កីឡាការិនីលំដាប់ទី១ពិភពលោកវិចតូរីយ៉ា អាហ្សារិនកាកំពុងសម្លឹងរកពានជើងឯកជាថ្មីម្តងទៀតក្នុងរដូវកាលខណៈកាលពីថ្ងៃទី២៦មេសានាងទទួលបានជោគជ័យនៅក្នុងកម្មវិធីប្រកួត Porsche Tennis Grand Prix ។ ព្រឹត្តិការណ៍ប្រកួតនេះរៀបចំធ្វើនៅទី
កីឡាការិនីលំដាប់ទី១ពិភពលោកវិចតូរីយ៉ា អាហ្សារិនកាកំពុងសម្លឹងរកពានជើងឯកជាថ្មីម្តងទៀតក្នុងរដូវកាលខណៈកាលពីថ្ងៃទី២៦មេសានាងទទួលបានជោគជ័យនៅក្នុងកម្មវិធីប្រកួត Porsche Tennis Grand Prix ។ ព្រឹត្តិការណ៍ប្រកួតនេះរៀបចំធ្វើនៅទីក្រុង Stuttgartប្រទេសអាល្លឺម៉ង់ ។
អាហ្សារិនកាទទួលបានជ័យជម្នះបន្ទាប់ពីគូប្រកួតរបស់ខ្លួនគឺកីឡាការិនីអាល្លឺម៉ង់អ៊ែនឌ្រា ប៉េតកូវិចរងរបួសដកខ្លួនទាំងពាក់កណ្តាលប្រកួត។ ខណៈការប្រកួតកំពុងតែដំណើរក្នុងសិតទី២ជាមួយនឹងលទ្ធផល៤-៤ នាងប៉េតគូវិចក៏គ្រេចកជើងស្តាំ។ នាងមិនត្រឹមតែមិនអាចបន្តការប្រកួតបានទេ តែថែមទាំងមិនអាចដើរដេញពីទីលានដោយខ្លួនឯងបានទៀតផង។
ចំណែកលទ្ធផលនៃការប្រកួតគូផ្សេងទៀត កីឡាការិនីអាល្លឺម៉ង់ Angelique Kerberបានយកឈ្នះកីឡាការិនីដាណឺម៉ាកការ៉ូលីន វ៉ូនីអាកគីក្នុងលទ្ធផល៦-១និង៦-២។ នេះជាលើកទី២ហើយដែលនាង Kerberបំបាក់នាងវ៉ូនីអាកគីសម្រាប់ខែនេះ។ Mona Barthel ដែលជាមិត្តរួមជាតិរបស់នាងKerberក៏បានឆ្លងចូលទៅវគ្គបន្ទាប់ផងដែរក្រោយពីបានយកឈ្នះកីឡាការិនីបារាំងម៉ារីយ៉ុង បាតូលីក្នុងលទ្ធផល៦-៣និង៦-១។ ឆ្នាំកន្លងមកនេះ នាងBarthel ថ្វីដ្បិតមិនទាន់យកឈ្នះពានជើងឯកក្របខណ្ឌធំណាមួយនៅឡើយ ប៉ុន្តែនាងធ្វើបានល្អគួរសមក្នុងអាជីពដោយនាងបានឡើងពីចំណាត់ថ្នាក់ទី១៩៦មកទី៣៥ ។ វាជាអ្វីមួយដែលកម្រមានកីឡាការិនីណាម្នាក់ធ្វើបាន។
រីឯនាងប៉េត្រា គ្វីតូវ៉ាដែលជាម្ចាស់ក្របខណ្ឌធំ Wimbledonវិញក៏បានសម្តែងក្តីរីករាយផងដែរ ពោលគឺបន្ទាប់ពីយកឈ្នះកីឡាការិនីអ៊ីតាលី Francesca Schiavone ក្នុងលទ្ធផល ៦-២និង៦-២ ខណៈដែលកីឡាការិនីចិនលីណាបានបំបាក់កីឡាការិនីអូបេគីស្ថានAkgul Amanmuradovaក្នុងលទ្ធផល៦-៤និង៦-៤ ។
ដោយឡែកក្នុងថ្ងៃជាមួយគ្នានោះដែរ នៅក្នុងទីក្រុងបាសេឡូណាប្រទេសអេស្ប៉ាញ កីឡាករលំដាប់ទី២ពិភពលោករ៉ាហ្វាអែល ណាដាល់និងកីឡាករអង់គ្លេសអ៊ែនឌី មូរេឈានចូលដល់វគ្គ១/៤ផ្តាច់ព្រ័ត្រនៃកម្មវិធី Bacelona Open។ ណាដាល់បានយកឈ្នះកីឡាករកូឡុំប៊ី Robert Farahក្នុងលទ្ធផល៦-២និង៦-៣។ នៅវគ្គបន្ទាប់គេនឹងប៉ះជាមួយកីឡាករស៊ែប៊ី Janko Tipsarevicដែលបានយកឈ្នះកីឡាករ Frederico Gilក្នុងលទ្ធផល៦-២និង៦-២។
ឯមូរេបានយកឈ្នះកីឡាករកូឡុំប៊ីម្នាក់ទៀត Santiago Giraldoក្នុងលទ្ធផល៦-១និង៦-២ ។ នៅវគ្គបន្ទាប់គេនឹងជួបប្រកួតជាមួយកីឡាករកាណាដា Milos Raonicដែលបានយកឈ្នះកីឡាករអេស្ប៉ាញ Nicolas Almagroក្នុងលទ្ធផល៦-៣និង៦-៣ ៕
ចែករំលែកព័តមាននេះ