រាជធានីភ្នំពេញ ៖ ជំងឺត្រអក គឺជាជំងឺមួយប្រភេទដែលតែងតែកើតនៅលើមនុស្សគ្រប់វ័យ ជាពិសេសគឺនៅតាមជនបទតែម្តង ។ ជំងឺនេះវាបង្កឱ្យមានផលប៉ះពាល់រំខានដល់អ្នកជំងឺយ៉ាងធ្ងន់ធ្ងរ គឺរមាស់រហូតដល់អេះចេញឈាម ប៉ុន្តែភាពរមាស់នេះ វាមិនបានធូរស្បើយនោះទេ បើសិនជាលោកអ្នកមិនបានព្យាបាលជាមួយគ្រូពេទ្យជំនាញ ។
លោកវេជ្ជបណ្ឌិតស្រេង រាសី ឯកទេសផ្នែករោគសើស្បែកនៃគ្លីនិកស្បែកនិងសម្ផស្ស ស្រេងរាសី បានប្រាប់ឱ្យដឹងថា ជំងឺត្រអកកើតឡើងដោយសារតែការរលាកកោសិកានៃស្បែក ធ្វើឱ្យស្បែកឡើងក្រាស និងរមាស់ខ្លាំង ទ្រាំមិនបានហើយអេះរហូតដល់ដាច់ចេញឈាម ។ ជំងឺនេះកើតឡើងដោយសារតែស្បែករបស់លោកអ្នកប្រតិកម្មទៅនឹងសារធាតុអ្វីមួយ ហើយសារធាតុទាំងនេះយើងមិនអាចកំណត់បានថាជាសារធាតុអ្វីឱ្យពិតប្រាកដនោះទេ អ្នកខ្លះមានប្រតិកម្មជាមួយគ្រឿងអលង្ការកាឡៃមួយចំនួន ដូចជា ក្រវិល ខ្សែដៃ ឬខ្សែ.ក ក្បាលខ្សែក្រវាត់ ជាដើម ។ ដូចនេះមនុស្សផ្សេងៗគ្នាអាចមានប្រតិកម្មជាមួយវត្ថុ ឬរបស់ផ្សេងៗគ្នា ហើយមានអ្នកខ្លះក៏អាចមានប្រតិកម្មជាមួយចំណីអាហារផងដែរ ។
លោកវេជ្ជបណ្ឌិតបានបន្ថែមទៀតថា ចំពោះរោគសញ្ញាដែលគួរឱ្យកត់សម្គាល់ថា ជំងឺត្រអកនេះគឺបន្ទាប់ពីលោកអ្នកប៉ះពាល់ជាមួយវត្ថុ ឬក៏សារជាតិអ្វីមួយដែលនាំឱ្យមានប្រតិកម្មតែវាមិនអាចលេចចេញជារោគសញ្ញាភ្លាមៗនោះទេ ប៉ុន្តែមិនយូរប៉ុន្មានវាក៏ធ្វើឱ្យស្បែកឡើងកន្ទួលរមាស់ ហើយឡើងក្រាស់ ។ ប៉ុន្តែភាពរមាស់នេះកាលណាលោកអ្នកអេះកាន់តែខ្លាំងអាចធ្វើឱ្យរមាស់កាន់តែខ្លាំងថែមទៀត ។ លើសពីនេះ គឺនៅពេលដែលលោកអ្នកទទួលទានអាហារផ្អាប់ ក៏អាចធ្វើឱ្យរមាស់កាន់តែខ្លាំងផងដែរ ។
បើនិយាយពីផលវិបាកវិញនោះ ជំងឺនេះពិតជារំខានខ្លាំងណាស់ដែលធ្វើឱ្យលោកអ្នកអេះរហូតដល់ចេញឈាម ពិបាកទ្រាំ ជាពិសេសវាក៏អាចធ្វើឱ្យខូចសោភ័ណភាពនៃស្បែកទៀតផង ទោះបីព្យាបាលជាក៏ដោយ ក៏នៅតែមានស្លាកស្នាមដែរ ។ ជំងឺនេះអាចធ្វើឱ្យខូច ឬងាប់កោសិកាស្បែក ដែលធ្វើឱ្យឆ្លងមេរោគអាចបង្កឱ្យក្តៅខ្លួនជាដើម ។
ចំណែកការព្យាបាលវិញ គឺមិនជាបញ្ហាធ្ងន់ធ្ងរនោះទេ ដោយគ្រាន់តែអ្នកជំងឺលាបក្រេម ឬក៏ចាក់ថ្នាំ បើសិនជាជំងឺនេះមានសភាពធ្ងន់ធ្ងរ។ យើងឃើញថា នៅតាមជនបទមួយចំនួនគេបានយកប្រេងម៉ាស៊ីន ប្រេងម៉ាសូតមកលាបដើម្បីព្យាបាល ប៉ុន្តែវាមិនអាចជាសះស្បើយបានទាំងស្រុងនោះទេ វាគ្រាន់តែធ្វើឱ្យស្បែកមានសំណើម ដែលអាចជួយកាត់បន្ថយការរមាស់បានមួយគ្រាប៉ុណ្ណោះ ។ ការធ្វើបែបនេះ គឺមិនត្រឹមត្រូវនោះទេ លោកអ្នកគួរតែមកជួបពិភាក្សាជាមួយគ្រូពេទ្យសើរស្បែក ទើបជាការប្រសើរ ។
ដូច្នេះដើម្បីការពារកុំឱ្យកើតមានជំងឺនេះលោកអ្នកត្រូវតែចៀសវាងចំពោះវត្ថុ ឬរបស់ប្រើប្រាស់ផ្សេងៗដែលនាំឱ្យរមាស់រហូតក្លាយជាជំងឺត្រអក ។ ជាពិសេសនោះ នៅពេលដែលលោកអ្នកមានដុំកន្ទួលនៅលើស្បែក លោកអ្នកគួរតែទៅជួបជាមួយគ្រូពេទ្យ ។ លើសពីនេះទៀត លោកអ្នកដែលកើតជំងឺត្រអក លោកអ្នកមិនត្រូវអេះខ្លាំងពេកទេ ព្រោះកាន់តែអេះខ្លាំងកាន់រមាស់ ៕
ចែករំលែកព័តមាននេះ