ប្រទេសឥណ្ឌូណេស៊ី ៖ មន្ត្រីប្រចាំកោះបាលី ប្រទេសឥណ្ឌូណេស៊ី បានអំពាវនាវឱ្យមានការផាកពិន័យធ្ងន់ធ្ងរ ព្រមទាំងការបណ្តេញបណ្តាភ្ញៀវទេសចរបរទេសបំពានច្បាប់ ដើម្បីការពារកេរ្តិ៍ឈ្មោះទេសចរណ៍កោះបាលី ចំពេលមានការព្រួយបារម្ភកាន់តែខ្លាំងអំពីការកើនឡើងបទឧក្រិដ្ឋ។ ប្រភពពីកាសែត South…
ប្រទេសឥណ្ឌូណេស៊ី ៖ មន្ត្រីប្រចាំកោះបាលី ប្រទេសឥណ្ឌូណេស៊ី បានអំពាវនាវឱ្យមានការផាកពិន័យធ្ងន់ធ្ងរ ព្រមទាំងការបណ្តេញបណ្តាភ្ញៀវទេសចរបរទេសបំពានច្បាប់ ដើម្បីការពារកេរ្តិ៍ឈ្មោះទេសចរណ៍កោះបាលី ចំពេលមានការព្រួយបារម្ភកាន់តែខ្លាំងអំពីការកើនឡើងបទឧក្រិដ្ឋ។
ប្រភពពីកាសែត South China Morning Post បានរាយការណ៍ថា លោក Komang Nova Sewi Putra អនុប្រធានក្រុមប្រឹក្សានីតិប្បញ្ញត្តិកោះបាលីបានតស៊ូមតិ ចំពោះការបណ្តេញជនបរទេសដែលបំពានច្បាប់ជាវិធានការណ៍ម៉ឺងម៉ាត់ ដើម្បីធានាសន្តិសុខរបស់កោះនៃប្រទេសឥណ្ឌូណេស៊ីដ៏ល្បីល្បាញលើពិភពលោកមួយនេះ។
លោក Putra បានថ្លែងថា «ប្រសិនបើយើងស្ថិតនៅបរទេស ហើយឈ្លោះគ្នា យើងនឹងត្រូវបណ្តេញចេញភ្លាមៗ។ ហេតុអ្វីបានជារឿងនេះមិនត្រូវបានអនុវត្តនៅកោះបាលី? ពេលចាប់បាន ត្រូវបណ្តេញពួកគេចេញទៅ។ នេះនឹងធ្វើឱ្យកោះបាលីមានសុវត្ថិភាពជាងមុន»។
បើយោងតាមកាសែត The Bali Sun បានរាយការណ៍ថា លោក Nyoman Budiutama ប្រធានគណៈកម្មការនៃក្រុមប្រឹក្សានីតិប្បញ្ញត្តិរបស់កោះបាលីបានសង្កត់ធ្ងន់ថា ស្ថានភាពសន្តិសុខកោះបាលី ទាមទារការយកចិត្តទុកដាក់យ៉ាងខ្លាំង ជាពិសេសដោយសារតែការកើនឡើងនូវករណីបទឧក្រិដ្ឋពាក់ព័ន្ធនឹងជនបរទេស និងការបំពានច្បាប់។ លោកបានបន្ថែមថា បទល្មើសដែលលេចច្រើនជាងគេ គឺបទល្មើសសាមញ្ញដូចជា ចោរកម្ម និងការរំលោភបំពានច្បាប់ចរាចរណ៍របស់ជនបរទេស ក៏ដូចជាការរំលោភលើប័ណ្ណស្នាក់នៅ ដែលប្រើប្រាស់សម្រាប់គោលបំណងអាជីវកម្ម។
ទិន្នន័យបានបង្ហាញថា ប៉ូលិសកោះបាលីបានកត់ត្រាហេតុការចំនួន៣ ៥៣៨ករណី នៃការរំខានសណ្តាប់ធ្នាប់សាធារណៈ និងសន្តិសុខ ចាប់ពីខែមករា ដែលពាក់ព័ន្ធទាំងជនជាតិឥណ្ឌូណេស៊ី និងជនបរទេស ដោយនៅក្នុងនោះមាន២ ៧៧៦ករណី ជាករណីព្រហ្មទណ្ឌ រួមមានបទល្មើសសាមញ្ញ ឧក្រិដ្ឋកម្មឆ្លងដែន និងការរំលោភបំពានលើទ្រព្យសម្បត្តិរដ្ឋ។ បទល្មើសប្រព្រឹត្តដោយជនបរទេសភាគច្រើនគឺការវាយដំ និងការក្លែងបន្លំ ចំណែកបទល្មើសប៉ះពាល់ដល់ជនរងគ្រោះជនបរទេសភាគច្រើនគឺករណីចោរលួច ប្លន់ និងជំរិតទារប្រាក់។
កោះបាលីត្រូវបានគេដាក់ឈ្មោះថា កោះដ៏ស្រស់ស្អាតបំផុតរបស់អាស៊ីនៅក្នុងពានរង្វាន់ Reader’s Choice Awards ប្រចាំឆ្នាំ ដោយទស្សនាវដ្តី DestinAsian ។ កាលពីខែតុលា ឆ្នាំមុន កោះនេះត្រូវបានទទួលស្គាល់ដូចគ្នាពីទស្សនាវដ្តីទេសចរណ៍ Condé Nast Traveler នៅក្នុងពានរង្វាន់ Readers’ Choice Awards របស់ខ្លួន។
កោះបាលីបានស្វាគមន៍ភ្ញៀវទេសចរបរទេសចំនួន ៦,៣លាននាក់ក្នុងឆ្នាំ២០២៤ ដែលលើសពីកម្រិតមុនការរាតត្បាតជំងឺកូវីដ១៩ ហើយមានបំណងទាក់ទាញភ្ញៀវទេសចរចំនួនដល់ ៦,៥លាននាក់នៅឆ្នាំនេះ។ ជាមួយគ្នានោះ ដើម្បីដោះស្រាយអាកប្បកិរិយាមិនសមរម្យ និងកែលម្អរូបភាពទេសចរណ៍អវិជ្ជមានរបស់ខ្លួន ចំពេលមានសន្ទុះនៃការធ្វើដំណើររបស់អ្នកទេសចរនោះ កោះបាលីបានបង្ហាញគោលការណ៍ណែនាំថ្មី សម្រាប់ភ្ញៀវទេសចរបរទេស ដែលត្រូវអនុវត្តតាម៕ ដកស្រង់ ៖ VnExpress
ចែករំលែកព័តមាននេះ