រាជធានីភ្នំពេញ ៖ ជនសង្ស័យដែលធ្វើសកម្មភាពកាប់ប្លន់យកម៉ូតូមួយគ្រឿងមិនបានសម្រេចនៅតាមមហាវិថីឈ្នះឈ្នះក្នុងភូមិបាក់ខែងលើ សង្កាត់បាក់ខែង ខណ្ឌជ្រោយចង្វារ ត្រូវបានកម្លាំងការិយាល័យនគរបាលព្រហ្មទណ្ឌកំរិតស្រាលនៃស្នងការដ្ឋាននគរបាលរាជធានីភ្នំពេញសហការ ជាមួយអធិការដ្ឋាននានា ស្រាវជ្រាវឃាត់ខ្លួនបានជាបន្តបន្ទាប់ចំនួន៦ នាក់បន្ទាប់ពីធ្វើសកម្មភាពធាក់ម៉ូតូផ្ដួលកាប់ប្លន់មិនដល់២៤ម៉ោងផង។ គួររំលឹកថា បុរសម្នាក់ត្រូវជនសង្ស័យ៤នាក់ចា.ក់ជាច្រើនកាំបិ.ត នៅមហាវិថីឈ្នះឈ្នះ
ជនសង្ស័យទាំង៦នាក់ខាងលើ រួមមាន១-ឈ្មោះ ធី សុខថា ហៅ ញ៉ាញ ភេទប្រុស អាយុ២០ឆ្នាំ,២.ឈ្មោះ ភឿន វុធឌី ហៅឌី ភេទប្រុស អាយុ២៥ឆ្នាំ ,៣ឈ្មោះ សរ ដេវីត ហៅ វិត ភេទប្រុស អាយុ២០ឆ្នាំ,៤.ឈ្មោះ អុច សូលីម៉ាទូសុីង ហៅ សុីង ភេទប្រុស អាយុ២០ឆ្នាំ,៥.ឈ្មោះ ស្រី គិមសុីរ ហៅ ត្រេន ភេទប្រុស អាយុ១៦ឆ្នាំនិង៦.ឈ្មោះ ណឿន វាសនា ហៅ ស្នា ភេទប្រុស អាយុ២០ឆ្នាំ។
លោកវរសេនីយ៍ឯកម៉ម សាវន នាយការិយាល័យ នគរបាលព្រហ្មទណ្ឌកំរិតស្រាលនៃ ស្នងការនគរបាលរាជធានីភ្នំពេញបានឲ្យដឹងថា ដោយអនុវត្តតាមបទបញ្ជាផ្ទាល់របស់ឯកឧត្ដម ឧត្តមសេនីយ៍ ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ និងលោកឧត្តមសេនីយ៍ត្រីប៊ុន សត្យាស្នងការរង ទទួលផែនការងារព្រហ្មទណ្ឌ នគរបាល ជំនាញ ការិយាល័យនគរបាលព្រហ្មទណ្ឌកំរិតស្រាលបានចុះសហការស្រាវជ្រាវឃាត់ខ្លួនបានជនសង្ស័យជាបន្តបន្ទាប់ចំនួន៦នាក់កាលពីយប់ថ្ងៃទី១៧ខែ តុលា ឆ្នាំ២០២៥។
លោកវរៈសេនីយ៍ឯក ម៉ម សាវន បានអោយដឹងទៀតថាជនសង្ស័យជាមុខសញ្ញាមុខប្លន់ដែលធ្វើសកម្មភាពពីរករណី,ករណីទី១.ធ្វើសកម្មភាព លួចមានស្ងានទម្ងន់ទោស(កាប់ប្លន់យកម៉ូតូ) បណ្តាលអោយជនរងគ្រោះម្នាក់រងរបួសធ្ងន់ ធ្លាយពោះនៅចំណុច ផ្លូវមហាវិថីឈ្នះឈ្នះ ក្រុមទី១៤ ភូមិបាក់ខែងលេីសង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ វេលាម៉ោងប្រហែល ០៤ម៉៣០នាទី ថ្ងៃទី១៧ ខែតុលាឆ្នាំ ២០២៥។
ករណីទី២: លួចមានស្ងានទម្ងន់ទោស បណ្តាលអោយជនរងគ្រោះជាបុរស រងរបួស ធ្ងន់ (ប្លន់យកម៉ូតូ) នៅផ្លូវ ៣០ម៉ែត្រ ភូមិព្រៃធំ សង្កាត់ព្រៃស ខណ្ឌដង្កោ រាជធានីភ្នំពេញ វេលាម៉ោងជាង២យប់រំលងអាធ្រាត្រ ថ្ងៃទី១៣ ខែតុលា ឆ្នាំ ២០២៥។ បន្ទាប់ពីឃាត់ខ្លួនសមត្ថកិច្ចដកហូតវត្ថុតាងរួមមានៈម៉ូតូ៤គ្រឿង និងដាវចំនួន២ដេីមដែលធ្វេីសកម្មភាពកាប់ជនរងគ្រោះ។
គួរបញ្ជាក់ថា កាលពីវេលាម៉ោង៤និង៣០នាទីព្រឹកថ្ងៃទី១៧ ខែតុលា ឆ្នាំ ២០២៥ក្រុមជនសង្ស័យមានគ្នា៤នាក់ជិះម៉ូតូពីរគ្រឿងបានធ្វើសកម្មភាពធាក់ម៉ូតូផ្តូលហើយកាប់ទៅជនរងគ្រោះជាច្រើនដាវបណ្ដាលឲ្យរងរបួសធ្លាយពោះតែប្លន់យកម៉ូតូពុំបានសម្រេចត្រូវបានប្រជាពលរដ្ឋស្រែកឆោឡោ។
ហេតុការណ៍បានកើតឡើងនៅចំណុចមហាវិថីឈ្នះឈ្នះក្បែរផ្សារម៉ាក្រូក្នុងភូមិបាក់ខែងលើ សង្កាត់បាក់ខែងខណ្ឌជ្រោយចង្វារ រាជធានីភ្នំពេញ។នៅ មុនពេលកើតហេតុជនរងគ្រោះឈ្មោះ សឿន ចាន់ ភេទ ប្រុសអាយុ៣៥ឆ្នាំ ជនជាតិ ខ្មែរនៅខណ្ឌកំបូលរាជធានីភ្នំពេញបានជិៈម៉ូតូម៉ាក់ហុងដាឌ្រីមសេ១២៥ ពណ៌ខ្មៅពាក់ស្លាកលេខភ្នំពេញ១LQ-៥៧២១គោលបំណងទៅធ្វើអត្តសញ្ញាណប័ណ្ណនៅខេត្តកំពង់ធំ។នៅពេលធ្វើដំណើរមកដល់តាមមហាវិថីឈ្នះឈ្នះត្រូវក្រុមជនសង្ស័យធាក់ម៉ូតូផ្តួលកាប់ប្លន់យកម៉ូតូតែពុំបានសម្រេច។បន្ទាប់ពីធ្វើសកម្មភាពពីព្រឹកនៅវេលាយប់ថ្ងៃដដែលត្រូវបានកម្លាំងនគរបាលព្រហ្មទណ្ឌកំរិតស្រាលសហការជាមួយនគរបាលខណ្ឌជ្រោយចង្វារ ខណ្ឌពោធិ៍សែនជ័យនិងខណ្ឌដង្កោ ស្រាវជ្រាវឃាត់ខ្លួនបានជាបន្តបន់ចំនួន៦នាក់។ចំណែកបក្សពួកនៅសេសសល់សមត្ថកិច្ចនឹងបន្តស្រាវជ្រាវបង្ក្រាបឲ្យដល់ឬសគល់តែម្ដង។
បច្ចុប្បន្នជនសង្ស័យ និងវត្ថុតាងខាងលើ ត្រូវបានកម្លាំង ជំនាញការិយាល័យព្រហ្មទណ្ឌកំរិតស្រាល កសាងសំណុំរឿងបញ្ជូនទៅសាលាដំបូងរាជធានីភ្នំពេញ ដើម្បីចាត់ការតាមនីតិវិធី៕
ចែករំលែកព័តមាននេះ