ខេត្តសៀមរាប ៖ លោកង៉ូវ សេងកាក់ ប្រធានមន្ទីរទេសចរណ៍ខេត្តសៀមរាប តាមរយៈទូរស័ព្ទប្រាប់ឱ្យដឹងកាលពីព្រឹកថ្ងៃទី១៧ មេសា ២០១២ ថា បើប្រៀបធៀបទៅនឹងរយៈពេលដូចគ្នានាឆ្នាំ២០១១ឃើញថា ភ្ញៀវទេសចរបរទេសមានការកើនឡើង៤០%ស្មើនឹង៦៤ម៉ឺននាក់ ។
លោកប្រធានមន្ទីរទេសចរណ៍ខេត្តមានប្រសាសន៍ថា ចំនួនភ្ញៀវទេសចរបរទេសដែលកំពុងមានការកើនឡើងនៅក្នុងខេត្តគួរឱ្យចាប់អារម្មណ៍ បច្ចុប្បន្ននេះរួមមាន ១-ភ្ញៀវទេសចរជនជាតិកូរ៉េ ២-ជនជាតិវៀតណាម ៣-ជនជាតិជប៉ុន និង៤-ជនជាតិចិន ។ ក្រៅពីនេះភ្ញៀវទេសចរជនជាតិថៃក៏នាំគ្នាចូលមកទស្សនាកម្សាន្តនៅក្នុងតំបន់ទេសចរណ៍ខេត្តសៀមរាប ផងដែរ ជាពិសេសក្នុងឱកាសបុណ្យចូលឆ្នាំប្រពៃណីជាតិកន្លងទៅថ្មីៗនេះមានរាប់ម៉ឺននាក់ ។
យោងតាមរបាយការណ៍បូកសរុបលទ្ធផលការងារឆ្នាំ២០១១ និងលើកទិសដៅសម្រាប់អនុវត្តឆ្នាំ២០១២របស់អាជ្ញាធរខេត្ត ទាក់ទិនទៅនឹងការអភិវឌ្ឍរីកចម្រើនផ្នែកសេវាកម្មបម្រើវិស័យទេសចរណ៍ឱ្យដឹងថា រហូតមកទល់នឹងពេលនេះខេត្តសៀមរាបមានសណ្ឋាគារចំនួន១៣៨កន្លែងស្មើនឹង១០.៤០៧បន្ទប់ ផ្ទះសំណាក់ចំនួន២៣០កន្លែងស្មើនឹង៣.២០៧បន្ទប់ ភោជនីយដ្ឋានចំនួន១៥៥កន្លែង ហាងម៉ាស្សាចំនួន៤៧កន្លែង ហាងខារ៉ាអូខេចំនួន១៨កន្លែង រមណីយដ្ឋានចំនួន៣៥កន្លែង មណ្ឌលវាយកូនហ្គោលចំនួន៣កន្លែង មានអាកាសយានដ្ឋានសៀមរាប១ មានភ្នាក់ងារទេសចរណ៍ចំនួន១៤៩សាខា អស់សុពលភាព១៨សាខា និងមានមគ្គុទេ្ទសក៍ទេសចរចំនួន៣.៥៧២នាក់ ស្រី៤៥១នាក់ ។
របាយការណ៍ដដែលឱ្យដឹងថា ក្នុងឆ្នាំ២០១១ ភ្ញៀវទេសចរជាតិ-អន្តរជាតិដែលបានធ្វើដំណើរមកកម្សាន្តមានចំនួន៣.៣១១.៤២៦នាក់ បើប្រៀបធៀបទៅនឹងរយៈពេលដូចគ្នានៃឆ្នាំ២០១១ គឺមានការកើនឡើង១៥,៨០% ក្នុងនោះភ្ញៀវជនជាតិបរទេសមានចំនួន១.៦១០.០៧៦នាក់ កើនឡើង២១,៧០% បើប្រៀបធៀបរយៈពេលដូចគ្នានៃឆ្នាំ២០១០ មានចំនួន១.៣២២.៩៧១នាក់។ ភ្ញៀវក្នុងស្រុកមានចំនួនសរុប១.៧០១.៣៥០នាក់ កើនឡើង២១,៧០% ប្រៀបធៀបរយៈពេលដូចគ្នានៃឆ្នាំ២០១០ មានចំនួន១.៥៣៦.៤១៥នាក់ ។
ដោយឡែកតាមប្រភពព័ត៌មានពីតំបន់រមណីយដ្ឋាននានាក្នុងខេត្តដូចជារមណីយដ្ឋានភ្នំគូលែន ប្រាសាទបន្ទាយស្រី ក្បាលស្ពាន បារាយណ៍ទឹកថ្លា ប្រាសាទអង្គរវត្ត និងរមណីយដ្ឋានសិប្បនិមិត្តភូមិវប្បធម៌ជាដើម នាឱកាសបុណ្យចូលឆ្នាំប្រពៃណីជាតិ២០១២ រយៈពេល៣ថ្ងៃ គឺសុទ្ធសឹងកុះករទៅដោយមនុស្ស និងរថយន្តណែនណាន់តាន់តាប់ ក្រោមកិច្ចការពារសន្តិសុខ សុវត្ថិភាពយ៉ាងល្អប្រសើរពីសមត្ថកិច្ចគ្រប់ផ្នែករបស់អាជ្ញាធរខេត្ត៕
ចែករំលែកព័តមាននេះ