បរទេស ៖ តើលោកអ្នកនៅចងចាំហេតុការណ៍ប្រផ្នូលដ៏ចម្លែកដែលមានត្រីសាឌីនរាប់លានក្បាលហែលឡើងគោកនៅឯឆ្នេរសមុទ្រដែនកោះ Mindanao ភាគខាងត្បូងប្រទេសហ្វីលីពីន កាលពីថ្ងៃទី៧ ខែមករា ឆ្នាំ២០២៤ កន្លងទៅថ្មីៗទេ? ហេតុការណ៍នោះ…
បរទេស ៖ តើលោកអ្នកនៅចងចាំហេតុការណ៍ប្រផ្នូលដ៏ចម្លែកដែលមានត្រីសាឌីនរាប់លានក្បាលហែលឡើងគោកនៅឯឆ្នេរសមុទ្រដែនកោះ Mindanao ភាគខាងត្បូងប្រទេសហ្វីលីពីន កាលពីថ្ងៃទី៧ ខែមករា ឆ្នាំ២០២៤ កន្លងទៅថ្មីៗទេ?
ហេតុការណ៍នោះ បង្កើតឱ្យមានការព្រួយបារម្ភថា ត្រីទាំងនេះមានញាណពិសេស អាចដឹងមុនពីហេតុការណ៍គ្រោះមហន្តរាយធម្មជាតិ ហើយ២ថ្ងៃក្រោយមក ក៏កើតមានគ្រោះរញ្ជួយដីនៅតំបន់នោះតែម្ដង។
តែអ្វីដែលកត់សម្គាល់ថែមទៀត ទាំងនៅក្នុងខែមករា និងខែកុម្ភៈ ឆ្នាំ២០២៤ ប្រទេសហ្វីលីពីនបានកើត និងកំពុងពើបប្រទះទៅនឹងគ្រោះមហន្តរាយធម្មជាតិធ្ងន់ធ្ងរជាបន្តបន្ទាប់ ។ ជាក់ស្តែងនៅឯដែនកោះមីនដាណាវ ភាគខាងត្បូងប្រទេសហ្វីលីពីន ដែលមានហ្វូងត្រីរាប់លានក្បាលហែលឡើងឆ្នេរនោះ កំពុងរងការវាយប្រហារយ៉ាងដំណំពីគ្រោះទឹកជំនន់ និងការបាក់ដីដ៏ខ្លាំងក្លា ហើយតំបន់ដែលរងគ្រោះធ្ងន់ធ្ងរជាងគេគឺទីក្រុង Davao ។
របាយការណ៍បច្ចុប្បន្ន គិតត្រឹមព្រឹកថ្ងៃទី៥ ខែកុម្ភៈ ឆ្នាំ២០២៤ យ៉ាងហោចណាស់ មនុស្ស១៦នាក់ត្រូវបានរាយការណ៍ថាបានស្លាប់ច្រើននាក់ទៀតបាត់ខ្លួន បន្ទាប់ពីភ្លៀងធ្លាក់យ៉ាងគំហុកវាយលុកផ្នែកជាច្រើននៃកោះមីនដាណាវ ដែលជាកោះធំទីពីររបស់ហ្វីលីពីន បណ្ដាលឱ្យមានទឹកជំនន់ និងការរអិលបាក់ដីជាច្រើនកន្លែង ។ គ្រោះធម្មជាតិនេះ បង្កឱ្យមានប៉ះពាល់ដល់ប្រជាជនហ្វីលីពីនជាង១២ម៉ឺនគ្រួសារ ឬស្មើនឹងមនុស្សកន្លះលាននាក់ ហើយបានបំផ្លេចបំផ្លាញផ្ទះសម្បែង និងផលដំណាំរាប់សិបហិកតា ។
មន្ត្រីគ្រោះមហន្តរាយបានប្រាប់ AFP ថា ប្រតិបត្តិការស្វែងរក និងជួយសង្គ្រោះត្រូវបានធ្វើឡើងយ៉ាងយកចិត្តទុកដាក់ ហើយជំនួយស្បៀង និងទឹក ត្រូវបានមន្ត្រីនាំទៅចែកចាយដល់អ្នកស្រុកដែលរងផលប៉ះពាល់ក្នុងតំបន់រងគ្រោះនៅឯជម្រកសុវត្ថិភាព។ អ្នកស្រុកប្រើក្បូនជាមធ្យោបាយធ្វើដំណើរ បន្ទាប់ពីផ្លូវភាគច្រើនត្រូវបានជន់លិច និងស្ពានជាច្រើនត្រូវបានបំផ្លាញ។
យ៉ាងណាក៏ដោយ ការវាយតម្លៃការខូចខាតនឹងធ្វើឡើងដោយអង្គភាពរដ្ឋាភិបាលក្នុងតំបន់តាមរយៈការកោះប្រជុំបូកសរុបរបាយការណ៍ ហើយតាមរយៈកិច្ចប្រជុំនេះ អាជ្ញាធរនឹងកំណត់ពីទំហំនៃការខូចខាត ទាំងវិស័យកសិកម្ម ហេដ្ឋារចនាសម្ព័ន្ធ ជីវភាពរស់នៅ និងទ្រព្យសម្បត្តិផ្សេងៗទៀត ព្រមទាំងកំណត់ពីតម្រូវការរបស់ជនរងគ្រោះក្រោយពីទឹកជំនន់ស្រុកចុះ ។
អ្នកនាំពាក្យទីភ្នាក់ងារគ្រោះមហន្តរាយអះអាងថា ប្រទេសហ្វីលីពីនជាប់ចំណាត់ថ្នាក់ក្នុងចំណោមប្រទេសដែលងាយរងគ្រោះបំផុតចំពោះផលប៉ះពាល់នៃការប្រែប្រួលអាកាសធាតុ។ អ្នកស្រុកមួយរូបក្នុងតំបន់រងគ្រោះអះអាងថា «តាំងពីកើតមក គាត់មិនដែលជួបហេតុការណ៍ភ្លៀងធ្លាក់ខ្លាំងបន្តបន្ទាប់បែបនេះពីមុនមកទេ» ។ ក្រៅពីទឹកជំនន់និងការរអិលបាក់ដី ពលរដ្ឋហ្វីលីពីន កំពុងត្រូវបានព្រមានឱ្យបានបន្តប្រុងប្រយ័ត្ន បន្ទាប់ពីការផ្ទុះដ៏ខ្លាំងមួយបានកក្រើកសារជាស្មីនៅឯភ្នំភ្លើង Mayon កាលពីរសៀលថ្ងៃអាទិត្យ ទី០៤ ខែកុម្ភៈ។ ភ្នំភ្លើងដ៏ធំសម្បើមនេះ ធ្លាប់ផ្ទុះនិងវាយប្រហារបណ្តាលឱ្យអ្នក៧៥,០០០នាក់ត្រូវបានជម្លៀសកាលពីឆ្នាំ២០១៨កន្លងទៅ ។
វិទ្យាស្ថានភ្នំភ្លើង និងរញ្ជួយដីហ្វីលីពីន បានបញ្ជាក់ថា ការបំភាយកំដៅរបស់ភ្នំភ្លើង Mayon មានរយៈពេល ១៦៩វិនាទី ដោយបង្កើតឱ្យមានសំឡេងផ្ទុះហើយខ្ទាតដុំថ្ម និងផេះលើអាកាសកម្ពស់ ១២០០ម៉ែត្រ។ យោងតាមការស្ទង់មតិភូគព្ភសាស្ត្រសហរដ្ឋអាមេរិក (USGS) ភ្នំភ្លើង Mayon នៅតែស្ថិតក្នុងកម្រិតប្រកាសអាសន្ន ២ ហើយចំហាយផេះមានលទ្ធភាពនឹងជះដល់ទីប្រជុំជនដែលនៅក្បែរភ្នំភ្លើង ហើយអាជ្ញាធរណែនាំប្រជាពលរដ្ឋត្រូវនៅឱ្យនៅឆ្ងាយពីភ្នំភ្លើងយ៉ាងហោច៦គីឡូម៉ែត្រ ហើយអ្នកបើកយន្តហោះ គួរតែចៀសវាងការហោះហើរនៅជិតកំពូលភ្នំភ្លើង ។ អត្ថបទ៖ អោម ចែតច័ន្ទណារ៉ា
ចែករំលែកព័តមាននេះ