លោក ប្រាក់ សុខុន បានអោយដឹងថា នៅក្នុងសេចក្តីព្រាងនៃកិច្ចព្រមព្រៀងសន្តិភាព កម្ពុជានិងថៃបានឯកភាពគ្នា ស្តារទំនាក់ទំនងការទូតអោយវិលមកដូចធម្មតា រួមគ្នា សហការគ្នា ប្រឆាំងឧក្រិដ្ឋកម្មឆ្លងដែនពិសេស…
លោក ប្រាក់ សុខុន បានអោយដឹងថា នៅក្នុងសេចក្តីព្រាងនៃកិច្ចព្រមព្រៀងសន្តិភាព កម្ពុជានិងថៃបានឯកភាពគ្នា ស្តារទំនាក់ទំនងការទូតអោយវិលមកដូចធម្មតា រួមគ្នា សហការគ្នា ប្រឆាំងឧក្រិដ្ឋកម្មឆ្លងដែនពិសេស online scams ដែលជាបញ្ហាធំរបស់ប្រទេសយើងទាំងពីរ ការរួមគ្នាបោសសម្អាតមីនតាមព្រំដែន ការដកអាវុធធុនធ្ងន់ពីព្រំដែន ទៅកាន់មូលដ្ឋានកងទ័ពវិញ ដើម្បីកាត់បន្ថយភាពតានតឹងតាមតំបន់ព្រំដែន និងឯកភាពគ្នាដោះស្រាយបញ្ហាព្រំដែនដោយសន្តិវិធី ការគោរពគោលការណ៍មិនប្រើកម្លាំងដើម្បីដោះស្រាយជម្លោះ។
លោក ប្រាក់សុខុន រដ្ឋមន្ត្រីការបរទេសកម្ពុជាបានអោយដឹងថា តាមរយ:កិច្ចព្រមព្រៀងសន្តិភាពដែលសម្រេចបានក្នុងកិច្ចប្រជុំ នាថ្ងៃទី១៧ តុលា នៅម៉ាឡេស៊ីនោះ ភាគីថៃក៏បានយល់ព្រមដោះលែងទាហានកម្ពុជា១៨នាក់ ដែលថៃបានចាប់ខ្លួន និងបច្ចុប្បន្នស្ថិតក្នុងការគ្រប់គ្រងរបស់ខ្លួន។
កម្ពុជានិងថៃបានសម្រេចលើឯកសារមួយដែលអាចហៅថា កិច្ចព្រមព្រៀងសន្តិភាព បន្ទាប់ពីមានកិច្ចប្រជុំមួយនៅម៉ាឡេស៊ី កាលពីថ្ងៃទី១៧ ខែតុលា រវាងរដ្ឋមន្ត្រីកាបរទេសកម្ពុជានិងថៃ ដោយមានរដ្ឋមន្ត្រីការបរទេសម៉ាឡេស៊ី និងមន្ត្រីជាន់ខ្ពស់អាមេរិកអ្នកសម្របសម្រួល។
នេះបើយោងតាមរដ្ឋមន្ត្រីកាបរទេសកម្ពុជា លោក ប្រាក់ សុខុន បានប្រាប់ទូរទស្សន៍ជាតិកម្ពុជាកាលពីថ្ងៃទី១៨ ខែតុលា នៅពេលដែលលោកបានត្រឡប់មកពីកិច្ចប្រជុំនៅម៉ាឡេស៊ី។
លោករដ្ឋមន្ត្រីសង្ឃឹមថា ឯកសារនេះនឹងត្រូវបានចុះហត្ថលេខាដោយនាយករដ្ឋមន្ត្រីប្រទេសកម្ពុជានិងថៃ ដោយមានលោកដូណាល់ត្រាំនឹងចូលរួមជាសាក្សី និងនាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម ជាម្ចាស់ផ្ទះ ។
ការចុះហត្ថលេខានេះ នឹងត្រូវធ្វើឡើងនៅពេលដែលមេដឹកនាំអាស៊ាន លោកដូណាល់ត្រាំ និង មេដឹកនាំជាច្រើនប្រទេសទៀត នឹងចូលរួមកិច្ចប្រជុំកំពូលអាស៊ានពីថ្ងៃទី២៦ ទៅ២៨ខែតុលា៕
ចែករំលែកព័តមាននេះ