ជារៀងរាល់ឆ្នាំ ជំងឺគ្រុនឈាមបានឆក់យកអាយុជីវិតរបស់កុមាររាប់ម៉ឺននាក់ ដែលជាក្តីបារម្ភបំផុតសម្រាប់មាតាបិតាគ្រប់រូប ។ លោកសាស្ត្រាចារ្យ ង៉ាន់ ច័ន្ទថា នាយករងនៃមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ និងជានាយកកម្មវិធីជាតិប្រយុទ្ធនឹងជំងឺគ្រុនឈាមបានមានប្រសាសន៍ប្រាប់កោះសន្តិភាពឱ្យដឹងថា ជំងឺគ្រុនឈាម គឺជាជំងឺមួយប្រភេទដែលឆ្លងតាមរយៈការខាំរបស់មូសខ្លា ហើយមូសខ្លាគឺមាន២ប្រភេទ ៖
– ប្រភេទទី១៖ វាធ្វើការចម្លងទៅតាមទីក្រុង ហើយវាពងតាមពាងទឹក និងអាងទឹក នៅតាមសម្បកដូង និងតាមកន្លែងមួយចំនួនទៀតដែលមានទឹកដក់ ។
- ប្រភេទទី២ ៖ នៅតាមជនបទដូចជា តំបន់ព្រៃតាមគុម្ពប្ញស្សី រន្ធឈើ ធាងចេក ធាងត្នោតជាដើម ។ មូសទាំង២ប្រភេទនេះ គឺវាខាំនៅពេលថ្ងៃ ជាពិសេសគឺនៅពេលព្រឹកព្រលឹម និងអាចខាំនៅពេលយប់ខ្លះៗដែរ ។
ចំពោះរោគសញ្ញាដែលគួរឱ្យកត់សម្គាល់ដឹងថា លោកអ្នកនឹងកើតមានជំងឺគ្រុនឈាមមានដូចជា ៈ អាចមានការក្តៅខ្លួនខ្លាំង លើសពី៣៩អស្សាសេ ហើយការក្តៅខ្លួននេះ គឺវាអាចមានរយៈពេលពី២ថ្ងៃទៅ៧ថ្ងៃ ។ គួបផ្សំនឹងរោគសញ្ញាក្តៅខ្លួនខ្លាំងដែលជារោគសញ្ញាចម្បង វាអាចមានសញ្ញាផ្សេងទៀតដូចជា ហូរឈាមតាមភ្នាសកែវភ្នែក គឺភ្នែកមើលទៅក្រហមដូចជាចង់កើតជំងឺកញ្ជ្រិល ឬអាចមានស្នាមជាំឈាមនៅផ្នែកណាមួយនៃដងខ្លួនដែលមានពណ៌ខៀវក្រម៉ៅ ។ ជូនកាលអាចមានឈាមហូរតាមច្រមុះ ឬក៏តាមប្រដាប់រំលាយអាហារ ឧទាហរណ៍ដូចជាក្មេងខ្លះនៅពេលដែលងើបពីគេងមានឈាមកកនៅតាមអញ្ចាញធ្មេញ ឬពេលបន្ទោបង់អាចមានឈាមកកនៅតាមលាមកមានសភាពខ្មៅ និងស្អិតទៀតផង ។ គួបផ្សំនឹងរោគសញ្ញាទាំងនេះ អាចបណ្តាលឱ្យផ្ទៃមុខស្ងួត ហើយឡើងក្រហម ឬក៏ជួនកាលក្មេងធំអាចបង្ហាញឱ្យដឹងតាមរយៈការឈឺក្បាល ឬឈឺនៅតាមសាច់ដុំ សន្លាក់ដៃជើង ឬពេលខ្លះរួយភ្នែកនេះ គឺជារោគសញ្ញាដែលយើងអាចសន្និដ្ឋានបានថា កើតមានជំងឺគ្រុនឈាម ។
លោកវេជ្ជបណ្ឌិតបានបន្ថែមទៀតថា ជាទូទៅជំងឺរបស់បុគ្គលនីមួយៗមិនកំណត់នោះទេ យើងមិនអាចដឹងថា ម៉ោងប៉ុន្មានវាចាប់ផ្តើមឈឺឡើយដោយចៃដន្យ ដូចនេះបើសិនជាកុមារ ឬក៏បុគ្គលណាម្នាក់ក្តៅខ្លួនខ្លាំងនៅពេលយប់គឺត្រូវតែធ្វើការបញ្ចុះកម្តៅដោយប្រើថ្នាំប៉ារ៉ាសេតាម៉ុល ក្នុងរយៈពេល៤ទៅ៦ម៉ោងម្តង តែមិនអាចប្រើលើសកម្រិតបានទេ ព្រោះវាអាចបណ្តាឱ្យមានគ្រោះថ្នាក់ដល់ជីវិត ។ ត្រូវចៀសវាងកុំប្រើប្រាស់ថ្នាំអាស្ពឺរីន ហើយបើសិនជាយើងមិនដឹងថា អ្នកជំងឺកើតមានជំងឺគ្រុនឈាមនៅពេលដែលប្រើប្រាស់ថ្នាំប្រភេទអាស្ពឺរីននេះ បណ្តាលឱ្យបែកគ្រាប់ឈាម ដែលធ្វើឱ្យសភាពរបស់អ្នកជំងឺកាន់តែធ្ងន់ធ្ងរ ។ បើសិនជាលោកអ្នកប្រើប្រាស់់ថ្នាំប៉ារ៉ាសេតាម៉ុល ហើយកម្តៅនៅតែមិនថយចុះលោកអ្នកត្រូវយកកន្សែងជ្រលក់ទឹកត្រជាក់ ហើយគ្របដណ្តប់លើខ្លួនអ្នកជំងឺ ឬដាក់នៅក្លៀក ក្រលៀនដើម្បីបន្ថយកម្តៅ ។ លុះពេលព្រឹកឡើងលោកអ្នកត្រូវនាំអ្នកជំងឺទៅពិគ្រោះជាមួយគ្រូពេទ្យ នៅមណ្ឌលសុខភាព ឬមន្ទីរពេទ្យបង្អែកដែលនៅជិតលោកអ្នកបំផុត ។ ពលរដ្ឋមួយចំនួនតែងតែយល់ថា នៅពេលដែលកូនក្តៅខ្លួនបែរជាកោសខ្យល់ តែនេះអាចបណ្តាលឱ្យបែកគ្រាប់ឈាម ប៉ុន្តែយើងដឹងហើយថា នៅពេលណាដែលអ្នកជំងឺកើតមានជំងឺគ្រុនឈាម អាចមានរោគសញ្ញាចេញឈាមនៅតាមស្បែកដែលជាស្នាមកន្ទួលតូចៗដូចមូសខ្លាខាំ។ ដូចនេះបើសិនជាលោកអ្នកកោសខ្យល់គឺអាចធ្វើឱ្យសញ្ញាទាំងនេះបាត់ ជាហេតុធ្វើឱ្យពិបាកដល់គ្រូពេទ្យ ក្នុងការធ្វើរោគវិនិច្ឆ័យអ៊ីចឹងហើយបានគេហាមមិនឱ្យកោសខ្យល់ ។
ដូចនេះបើសិនជាមានរោគសញ្ញាដូចដែលបានរៀបរាប់ខាងលើនេះ លោកអ្នកដែលជាមាតាបិតា ឬអាណាព្យាបាលត្រូវតែប្រញាប់នាំអ្នកជំងឺមកព្យាបាលឱ្យបានទាន់ពេលវេលាមិនត្រូវពន្យាពេលទុកឱ្យលើសពី២ថ្ងៃនោះទេ ត្រូវប្រញាប់នាំទៅកាន់មន្ទីរ ទើបជាការប្រសើរចៀសវាងដាច់ខាតគឺធ្វើការព្យាបាលដោយខ្លួនឯង ឬព្យាបាលនៅកន្លែងដែលមិនមានជំនាញច្បាស់លាស់ ព្រោះវាអាចមានគ្រោះថ្នាក់ដល់អាយុជីវិត ៕
ចែករំលែកព័តមាននេះ