រាជធានីភ្នំពេញ ៖ ទីលានបាល់ទាត់ប្រើប្រាស់ស្មៅសិប្បនិម្មិតលំដាប់ថ្នាក់អន្តរជាតិដំបូងគេបង្អស់ ដែលកើតមានឡើងនៅទីក្រុងភ្នំពេញ ក្នុងសង្កាត់ចតុមុខ ទល់មុខវិមានរដ្ឋសភាជាតិត្រូវបានគេចាត់ទុកថា ជាទីលានលេងកីឡា ដើម្បីសុខភាពផង និងដើម្បីផាសុកភាពផង ។ លោក អោក សំណាង អ្នកបច្ចេកទេសក្នុងការរៀបចំទីលានបាល់ទាត់ស្មៅសិប្បនិម្មិតនេះ បានមានប្រសាសន៍ថា ទីលានបាល់ទាត់នេះមានទំហំ៦៦ម៉ែត្រX៤២ម៉ែត្រ បានចំណាយទឹកប្រាក់សាងសង់អស់១៦ម៉ឺនដុល្លារសហរដ្ឋអាមេរិក ដែលវិនិយោគទុនដោយលោកខៀវ ភារិទ្ធ ។
ទីលានបាល់ទាត់នេះ ត្រូវបានបែងចែកជាតារាង៣តូចៗ ដែលតារាងនីមួយៗមានទំហំ៤២ម៉ែត្រX២២ម៉ែត្រ ហើយនៅជុំវិញតារាងនេះមានកន្លែងលក់ចំណីអាហារ លក់សម្ភារកីឡា បន្ទប់អនាម័យ និងកន្លែងផ្សេងៗទៀតជាច្រើនរង់ចាំបម្រើសេវាកម្ម ។ លោកបានបញ្ជាក់ឱ្យដឹងទៀតថា មូលហេតុដែលលោកហ៊ានអះអាងថា ជាតារាងបាល់ទាត់ស្តង់ដាអន្តរជាតិនោះ ព្រោះទាំងស្មៅដែលយកមកក្រាល ត្រូវបានទិញមកពីប្រទេសអ៊ីតាលី មានគុណភាពល្អជាងស្មៅរបស់ប្រទេសដទៃទៀត រីឯទំហំតារាងវិញគឺតម្រូវតាមស្តង់ដារបស់តារាងអន្តរជាតិទៀតផង ។
តារាងបាល់ ទាត់ប្រើប្រាស់ស្មៅសិប្បនិម្មិតនេះផ្តល់ផលប្រយោជន៍យ៉ាងសំខាន់ដល់អ្នកលេង ជាពិសេស ខាងផ្នែកសុខភាពតែម្តង ម្យ៉ាងវិញទៀតវាក៏មិនបង្ករបួសស្នាមដល់អ្នកលេង នៅពេលរអិលដួលផងដែរ ។ លោក អោក សំណាងបានគូសបញ្ជាក់បន្ថែមទៀតថា ក្នុងការបង្កើតតារាងបាល់ទាត់ដ៏ល្អនេះបាន គឺដោយសារលោកឧកញ៉ា គិត ម៉េង ផងដែរ ដែលលោកមានសន្តានចិត្តផ្តល់ទីកន្លែងដ៏ល្អសម្រាប់កសាងទីលានបាល់ទាត់មួយនេះ ព្រោះលោកក៏ជាអ្នកស្រឡាញ់ចូលចិត្តវិស័យកីឡាបាល់ទាត់ដែរ ទើបលោកមានបំណងចង់ឱ្យវិស័យបាល់ទាត់មានការរីកចម្រើន ។
ដោយឡែក លោកនាយឧត្តមសេនីយ៍ សៅ សុខា ប្រធានសហព័ន្ធកីឡាបាល់ទាត់កម្ពុជា ក៏មានបំណងចង់បង្កើតឱ្យមានទីលានបាល់ទាត់ឱ្យបានច្រើន ពីព្រោះបើមានទីលានច្រើនគឺមានភាពងាយស្រួលក្នុងការបម្រើដល់ការហ្វឹកហាត់ អាចអូសទាញអ្នកលេងបានច្រើនថែមទៀតផង ។ បច្ចុប្បន្ន លោក ក៏កំពុងយកចិត្តទុកដាក់យ៉ាងខ្លាំង ក្នុងការជំរុញឱ្យវិស័យបាល់ទាត់មានការរីកចម្រើន ជាពិសេសការកសាងទីលានឱ្យបានច្រើន និងបណ្តុះបណ្តាលធនធានកីឡាករ ចាប់ពីក្មេងតូចៗ ធ្វើយ៉ាងណាឱ្យបានច្រើនក្រុម ។
ហើយអ្វីដែលពិសេសជាងនេះទៅទៀតនោះ គឺធ្វើឱ្យពួកគេឃ្លាតឆ្ងាយពីការសេពគ្រឿងញៀន និងអំពើមិនល្អទាំងឡាយ ដែលនាំឱ្យមានការលំបាកដល់សង្គមជាតិរបស់យើង ។ លោក អោក សំណាង បានបន្តទៀតថា ការបង្កើតទីលានបាល់ទាត់ដែលប្រើស្មៅសិប្បនិម្មិតនេះបានច្រើនកាលណា គឺជាការល្អបំផុត ព្រោះថា វាអាចជួយក្មេងៗ ចាប់ពីកម្រិតបឋមដល់វិទ្យាល័យបានចូលលេង និងងាយស្រួលក្នុងការហ្វឹកហាត់ទៀតផង ៕
ចែករំលែកព័តមាននេះ