រាជធានីភ្នំពេញ ប្រទេសកម្ពុជា (៥ មេសា ២០១១) ៖ ធនាគារអភិវឌ្ឍន៍អាស៊ី និងរដ្ឋាភិបាលជប៉ុន នឹងជួយដល់សហគមន៍ក្រីក្ររស់នៅតាមទីជនបទនៅភាគកណ្តាលប្រទេសកម្ពុជា ដើម្បីបង្កើតនូវអាជីវកម្មតូចៗប្រកបដោយនិរន្តរភាព ដែលអាចទាញប្រយោជន៍កែលម្អបណ្តាញផ្លូវថ្នល់យ៉ាងឆាប់រហ័សនៅក្នុងប្រទេស ។ លោកបណ្ឌិត ថោង ខុន រដ្ឋមន្ត្រីក្រសួងទេសចរណ៍ តំណាងឱ្យរាជរដ្ឋាភិបាលកម្ពុជា
រាជធានីភ្នំពេញ ប្រទេសកម្ពុជា (៥ មេសា ២០១១) ៖ ធនាគារអភិវឌ្ឍន៍អាស៊ី និងរដ្ឋាភិបាលជប៉ុន នឹងជួយដល់សហគមន៍ក្រីក្ររស់នៅតាមទីជនបទនៅភាគកណ្តាលប្រទេសកម្ពុជា ដើម្បីបង្កើតនូវអាជីវកម្មតូចៗប្រកបដោយនិរន្តរភាព ដែលអាចទាញប្រយោជន៍កែលម្អបណ្តាញផ្លូវថ្នល់យ៉ាងឆាប់រហ័សនៅក្នុងប្រទេស ។ លោកបណ្ឌិត ថោង ខុន រដ្ឋមន្ត្រីក្រសួងទេសចរណ៍ តំណាងឱ្យរាជរដ្ឋាភិបាលកម្ពុជា និងលោក Putu Kamayana នាយកធនាគារអភិវឌ្ឍន៍អាស៊ីប្រចាំប្រទេសកម្ពុជា បានចុះហត្ថលេខាលើលិខិតព្រមព្រៀងសម្រាប់គម្រោង «បង្កើនលទ្ធភាពទទួលបានទីផ្សារសម្រាប់ប្រជាពលរដ្ឋក្រីក្រ នៅភាគកណ្តាលរបស់ប្រទេសកម្ពុជា» ។ លោក Hideaki Matsuo លេខាទីមួយ និងជាប្រធានផ្នែកសេដ្ឋកិច្ច និងជំនួយអភិវឌ្ឍន៍ផ្លូវការរបស់ស្ថានទូតជប៉ុនប្រចាំនៅប្រទេសកម្ពុជា ក៏បានចូលរួមក្នុងពិធីចុះហត្ថលេខានេះផងដែរ ។
គម្រោង ក្នុងទឹកប្រាក់១,៩លានដុល្លារសហរដ្ឋអាមេរិក ដែលជាជំនួយឥតសំណងពីមូលនិធិជប៉ុនសម្រាប់ការកាត់បន្ថយភាពក្រីក្រ និងត្រួតពិនិត្យដោយធនាគារអភិវឌ្ឍន៍អាស៊ី នឹងផ្តល់ការបណ្តុះបណ្តាលជំនាញ ក៏ដូចជាការគាំទ្រដល់ការផលិត និងការផ្សព្វផ្សាយទីផ្សារសម្រាប់ផលិតផលសិប្បកម្ម និងអាហារក្នុងមូលដ្ឋាន។ គម្រោងនេះមានគោលបំណងផ្តល់ផលចំណេញដល់ប្រជាពលរដ្ឋប្រមាណ១២.០០០គ្រួសារនៅក្នុងភូមិចំនួន១១ ដែលមានទីតាំងជិតប្រាសាទសំបូរព្រៃគុក កសាងនៅសតវត្សទី៧ ដែលត្រូវបានត្រៀមបម្រុងដើម្បីក្លាយជាតំបន់បេតិកភណ្ឌពិភពលោក ។ គំនិតផ្តួចផ្តើមនេះកំពុងត្រូវបានអនុវត្តស្របគ្នាជាមួយនឹងគម្រោងធនាគារអភិវឌ្ឍន៍អាស៊ីមួយទៀត ដែលកំពុងកែលម្អផ្លូវជនបទប្រវែងជាង៥០០គីឡូម៉ែត្រ ក្នុងនោះមានផ្លូវភ្ជាប់ពីតំបន់ប្រាសាទនេះ ជាមួយនឹងផ្លូវជាតិភាគខាងជើង និងខាងត្បូងរបស់ប្រទេស ។
លោកPutu Kamayana នាយកធនាគារអភិវឌ្ឍន៍អាស៊ីប្រចាំកម្ពុជា មានប្រសាសន៍ថា «លក្ខណៈពិសេសសំខាន់មួយរបស់គម្រោងនេះ គឺវានឹងផ្តល់ជាគំរូមួយពីរបៀបដែលសហគមន៍ក្រីក្ររស់នៅតាមបណ្តោយផ្លូវជនបទដែលទើបកែលម្អថ្មី អាចបង្កើតអាជីវកម្មតូចៗ ដែលបង្ហាញថាការតភ្ជាប់បណ្តាញបាននាំមកនូវកំណើនផលចំណេញ» ។
បន្ថែមពីលើការបណ្តុះបណ្តាលប្រជាពលរដ្ឋ ១.៥០០នាក់ ដើម្បីអាចរកការងារធ្វើបាននៅតាមសហគ្រាសខ្នាតតូចនិងខ្នាតតូចបំផុត ទីផ្សារលក់ផលិតផលសិប្បកម្ម និងផលិតផលនានា ដែលផលិតក្នុងមូលដ្ឋាន នឹងត្រូវបង្កើតឡើងនៅជិតប្រាសាទសំបូរព្រៃគុក ហើយមជ្ឈមណ្ឌលផ្សព្វផ្សាយ និងតាំងពិព័រណ៍ នឹងត្រូវបង្កើតឡើងនៅក្នុងខេត្តសៀមរាប និងរាជធានីភ្នំពេញ ដើម្បីតាំងបង្ហាញផលិតផលតាមតំបន់ នៅតាមទីផ្សារក្នុងស្រុក និងសម្រាប់ភ្ញៀវទេសចរបរទេស ។ សេវាគាំទ្រអាជីវកម្មនឹងត្រូវបានផ្តល់ ហើយធនាគារសន្សំតាមភូមិ នឹងត្រូវបានពង្រឹងដើម្បីផ្តល់លទ្ធភាពឱ្យប្រជាពលរដ្ឋក្រីក្រអាចទទួលបានកម្ចីតូចៗ ។ គម្រោងនេះមានគោលបំណងធានាឱ្យស្ត្រីអាចចូលរួមបានពេញលេញនៅក្នុងគ្រប់សកម្មភាពទាំងអស់ ដោយសារគេរំពឹងថាមានអ្នកទទួលផលយ៉ាងហោចណាស់៦០%គឺជាស្ត្រី។ គម្រោងក៏បំពេញបន្ថែមសកម្មភាពផ្សេងៗទៀតដែលកំពុងគាំទ្រដោយសាកលវិទ្យាល័យ Waseda នៅសំបូរព្រៃគុក ។
រដ្ឋាភិបាល និងអ្នកទទួលផលពីគម្រោង នឹងចូលរួមបដិភាគគិតជាសមមូលប្រមាណ ១៨៤.២០០ដុល្លារ សម្រាប់ការចំណាយសរុបរបស់គម្រោងចំនួន២.០៩៣.០៤០ដុល្លារ ។ ក្រសួងទេសចរណ៍ គឺជាទីភ្នាក់ងារប្រតិបត្តិ សម្រាប់គម្រោងនេះដែលនឹងអនុវត្តពីឆ្នាំ២០១១ ដល់២០១៤ ។ មូលនិធិជប៉ុនសម្រាប់ការកាត់បន្ថយភាពក្រីក្រ គឺជាកម្មវិធីផ្តល់ជំនួយឥតសំណងគ្មានលក្ខខណ្ឌ ដែលត្រូវបានបង្កើតឡើងដោយរដ្ឋាភិបាលជប៉ុន និងធនាគារអភិវឌ្ឍន៍អាស៊ី នៅក្នុងខែឧសភា ឆ្នាំ២០០០ ។ ពីការចូលរួមវិភាគទានដំបូងចំនួន៩០លានដុល្លារ មូលនិធិនេះបានកើនឡើងដល់៤៤៥លានដុល្លារ ។ មូលនិធិនេះផ្តល់លទ្ធភាពឱ្យប្រជាពលរដ្ឋក្រីក្រ និងងាយរងគ្រោះជាងគេនៅក្នុងសង្គម អាចបង្កើនសមត្ថភាពជួយខ្លួនឯង និងបង្កើតចំណូល ។
ធនាគារអភិវឌ្ឍន៍អាស៊ី ដែលមានការិយាល័យនៅក្នុងទីក្រុងម៉ានីល ប្តេជ្ញាចិត្តកាត់បន្ថយ ភាពក្រីក្រនៅអាស៊ី និងប៉ាស៊ីហ្វិក តាមរយៈការជំរុញកំណើនសេដ្ឋកិច្ចតាមបែបចូលរួម កំណើនដែលធានានិរន្តរភាពបរិស្ថាន និងសមាហរណកម្មថ្នាក់តំបន់ ។ បង្កើតឡើងនៅក្នុងឆ្នាំ១៩៦៦ ធនាគារអភិវឌ្ឍន៍អាស៊ីជាកម្មសិទ្ធិរបស់សមាជិកចំនួន៦៧ប្រទេស ដែលក្នុងនោះមាន៤៨ប្រទេសមកពីតំបន់ ។ នៅឆ្នាំ២០១០ ធនាគារអភិវឌ្ឍន៍អាស៊ីបានអនុម័តការផ្តល់ហិរញ្ញប្បទាន និងសហហិរញ្ញប្បទានសរុបចំនួន១៧,៥១ពាន់លានដុល្លារអាមេរិក ៕
ចែករំលែកព័តមាននេះ