រាជធានីភ្នំពេញ ៖ លោករដ្ឋមន្ត្រីក្រសួងការបរទេសអូស្ត្រាលី បប់ ខារ (Bob Carr) បានប្រកាសអំពីការផ្តល់ថវិកាបន្ថែមរបស់រដ្ឋាភិបាលអូស្ត្រាលីចំនួន១,៦១លានដុល្លារអូស្ត្រាលីដល់អង្គជំនុំជម្រះវិសាមញ្ញក្នុងតុលាការកម្ពុជា ក្រោយពីជំនួបមួយជាមួយ លោក សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី នៅទីក្រុងភ្នំពេញនាថ្ងៃទី២៦ មីនា កន្លងទៅនេះ ។
រាជធានីភ្នំពេញ ៖ លោករដ្ឋមន្ត្រីក្រសួងការបរទេសអូស្ត្រាលី បប់ ខារ (Bob Carr) បានប្រកាសអំពីការផ្តល់ថវិកាបន្ថែមរបស់រដ្ឋាភិបាលអូស្ត្រាលីចំនួន១,៦១លានដុល្លារអូស្ត្រាលីដល់អង្គជំនុំជម្រះវិសាមញ្ញក្នុងតុលាការកម្ពុជា ក្រោយពីជំនួបមួយជាមួយ លោក សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី នៅទីក្រុងភ្នំពេញនាថ្ងៃទី២៦ មីនា កន្លងទៅនេះ ។
លោកព្រឹទ្ធសមាជិក បប់ ខារ បានមានប្រសាសន៍ថា ប្រទេសអូស្ត្រាលី គឺជាអ្នកគាំទ្រអង្គជំនុំជម្រះវិសាមញ្ញក្នុងតុលាការកម្ពុជាដ៏យូរអង្វែង និងរឹងមាំមួយ ដែលការកាត់ទោសខ្មែរក្រហមកំពុងដំណើរការ ។ លោកព្រឹទ្ធសមាជិក បានមានប្រសាសន៍ផងដែរថា រួមទាំងការចូលរួមវិភាគទានលើកនេះ ការគាំទ្រផ្នែកហិរញ្ញវត្ថុរបស់អូស្ត្រាលីដល់អង្គជំនុំជម្រះវិសាមញ្ញក្នុងតុលាការកម្ពុជាបានកើនដល់១៨,៣លានដុល្លារអូស្ត្រាលី។
អូស្ត្រាលី គឺជាប្រទេសផ្តល់ជំនួយធំជាងគេលំដាប់ទី២ ចំពោះអង្គជំនុំជម្រះវិសាមញ្ញក្នុងតុលាការកម្ពុជា ។ ការងាររបស់អង្គជំនុំជម្រះវិសាមញ្ញក្នុងតុលាការកម្ពុជា មានសារសំខាន់បំផុត ដើម្បីធានាឱ្យបាននូវយុត្តិធម៌ជូនដល់ប្រជាពលរដ្ឋកម្ពុជា ដែលបានទទួលរងគ្រោះនៅក្នុុងរបបខ្មែរក្រហម។ អូស្ត្រាលី សូមស្វាគមន៍ចំពោះការបញ្ចប់ជាប្រវត្តិសាស្ត្រ កាលពីថ្ងៃទី៣ កុម្ភៈ ២០១២ លើសំណុំរឿងទី១ប្រឆាំងនឹង កាំង ហ្គេចអ៊ាវ ហៅ ឌុច អតីតប្រធានពន្ធនាគារដ៏អសោចនៃរបបខ្មែរក្រហម ដែលបញ្ជូនប្រជាជនកម្ពុជាប្រមាណ១៥.០០០នាក់ ទៅវាលពិឃាដទាំងនោះ ។
បច្ចុប្បន្ននេះ អង្គជំនុំជម្រះវិសាមញ្ញក្នុងតុលាការកម្ពុជាកំពុងយកចិត្តទុកដាក់លើសំណុំរឿងទី២ ដ៏សំខាន់ដែលប្រឆាំងនឹងអតីតថ្នាក់ដឹកនាំកំពូលនៃរបបខ្មែរក្រហមបីនាក់ ដែលកំពុងរស់រានមានជីវិតនៅឡើយ ក្នុងនោះរាប់បញ្ចូលទាំង នួន ជា ដែលជាបងធំទី២ នៃរបប ប៉ុល ពត ផងដែរ ។ ពួកគេត្រូវបានចោទប្រកាន់ពីបទឧក្រិដ្ឋកម្មសង្គ្រាម និងឧក្រិដ្ឋកម្មប្រឆាំងនឹងមនុស្សជាតិ ។
លោកសូមឱ្យអង្គជំនុំជម្រះវិសាមញ្ញក្នុងតុលាការកម្ពុជា បន្តភារកិច្ចឱ្យបានឆាប់រហ័សតាមដែលអាចធ្វើបាន ដើម្បីធានាឱ្យបាននូវទំនួលខុសត្រូវចំពោះអំពើដ៏សាហាវយង់ឃ្នងដែលប្រព្រឹត្តដោយខ្មែរក្រហម ។ ជាការពិតណាស់ ឯករាជ្យភាពរបស់តុលាការមានលក្ខណៈឧត្តុង្គឧត្តមណាស់ ហើយអង្គជំនុំជម្រះវិសាមញ្ញក្នុងតុលាការកម្ពុជាត្រូវតែដំណើរការដោយមិនមានការជ្រៀតជ្រែកពីខាងក្រៅ ។
ខ្មែរក្រហមបានកាន់កាប់ប្រទេសកម្ពុជាចាប់តាំងពីឆ្នាំ១៩៧៥ ដល់១៩៧៩ ។ យ៉ាងហោចណាស់មានមនុស្សចំនួន១លាន៦សែននាក់ ឬមួយភាគប្រាំនៃចំនួនប្រជាជនកម្ពុជាសរុបត្រូវបានជឿជាក់ថា បានស្លាប់បាត់បង់ជីវិតដោយសារតែគោលនយោបាយនៃរបបនេះ ។
ថវិកាបន្ថែមនេះ នឹងត្រូវផ្តល់ជូនដល់ភាគីទាំងពីរនៃតុលាការកូនកាត់មួយនេះ ក្នុងនោះ១លានដុល្លារផ្តល់ជូនភាគីអន្តរជាតិ និង៦១០.០០០ដុល្លារផ្តល់ជូនភាគីជាតិ ៕
ចែករំលែកព័តមាននេះ