តើអ្នកកំពុងជួបបញ្ហាពិបាកគេង ឬគេងមិនលក់មែនទេ? ដំណេកដែលមានគុណភាព គឺជាគន្លឹះនៃសុខភាព និងថាមពលប្រចាំថ្ងៃ។ យោងតាមមន្ទីរពេទ្យកាល់ម៉ែត នេះជាជំហានសំខាន់ៗដែលអ្នកគួរអនុវត្តដើម្បីដោះស្រាយវិបត្តិដំណេក៖
១. គោរពវដ្ដដំណេកឲ្យបានទៀងទាត់
- នេះជាចំណុចសំខាន់បំផុត! ព្យាយាមចូលគេង និងភ្ញាក់ពីដំណេកឲ្យបានទៀងពេលវេលាដដែលៗជារៀងរាល់ថ្ងៃ។ ទម្លាប់នេះមានឥទ្ធិពលជួយកំណត់សរីរាង្គរបស់យើងឲ្យដឹងច្បាស់ពីគុណភាពពេលភ្ញាក់ និងពេលសម្រាក។
២. កំណត់មុខងារគ្រែរបស់អ្នកឡើងវិញ
- ចំណាយពេលលើគ្រែ តែពេលយប់ដើម្បីសម្រាន្តតែប៉ុណ្ណោះ។ ចៀសវាងធ្វើការ, មើលទូរទស្សន៍ ឬលេងទូរស័ព្ទយូរពេកពេលនៅលើគ្រែ ដើម្បីឲ្យខួរក្បាលភ្ជាប់គ្រែជាមួយនឹងការគេង។
៣. រៀបចំផ្លូវចិត្តមុនពេលឆ្លងចូលពិភពសុបិន
- ដំណេកគឺជាការឆ្លងកាត់ពីពិភពពិតទៅពិភពសុបិន។ ដូច្នេះ មួយម៉ោងមុនពេលចូលគេង ត្រូវបញ្ឈប់រាល់ការគិតស្មុគស្មាញ និងធ្វើកិច្ចការណាដែលប្រកបដោយភាពស្រមើស្រមៃ ឬស្ងប់ស្ងាត់ដូចជា៖
- អានសៀវភៅដែលមិនតម្រូវឲ្យគិតច្រើន។
- ស្ដាប់ភ្លេងដែលមានលក្ខណៈស្រទន់ និងបន្ធូរអារម្មណ៍។
៤. ហាត់ប្រាណពេលរសៀលជាជំនួយ
- ការហាត់ប្រាណក្នុងចន្លោះពេល ៥ ឬ ៦ ម៉ោងមុនពេលចូលគេង អាចជួយសម្រួលដល់ការលង់លក់របស់អ្នកបានយ៉ាងល្អ។ (គួរចៀសវាងការហាត់ប្រាណខ្លាំងពេកជិតពេលគេង)។
៥. ងូតទឹកដើម្បីបន្ថយកម្ដៅខ្លួន
- ការងូតទឹកក្ដៅឧណ្ហៗ ១ ឬ ២ ម៉ោងមុនពេលសម្រាន្ត អាចជួយបានផងដែរ ដោយសារវាជួយបន្ថយកម្ដៅខ្លួនរបស់យើង ដែលជាសញ្ញាមួយជួយរាងកាយឲ្យដឹងថាដល់ពេលសម្រាក។
៦. រៀបចំបរិយាកាសជុំវិញខ្លួនឲ្យល្អឥតខ្ចោះ
- បរិយាកាសជុំវិញខ្លួនគឺទាក់ទងខ្លាំងនឹងគុណភាពដំណេក។ ត្រូវប្រាកដថាបន្ទប់គេងរបស់អ្នកមានលក្ខណៈ៖
- កម្ដៅសមរម្យ (មិនក្ដៅ ឬត្រជាក់ពេក)
- សំឡេងស្ងប់ស្ងាត់
- ពន្លឺងងឹតល្អ
៧. គ្រប់គ្រងកត្តាចំណីអាហារ
- អាហារពេលល្ងាចគួរតែជាអាហារស្រាលៗ ដែលអាចជួយដល់ការគេង។
- ត្រូវជៀសវាងដាច់ខាតនូវការពិសាជាតិស្រា, កាហ្វេ, និងបារី មុនពេលចូលគេង ព្រោះសារធាតុទាំងនេះនឹងរំខានដល់វដ្ដដំណេករបស់អ្នក៕
ចែករំលែកព័តមាននេះ