ថៃ ៖ រដ្ឋមន្ត្រីក្រសួងពាណិជ្ជកម្មថៃ លោកឧបនាយករដ្ឋមន្ត្រី Phumtham Wechayachai បានបញ្ជាឱ្យនាយកដ្ឋានគយចាត់វិធានការទប់ស្កាត់បន្ទាន់នូវការហូរចូលនៃខោដែលមានតម្លៃថោកៗដែលត្រូវបានលួចចម្លងដោយរោងចក្រចិនដែលផលិតតាមលំនាំខោឆ្មា និងខោដំរីរបស់ថៃ ។ នេះបើយោងតាមការចុះផ្សាយរបស់សារព័ត៌មានថៃ…
ថៃ ៖ រដ្ឋមន្ត្រីក្រសួងពាណិជ្ជកម្មថៃ លោកឧបនាយករដ្ឋមន្ត្រី Phumtham Wechayachai បានបញ្ជាឱ្យនាយកដ្ឋានគយចាត់វិធានការទប់ស្កាត់បន្ទាន់នូវការហូរចូលនៃខោដែលមានតម្លៃថោកៗដែលត្រូវបានលួចចម្លងដោយរោងចក្រចិនដែលផលិតតាមលំនាំខោឆ្មា និងខោដំរីរបស់ថៃ ។ នេះបើយោងតាមការចុះផ្សាយរបស់សារព័ត៌មានថៃ The Nation នៅថ្ងៃទី០៦ ខែកុម្ភៈ ឆ្នាំ២០២៤ ។
រដ្ឋមន្ត្រីក្រសួងពាណិជ្ជកម្មថៃបាននិយាយថា ខោដំរីនិងខោឆ្មាដែលបានចម្លងដោយប្រទេសចិន មិនបានរក្សាទម្រង់ដើមទាំងស្រុងតាមខោថៃនោះទេ ហើយគុណភាពទៀតសោត គឺអន់ជាងខោថៃឆ្ងាយណាស់។
តែយ៉ាងណាក៏ដោយ លោកឧបនាយករដ្ឋមន្ត្រី Phumtham បានពន្យល់យ៉ាងដូច្នេះថា « ខ្ញុំកំពុងតែសិក្សាឱ្យលម្អិតដើម្បីឱ្យប្រាកដថា តើយើងគួរប្រើច្បាប់កម្មសិទ្ធិបញ្ញាដោយរបៀបណា ដើម្បីការពារផលិតផលថៃដើម ពីផលប៉ះពាល់ដែលកើតចេញផលិតផលលួចចម្លងដែលមានគុណភាពអន់ៗពីប្រទេសចិ» ។ខោដំរីគឺជាផ្នែកមួយនៃ «យុទ្ធនាការថាមពលទន់ ឬ Thai soft power» របស់រដ្ឋាភិបាលថៃ ។ ខោដំរីដែលគេស្គាល់ថា ជាខោអ្នកនេសាទ ឬខោអាឡាដាំង បានក្លាយជាវត្ថុអនុស្សាវរីយ៍ដ៏ពេញនិយមក្នុងប្រទេសថៃ ។
រូបដំរីត្រូវបានរចនាឡើងដើម្បីផ្សារភ្ជាប់និងឆ្លុះបញ្ចាំងពីសារសំខាន់នៃសត្វដ៏អស្ចារ្យនេះ នៅក្នុងវប្បធម៌ថៃ។បញ្ហាលួចចម្លងខោដំរី និងឆ្មារបស់ចិន ទើបតែត្រូវបានអ្នកសារព័ត៌មានថៃ ចោទសួរទៅកាន់នាយករដ្ឋមន្ត្រីថៃ លោកស្រេតថា ថាវីស៊ីន ក្នុងបទសម្ភាសន៍កាលពីថ្មីៗនេះផងដែរ បន្ទាប់ពីរឿងនេះមានប្រតិកម្មនិងខឹងសម្បារក្នុងចំណោមមហាជនថៃជាតិនិយមភាគច្រើន។រដ្ឋមន្ត្រីក្រសួងពាណិជ្ជកម្មថៃបន្តទៀតថា លោកបានណែនាំនាយកដ្ឋានកម្មសិទ្ធិបញ្ញាចាត់វិធានការច្បាប់លើខោក្លែងក្លាយទាំងនោះ និងបានណែនាំឱ្យនាយកដ្ឋានគយត្រួតពិនិត្យការនាំចូលពីប្រទេសចិន។
លោកបន្ថែមថា វិធានការទាំងនេះនឹងត្រូវធានាថាមិនមានផលប៉ះពាល់ដល់ផលិតផលថៃ ។ រដ្ឋមន្ត្រីក្រសួងពាណិជ្ជកម្មថៃក៏បានណែនាំដល់នាយកដ្ឋានផ្សព្វផ្សាយពាណិជ្ជកម្មអន្តរជាតិ ដើម្បីសម្របសម្រួលជាមួយក្រុមហ៊ុនផលិតក្នុងស្រុក ដើម្បីពិចារណាបន្ថែមតែម ឬស្លាកសញ្ញា «ផលិតនៅប្រទេសថៃ» ។ខោដំរីភាគច្រើនផលិតនៅខេត្តឈៀងម៉ៃ ដោយសារសាច់ក្រណាត់ស្តើង និងរលុងៗ ដែលធ្វើឱ្យអ្នកស្លៀកមានផាសុកភាពក្នុងអាកាសធាតុក្ដៅ ដែលធ្វើឱ្យវាពេញនិយមខ្លាំងក្នុងចំណោមអ្នកទេសចរបរទេស។
អ្វីដែលធ្វើឱ្យថៃក្ដៅស្លឹកត្រចៀកនោះ គឺខោដំរីថោកៗដែលត្រូវបានលួចចម្លងនិងផលិតដោយរោងចក្រប្រទេសចិន ត្រូវបាននាំចូល និងត្រូវបានដាក់លក់យ៉ាងទូលំទូលាយនៅក្នុងប្រទេសថៃ ដោយគេអាចរកទិញបានដោយសេរីនៅផ្សារលក់ដុំនៅទីក្រុងបាងកក ជាពិសេស ផ្សារលក់រាយដ៏ល្បីក្នុងតំបន់ Pratunam ។ ខោដំរីទាំងនេះ ក៏ត្រូវបានក្រុមហ៊ុនដាក់លក់នៅតាមវេបសាយលក់ទំនិញតាមអនឡាញជាច្រើនក្នុងតម្លៃមួយដ៏ថោក បើធៀបនឹងខោថៃ ដែលទាំងអាជីវករ និងពលរដ្ឋថៃខ្លួនឯងផ្ទាល់ក៏បានកុម្ម៉ង់ទិញខោដំរីពីចិនយកមកលក់បន្តផងដែរ ។
យ៉ាងណាក៏ដោយ ក្រោយពីប្រទេសថៃទាមទារសិទ្ធផ្តាច់មុខ និងអះអាងថា ខ្លួនជាម្ចាស់ដើមនៃខោដំរីនេះ ។ អត្ថបទ៖ អោម ចែតច័ន្ទណារ៉ា
ចែករំលែកព័តមាននេះ