រាជធានីភ្នំពេញ ៖ គណៈកម្មាធិការអនុសាខាកាកបាទក្រហមកម្ពុជា ខណ្ឌប្ញស្សីកែវ កាលពីរសៀលថ្ងៃទី១៦ មីនា បាននាំអំណោយជាគ្រឿងឧបភោគបរិភោគ សម្ភារប្រើប្រាស់ និងថវិកាមួយចំនួនយកទៅឧបត្ថម្ភដល់គ្រួសារក្រីក្រគ្មានទីពឹង និងផ្ទុកមេរោគចំនួន៥គ្រួសារ រស់នៅមូលដ្ឋានសង្កាត់ច្រាំងចំរេះទី១ ខណ្ឌប្ញស្សីកែវ ។ ការនាំអំណោយចែកជូនក្នុងឱកាសនោះដឹកនាំដោយលោក ជា ពិសី ប្រធានគណៈកម្មាធិការអនុសាខាកាកបាទក្រហមខណ្ឌប្ញស្សីកែវ និងជាអភិបាលរងខណ្ឌប្ញស្សីកែវ ព្រមទាំងលោកស្រី កែវ ច័ន្ទស៊ុនណារី អនុប្រធានគណៈ កម្មាធិការអនុសាខាកាកបាទក្រហមខណ្ឌប្ញស្សីកែវ ។
អំណោយដែលនាំយកទៅចែកជូនក្នុងឱកាសនោះ ក្នុង១គ្រួសារទទួលបានអង្ករ២០គីឡូក្រាម មីចំនួន២កេស ធុងទឹកកក១ ចានស្រាក់១ កាធុន១ ត្រីខ៥កំប៉ុង ទឹកត្រី១យួរ ទឹកស៊ីអីុវ១យួរ ចានបាយ១ កំសៀវ១ ឆ្នាំង១ ចង្អើរ១ តង្កៀបចាប់ភ្លើង១ ជ្រញ់១ វែក២ ខ្ទះ១ ស្ករស១គីឡូក្រាម តែ២កញ្ចប់ និងថវិកា១០ម៉ឺនរៀល ។
លោក ជា ពិសី ប្រធានគណៈកម្មាធិការអនុសាខាកាកបាទក្រហមខណ្ឌប្ញស្សីកែវ បានពាំនាំនូវប្រសាសន៍ផ្តាំផ្ញើសាកសួរសុខទុក្ខពីសំណាក់លោកជំទាវកិត្តិព្រឹទ្ធបណ្ឌិត ប៊ុន រ៉ានីហ៊ុន សែន ប្រធានកាកបាទក្រហមកម្ពុជា ក៏ដូចសាខាកាកបាទក្រហមរាជធានីភ្នំពេញ ដែលជានិច្ចកាលលោកជំទាវតែងតែយកចិត្តទុកដាក់ពីប្រជារាស្ត្រងាយរងគ្រោះ ឬរងគ្រោះផ្សេងៗ និងប្រជារាស្ត្រទូទាំងប្រទេស ។ ដោយការយកចិត្តទុកដាក់ លោកជំទាវតែងណែនាំដល់មន្ត្រីកាកបាទក្រហមចុះសាកសួរសុខទុក្ខ និងនាំអំណោយចែកជូនប្រជាពលរដ្ឋដល់មូលដ្ឋាន ។
លោក ជា ពិសី បានបន្តទៀតថា កន្លងមកកាកបាទក្រហមខណ្ឌប្ញស្សីកែវ បំផុសចលនាដល់សប្បុរសជន មន្ត្រីរាជការ ព្រះសង្ឃក្នុងមូលដ្ឋាននាំអំណោយទៅចែកជូនប្រជារាស្ត្រក្រីក្រ ចាស់ជរាគ្មានទីពឹង គ្រួសារផ្ទុកមេរោគ ជាបន្តបន្ទាប់ ។ អំណោយទាំងនេះតិចតួចមែន តែវាអាចជួយសម្រួលដល់ការលំបាកបានមួយគ្រាដែរ ម៉្យាងទៀតវាបានបញ្ជាក់ពីការយកចិត្តទុកដាក់ពីថ្នាក់ដឹកនាំចំពោះបងប្អូនផងដែរ ។ លោក ជា ពិសី ក៏បានណែនាំបងប្អូនក្រីក្រ ឬអ្នកផ្ទុកមេរោគ កុំអស់សង្ឃឹមក្នុងជីវិត និងលេបថ្នាំពន្យារឱ្យបានទៀតទាត់ ព្រោះយើងនៅមានសម្តេចតេជោ ហ៊ុន សែន និងលោកជំទាវកិត្តិព្រឹទ្ធបណ្ឌិតតែងតែគិតគូរ និងយកចិត្តទុកដាក់ចំពោះបងប្អូនជានិច្ច ៕
ចែករំលែកព័តមាននេះ