George Groves បានសម្តែងក្តីរីករាយយ៉ាងខ្លាំងបន្ទាប់ពីខ្លួនគេទទួលបានឱកាសឡើងវាយដណ្តើមខ្សែក្រវាត់ស្ថាប័ន WBOក្នុងប្រភេទទម្ងន់ Super-middleweightពីកីឡាករអាល្លឺម៉ង់ Robert Stieglitzនៅថ្ងៃទី៥ខែឧសភាខាងមុខ។ ការប្រកួតនេះនឹងត្រូវរៀបចំធ្វើនៅសង្វៀនស្ថិតក្នុងទីក្រុងErfurt ប្រទេសអាល្លឺម៉ង់។
សម្រាប់ Groves វ័យ២៤ឆ្នាំនិងជាម្ចាស់ជើងឯកប្រចាំអង់គ្លេសនិង Commonweathគឺជាកីឡាករដែលត្រូវឡើងវាយដណ្តើមខ្សែក្រវាត់តាមអាណត្តិ ហើយគេនឹងធ្វើដំណើរទៅកាន់ទឹកដីអាល្លឺម៉ង់ជាលើកទី១ក្នុងអាជីពប្រកួតលើកទី១៥របស់ខ្លួន។ Groves កាលពីខែមុនត្រូវឡើងប្រកួតការពារខ្សែក្រវាត់របស់ខ្លួនប្រឆាំងកីឡាករស្កុតលែន Kenny Andersonក្នុងទីក្រុងឡុង ប៉ុន្តែបានលុបចោលការប្រកួតនោះទៅវិញដោយទាញហេតុផលសំអាងមានរបួសខ្នង។
ថ្លែងតាមគេហទំព័ររបស់ខ្លួន Groves បានបញ្ជាក់ថា៖«នេះជាពេលវេលាមួយដែលខ្ញុំលេចមុខនៅលើឆាកអន្តរជាតិ។ ខ្ញុំរំភើបខ្លាំងណាស់ដែលទទួលបានឱកាសឡើងប្រកួតដណ្តើមខ្សែក្រវាត់ពិភពលោក។ ខ្ញុំសន្យាថា នឹងស្ពាយខ្សែក្រវាត់នេះមកអង់គ្លេសវិញឱ្យខាងតែបាន»។
ឆ្នាំ២០១១កន្លងមក Groves សម្រេចបាននូវសមិទ្ធផលយ៉ាងគាប់ប្រសើរដោយក្នុងខែឧសភាគេបានយកឈ្នះម្ចាស់មេដាយមាសអូឡាំពិក James DeGaleដណ្តើមបានខ្សែក្រវាត់អង់គ្លេសនិងCommonweathក្នុងប្រភេទទម្ងន់ Super-middleweight។ បន្ទាប់មកនៅសង្វៀន Wembley Arena នាខែវិច្ឆិកា គេឡើងប្រកួតការពារខ្សែក្រវាត់របស់ខ្លួនជាលើកដំបូងដោយបានវាយឱ្យគូប្រកួតគឺកីឡាករ Paul Smithឱ្យសន្លប់ក្នុងទឹកទី២។ សម្រាប់កីឡាករ Robert Stieglitzដែលធ្លាប់ចាញ់២លើកនៃការប្រកួតសរុប៤៣លើកបច្ចុប្បន្នមានអាយុ៣០ឆ្នាំហើយ។ នេះគឺជាលើកទី៦ដែលរូបគេឡើងប្រកួតការពារខ្សែក្រវាត់របស់ខ្លួន ៕
ចែករំលែកព័តមាននេះ