រាជធានីភ្នំពេញ ៖ ជំងឺរើមជាជំងឺមួយប្រភេទដែលតែងតែកើតទៅលើមនុស្សវ័យចំណាស់ ហើយជំងឺនេះបានបង្កឱ្យមានផលប៉ះពាល់ដល់អ្នកជំងឺផងដែរ ជាពិសេសធ្វើឱ្យមានការឈឺចាប់តែម្តង ។ ជាការពិតណាស់ជំងឺរើមបើសិនជាលោកអ្នកមិនបានធ្វើការព្យាបាលឱ្យបានទាន់ពេលវេលាទេនោះ ពេលដែលជាសះស្បើយវាអាចបន្សល់នូវភាពឈឺនៅកន្លែងដែលកើតនឹងធ្វើឱ្យលោកអ្នកពិបាកទៅថ្ងៃក្រោយ ។
លោកវេជ្ជបណ្ឌិតស្រេង រាសី ឯកទេសផ្នែករោគសើស្បែកនៃគ្លីនិកស្បែក និងសម្ជស្សស្រេង រាសី បានប្រាប់កោះសន្តិភាពឱ្យដឹងថា ខ្មែរយើងភាគច្រើនបានប្រើពាក្យថាជំងឺរើម គឺសំដៅទៅលើជំងឺដែលមានពងបែក ហើយមានលក្ខណៈជាកញ្ចុំៗនៅលើស្បែករបស់យើង ។ ជំងឺនេះវាបង្កឡើងដោយមេរោគម៉្យាងគឺវីរុស ដែលមានសភាពជាដុំកន្ទួលពងទឹកថ្លាជាកញ្ចុំៗនៅលើស្បែក ហើយវាអាចមាននៅតាមសរសៃប្រសាទនៃស្បែកមួយផ្នែកផងដែរ ។ អ្នកកើតជំងឺនេះសុទ្ធសឹងតែជាអ្នកដែលធ្លាប់កើតមានជំងឺអុតស្វាយ ព្រោះវាបង្កឡើងដោយវីរុសដូចគ្នា។
ជំងឺរើមមិនអាចកើតឡើងដោយសារតែស្បែកមិនមានអនាម័យនោះទេ ប៉ុន្តែវាអាចទាក់ទងនឹងភាពការពារខ្លួនរបស់មនុស្សយើងទៅវិញ។ យើងឃើញថា អ្នកដែលកើតជំងឺរើម ច្រើនតែកើតមាននៅក្នុងអំឡុងពេលដែលលោកអ្នកកើតមានជំងឺស្ត្រេស ឬអ្នកមានជំងឺទឹកនោមផ្អែម នៅពេលដែលគាត់ធ្វើការប្រើប្រាស់ថ្នាំមួយចំនួន ធ្វើឱ្យភាពការពារខ្លួនមានការថយចុះ និងច្រើនតែកើតនៅលើមនុស្សដែលមានវ័យចំណាស់ ឬក៏អ្នកជំងឺដែលកើតជំងឺ HIV ដែលធ្វើឱ្យប្រព័ន្ធការពារមានការថយចុះជាហេតុធ្វើឱ្យកើតមានជំងឺរើម ។
លោកវេជ្ជបណ្ឌិតបានបន្ថែមថា ចំពោះរោគសញ្ញាដែលគួរឱ្យចាប់អារម្មណ៍ដូចជាចេញជាពងទឹកថ្លា និងមានជាកញ្ចុំនៅលើស្បែករបស់លោកអ្នក ហើយអាចមានការឈឺចាប់កើតឡើងនៅពេលដែលវាលេចចេញនូវរោគសញ្ញាទាំងនេះ។ ចំពោះផលប៉ះពាល់វិញ ពេលដែលកើតមានជំងឺនេះ លោកអ្នកមិនបានធ្វើការព្យាបាលឱ្យបានទាន់ពេលវេលាអាចនឹងធ្វើឱ្យអ្នកឈឺចុកចាប់ខ្លាំង ទោះបីជាព្យាបាលហើយក៏នៅតែឈឺចុកចាប់ម្តងៗផងដែរ ។ ដូចនេះគួរតែព្យាបាលឱ្យបានទាន់ពេលវេលា ដើម្បីកុំឱ្យនៅសល់ការឈឺចាប់នេះ ។
នៅពេលដែលព្យាបាលជាសះស្បើយហើយ នោះ អាចនឹងមានស្នាមសម្លាក ពិសេសបើសិនជាជំងឺនេះ កើតនៅលើផ្ទៃមុខ ឬក៏កន្លែងណាមួយ ដែលមិនអាចបិតបាំងបាននោះ វាពិតជាធ្វើឱ្យមានផលប៉ះពាល់ខ្លាំងបំផុត ដែលទាក់ទងទៅនឹងសម្ជស្ស ។ លោកអ្នកត្រូវដឹងថា នៅពេលកើតមានជំងឺនេះ ភាពការពារខ្លួនអាចនឹងមានការថយចុះ ហើយងាយនឹងឆ្លងនូវមេរោគបំផុត ដូច្នេះគួរតែធ្វើយ៉ាងណាដើម្បីឱ្យខ្លួនមានសុខភាពល្អទើបជាការប្រសើរ ។
លោកវេជ្ជបណ្ឌិតបានបន្ថែមទៀតថា ចំពោះការព្យាបាល គឺនៅពេលដែលអ្នកជំងឺលេចចេញ នូវរោគសញ្ញាហើយគួរតែប្រញាប់រកការព្យាបាលឱ្យបានទាន់ពេលវេលា គឺគ្រូពេទ្យតម្រូវឱ្យថ្នាំលេបនៅក្នុងរយៈពេលពី៧ថ្ងៃទៅ១០ថ្ងៃ ។ តាមពិតទៅបើសិនជាជំងឺនេះ កើតមានក្នុងរយៈពេល៧២ម៉ោងនោះ ការលេបថ្នាំវាអាចមានប្រសិទ្ធភាពខ្ពស់ តែបើសិនជាជំងឺកើតលើសពី ៧២ម៉ោង ទោះបីជាទទួលទានថ្នាំក៏មិនសូវមានប្រសិទ្ធភាពនោះដែរ។
ដូចនេះដើម្បីការពារកុំឱ្យកើតមានជំងឺរើមនេះ គួរតែការពារសុខភាព ធ្វើយ៉ាងណាឱ្យមានសុខភាពល្អ។ លោកអ្នកត្រូវដឹងថា នៅពេលដែលយើងកើតមានជំងឺអុតស្វាយ លោកអ្នកអាចកើតមានជំងឺរើមរួចទៅហើយ ដូចនេះមានតែការថែរក្សាសុខភាពឱ្យបានល្អនោះទេ ដើម្បីកុំឱ្យជំងឺរើមកើតមាន ដែលធ្វើឱ្យលោកអ្នកប្រឈមទៅនឹងផលវិបាកជាច្រើន ៕
ចែករំលែកព័តមាននេះ