាញក្តីនឹករលឹក និងបញ្ជាក់ថា ឆាប់ៗនេះលោកនឹងទៅជួបដំរី ឡាក់គី ហើយរាំជាមួយគ្នាម្តងទៀត ។
ជាការកត់សម្គាល់ បច្ចុប្បន្នហ្វូងដំរីនៅសួនសត្វភ្នំតាម៉ៅ កំពុងក្លាយជាទីចាប់អារម្មណ៍ខ្លាំងរបស់អ្នកទេសចរ ពិសេសកូនដំរីដ៏កម្សត់ លំផាត់ ខណៈថ្មីៗនេះ អ្នកមើលថែទើបតែបើកបង្ហាញប្រវត្តិដំរី ឡាក់គី ធ្វើឱ្យកំពូលតារាចម្រៀង ព្រាប សុវត្ថិ ក៏មានក្តីនឹករលឹក និងសន្យាថា ទៅជួបដំរីឡាក់គីឆាប់ៗនេះមិនខានឡើយ ។
គួររំលឹកថា តាមរយៈបទ«ដំរីថ្នមស្នេហ៍» ដំរី ឡាក់គី បានបង្ហាញទេពកោសល្យរាំ ញាំងឱ្យរូបភាពក្នុងវីដេអូចម្រៀងកាលគ្រានោះ កាន់តែប្លែកអារម្មណ៍សម្រាប់អ្នកទស្សនា អមនឹងសំនៀងពិរោះរណ្តំរបស់លោក ស្តាប់មិនជិនណាយ ។
គួររំលឹកផងដែរថា ប្រវត្តិឡាក់គី(ដំរី) គឺបានមកដល់សួនសត្វភ្នំតាម៉ៅ នៅថ្ងៃ២៣ ខែកក្កដា ឆ្នាំ១៩៩៩ ជាដំរីញី បានចាត់ទុកលោក ទ្រី ស៊ីថេង ដូចជាម្តាយទី២ តាំងពីគេបានមកដល់សួនសត្វ ដោយសារតែលោកតែងតែមើលថែ និងបញ្ចុកទឹកដោះគោឱ្យ ។ ចំណែកលោក ទ្រី ស៊ីថេង វិញ ក៏បានបម្រើការក្នុងសួនសត្វភ្នំតាម៉ៅអស់រយៈពេល៣០ឆ្នាំមកហើយដូចគ្នា គឺតាំងពីឆ្នាំ១៩៩៥ មកម្ល៉េះ ។
បន្ថែមពីនេះ បើតាមលោក ទ្រី ស៊ីថេង ផ្ទាល់ ក៏បានសម្តែងភាពសោកស្តាយដែរ ដែលខ្លួនត្រូវឈប់ពីការងារ កាលពីថ្ងៃ៣០ ខែមិថុនា និងមិនបាននៅដល់ថ្ងៃខួបកំណើតរបស់ ឡាក់គី ព្រោះរាល់ឆ្នាំលោកតែងតែធ្វើកម្មវិធីខួបកំណើតឱ្យ ។ យ៉ាងណាមិញ លោកក៏សង្ឃឹមថា នៅថ្ងៃខួបកំណើត ឡាក់គី រូបលោកនឹងអាចឆ្លៀតពេលទិញនំចំណីយកមកឱ្យ ឡាក់គី មិនខាន ៕
ចែករំលែកព័តមាននេះ