នាង Tessa Worleyបានតស៊ូជម្នះខ្យល់បក់ វូៗរហូតដណ្តើមបានជ័យជម្នះពានជើងឯកប្រកួតស្គីចុះជ្រាល World Cupជាលើកទី២បន្តបន្ទាប់គ្នាកាលពីថ្ងៃអាទិត្យទី១២កុម្ភៈនៅទីលានប្រកួត Soldeu Ski resortស្ថិតក្នុងប្រទេសអង់ដូរ៉ាទ្វីបអឺរ៉ុប ។ នាងWorleyដណ្តើមបានជ័យជម្នះជើងឯកលើកទី៧ក្នុងអាជីពនេះបន្ទាប់ពីបានប្រើអស់ថិរវេលា ២នាទីនិង១.៨០វិនាទីយកឈ្នះកីឡាការិនីជើងខ្លាំងរបស់ស្លូវេនៀ Tina Mazeដែលប្រើពេលច្រើនជាង ០.១៦វិនាទីស្ថិតនៅចំណាត់ថ្នាក់លេខ២ ។
ចំណែកកីឡាការិនីការពារជើងឯក World Cupសញ្ជាតិអាល្លឺម៉ង់ Maria Hoelf-Rieschដណ្តើមបានចំណាត់ថ្នាក់លេខ៣បន្ទាប់ពីបានប្រើអស់ពេលច្រើនជាង០.៧៥វិនាទី។ កីឡាការិនីអាមេរិកលីនសេ វ៉ុនដែលកំពុងនាំមុខគេនៅលើតារាងជើងឯកពិភពលោកបញ្ចប់ការប្រកួតក្នុងលំដាប់ទី៨ ពោលគឺបន្ទាប់ពីបានប្រើពេលច្រើនជាងនាង Worley ១.៣៦វិនាទី ។ វ៉ុនអំឡុងការប្រកួតបានដួលនៅលើផ្លូវប្រណាំងឡើងទួលគឺជាទួលដែលនាងបានដួលកាលពីថ្ងៃសៅរ៍ ។ នាងបាននិយាយថា៖«សំណាងអាក្រក់ ខ្ញុំបានធ្វើឱ្យមានកំហុសធំនៅពាក់កណ្តាលផ្លូវប្រណាំងជាហេតុនាំឱ្យខាតពេលវេលា »។
ជ័យជម្នះរបស់នាងWorleyលើកនេះបានរុញឱ្យនាងស្ថិតនៅលំដាប់ទី១នាំមុខម្ចាស់មេដាយមាសអូឡាំពិកនាង Viktoria Rebensburgនៅលើតារាងជើងឯកស្គីចុះជម្រាល។
នាងWorleyវ័យ២២ឆ្នាំបាននិយាយថា៖«នៅជុំទី២ ខ្ញុំបានរក្សាល្បឿនឱ្យដូចជាជុំដំបូង។ ហើយល្បឿនដ៏លឿនរបស់ខ្ញុំនេះបន្តរហូតដល់ទីព្រ័ត្រ»។ នេះគឺជាលើកទី១ហើយសម្រាប់ប្រទេសអង់ដូរ៉ាដែលទទួលបានសិទ្ធិរៀបចំការប្រកួតស្គីចុះជម្រាលកម្រិត World Cup ។ ការប្រកួតបែបនេះបន្ទាប់មកទៀតនឹងត្រូវធ្វើនៅទីក្រុងសូជី ប្រទេសរុស្ស៊ី ៕
ចែករំលែកព័តមាននេះ