តាមការស្រាវជ្រាវមួយបានបង្ហាញថា បណ្តាស្ត្រីដែលមានរោគសញ្ញាមហារីកដោះអាចនឹងសង្គ្រោះឱ្យរួចផុតពីការស្លាប់បានប្រសិនជាពួកគេបង្កើនការទទួលទានបន្លែពណ៌បៃតង។
ការសិក្សាដ៏ធំមួយធ្វើឡើងនៅប្រទេសចិនបានរកឃើញពីទំនាក់ទំនងរវាងការប្រើប្រាស់ក្នុងកម្រិតខ្ពស់នៃពពួកបន្លែពណ៌បៃតងមានដូចជា ស្ពៃក្តោប និងខាត់ណាខៀវទៅនឹងការកាត់បន្ថយអត្រាស្លាប់ដោយជំងឺមហារីកដោះ។
ក្នុងការសិក្សា ក្រុមអ្នកវិទ្យាសាស្ត្រពិសោធន៍លើស្ត្រីមានរោគសញ្ញាមហារីកដោះប្រមាណ៥ពាន់នាក់ដោយចំណាយពេលអស់៥ឆ្នាំ។ ជាលទ្ធផលពួកគេរកឃើញថា បណ្តាស្ត្រីដែលទទួលទានបន្លែពណ៌បៃតងច្រើនអំឡុង៣ឆ្នាំដំបូងក្រោយពីកើតមហារីកដោះ អត្រាស្លាប់មានការថយចុះ។ ខណៈការប្រើប្រាស់បន្លៃពណ៌បៃតងត្រូវបានបង្កើន ឱកាសនៃការស្លាប់ដោយមហារីកដោះបានធ្លាក់មកត្រឹមចន្លោះ២២%ទៅ៦២% ។ ឯអត្រាប្រឈមនឹងជំងឺមហារីកដោះក៏បានថយចុះមកត្រឹមចន្លោះ២៧%ទៅ ៣៥%ផងដែរ។
ក្រុមអ្នកស្រាវជ្រាវបានចង្អុលបង្ហាញថា ទម្លាប់ទទួលទានបន្លែពណ៌បៃតងមានការខុសគ្នារវាងប្រជាជនចិននិងបណ្តាប្រជាជននៅបច្ចិមប្រទេស ។
វេជ្ជបណ្ឌិត Sara Nechutaអ្នកដឹកនាំការស្រាវជ្រាវមកពីសាកលវិទ្យាល័យ Vanderbilt Universityសហរដ្ឋអាមេរិកបាននិយាយថា៖«បន្លែពណ៌បៃតងដែលគេនិយមទទួលទានជាធម្មតានៅចិនរួមមាន ប្រភេទស្ពៃមើម ស្ពៃបូកគោ ស្ពៃតឿនិងបណ្តាបន្លែស្លឹកពណ៌បៃតងផ្សេងទៀត ខណៈខាត់ណាខៀវនិងប្រភេទស្ពៃក្តោបតូចៗ(brussels sprouts)មានការទទួលទានយ៉ាងទូលំទូលាយនៅបច្ចិមប្រទេសក៏ដូចជានៅសហរដ្ឋអាមេរិក។ បើនិយាយពីបរិមាណទទួលទានវិញ ស្ត្រីចិនមានកម្រិតខ្ពស់ជាង។ កម្រិតសមាសធាតុជីវសកម្មមានដូចជា isothiocyanatesនិង indolesគឺជាអ្នកដែលដើរតួនាទីយ៉ាងសកម្មបំផុតរបស់ប្រសិទ្ធភាពប្រឆាំងមហារីកនៃពពួកបន្លែពណ៌បៃតង»។
លោកវេជ្ជបណ្ឌិតបានបន្ថែមថា ការសិក្សាពីប្រសិទ្ធភាពរបស់បន្លៃបៃតងប្រឆាំងនឹងជំងឺមហារីកដោះនឹងត្រូវធ្វើក្នុងពេលអនាគតដោយវាស់កម្រិតសមាសធាតុជីវសកម្មដោយផ្ទាល់ ៕
ចែករំលែកព័តមាននេះ