រាជធានីភ្នំពេញ ៖ ព្រឹកថ្ងៃទី១៥ មីនា ២០១២ លោកកែប ជុតិមា អភិបាលរាជធានីភ្នំពេញ បាននាំយកអំណោយជាថវិការបស់សម្តេចតេជោ ហ៊ុន សែន និងលោកជំទាវគតិព្រឹទ្ធបណ្ឌិត ប៊ុន រ៉ានី ហ៊ុន សែន ចំនួន៥ម៉ឺនដុល្លារ ប្រគេនដល់វត្តស្រះចក ដើម្បីចូលរួមកសាងមហាកុដិថ្មីមួយដែលកំពុងស្ថាបនាជិតរួចរាល់ ។
អំណោយចំនួន៥ម៉ឺនដុល្លារសហរដ្ឋអាមេរិក ជាអំណោយលើកទី២ របស់សម្តេចតេជោ ហ៊ុនសែន និងលោកជំទាំវសម្រាប់កសាងមហាកុដិនៅវត្តស្រះចកនេះ ។ កាលពីលើកទី១កាលពីពេលថ្មីៗកន្លងមកនេះ មានទឹកប្រាក់ចំនួន៥ម៉ឺនដុល្លារ ដែលសរុបអំណោយទាំងអស់មានចំនួន១០ម៉ឺនដុល្លាហើយរ ។ កុដិនេះមានមួយអគារកម្ពស់២ជាន់ ស្ថាបនាយ៉ាងប្រណីត អាចចាត់ទុកជាមហាកុដិបាន ។
ក្នុងពេលទទួលអំណោយនោះព្រះគ្រូចៅអធិការវត្តស្រះចកបានថ្លែងអំណរគុណយ៉ាងជ្រាលជ្រៅដល់សម្តេចតេជោ ហ៊ុន សែន និងលោកជំទាវដែលបានយកចិត្តទុកដាក់ និងផ្តល់ថវិកាចំនួន១០ម៉ឺនដុល្លារតាមរយៈលោកកែប ជុតិមា សម្រាប់ជួយកសាងកុដិនេះឡើង ។ ក្នុងឱកាសនោះព្រះគ្រូចៅអធិការក៏បានប្រសិទ្ធពរជ័យ ជូនពរដល់លោកព្រឹទ្ធាចារ្យអ្នកឧកញ៉ាមហាភក្តី ហ៊ុន នាង បិតាបង្កើតសម្តេចតេជោឱ្យឆាប់ជាសះស្បើយពីរោគាព្យាធិផ្សេងៗ ដើម្បីចូលរួមកសាង និងអភិវឌ្ឍន៍ប្រទេសជាតិបន្តទៅទៀត ជាពិសេសវិស័យព្រះពុទ្ធសាសនានេះតែម្តង ៕
ចែករំលែកព័តមាននេះ