រាជធានីភ្នំពេញ ៖ រថយន្តសង្គ្រោះចំនួន២គ្រឿងផលិតនៅប្រទេសជប៉ុន ដែលបំពាក់ទៅដោយឧបករណ៍សង្គ្រោះយ៉ាងទំនើបៗ ត្រូវបានលោកជំទាវបណ្ឌិតប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ផ្តល់ជូនដល់មន្ទីរពេទ្យមិត្តភាពខ្មែរ-សូវៀត កាលពីពេលថ្មីៗកន្លងទៅ សំរាប់បំរើសេវាសង្គ្រោះទូទៅជូនដល់ប្រជាពល រដ្ឋខ្មែរនៅទូទាំងប្រទេស ។ លោកវេជ្ជបណ្ឌិតឆឹង យ៉ៅយ៉េន អនុប្រធានមន្ទីរពេទ្យមិត្តភាពខ្មែរ-សូវៀត ហើយក៏ជាប្រធានអង្គភាពសង្គ្រោះពិសេសប្រចាំមន្ទីរពេទ្យនេះផងដែរ បានមានប្រសាសន៍ថា រថយន្តសង្គ្រោះពិសេសទាំង២គ្រឿងនេះ ជាអំណោយរបស់អង្គការ SIDE BY SIDE នៃប្រទេសជប៉ុន មានតំលៃប្រហែលជា៥០ម៉ឺនដុល្លារ ដែលបំពាក់ដោយឧបករណ៍សង្គ្រោះទំនើបបំផុត សំរាប់បំរើសេវាសង្គ្រោះយ៉ាងពិសេស ជូនដល់ប្រជាពលរដ្ឋខ្មែរទូទៅដោយមិនគិតថ្លៃសេវាឡើយ ។ អង្គភាពពិសេសដែលមានសុទ្ធសឹងតែមន្ត្រីជំនាញៗ ឆ្លងកាត់ការបណ្តុះបណ្តាលអស់រយៈពេលជាច្រើនខែដោយអង្គការ SIDE BY SIDE មានទាំងអស់១៨នាក់ នឹងត្រៀមរង់ចាំបំរើសេវាកម្មសង្គ្រោះ២៤ម៉ោងលើ២៤ម៉ោង ។
លោកវេជ្ជបណ្ឌិតបានបញ្ជាក់ទៀតថា អង្គភាពសង្គ្រោះពិសេសរបស់លោកមានតួនាទីបំរើសេវាសង្គ្រោះជាសាធារណៈដែលមានដូចជាគ្រោះថ្នាក់ចរាចរណ៍ គ្រោះថ្នាក់អគ្គីភ័យ ទឹកជំនន់ ផ្ទុះភ្នំភ្លើង បាក់ដី ធ្លាក់យន្តហោះ និងគ្រោះថ្នាក់ដែលកើតឡើងផ្សេងៗជាច្រើនទៀត ។ រថយន្តសង្គ្រោះទាំង២គ្រឿងនេះទៀត ឧបករណ៍ដែលបានបំពាក់រួចជាស្រេចគឺមានគ្រប់គ្រាន់ប្រៀបបានទៅនឹងឧបករណ៍ក្នុងមន្ទីរដែរហើយ អ្នកជំងឺដែលបានចូលដល់ក្នុងរថយន្តហើយនោះគឺប្រៀបបាននឹងចូលសំរាកនៅក្នុងមន្ទីរពេទ្យផ្នែកសង្គ្រោះបន្ទាន់ដូចគ្នា ។ ប្រជាពលរដ្ឋទាំងអស់ដែលជួបនូវបញ្ហាគ្រោះថ្នាក់ដូចខាងលើនេះអាចធ្វើទំនាក់ទំនងតាមទូរស័ព្ទលេខ ១១៩ ក៏បាន ឬលេខ ០២៣ ២១៧ ៧៦៤-០១២ ៨៥៨ ១៨៤ ។
លោកវេជ្ជបណ្ឌិតឆឹង យ៉ៅយ៉េន ក៏សូមធ្វើការអំពាវនាវផងដែរ ដល់ប្រជាពលរដ្ឋខ្មែរទាំងអស់ត្រូវតែមានជំនឿជឿជាក់ទៅលើសេវាសង្គ្រោះរបស់រដ្ឋ ហើយក៏ត្រូវតែងាកមករកសេវាសង្គ្រោះរបស់រដ្ឋវិញទៅ ។ រាជរដ្ឋាភិបាលក៏ដូចជាក្រសួងសុខាភិបាលតែងតែយកចិត្តទុកដាក់ និងពង្រីកសមត្ថភាពបច្ចេកទេសលើសេវាថែទាំយ៉ាងខ្លាំង ជាពិសេសលោកជំទាវបណ្ឌិតប៊ុន រ៉ានី ហ៊ុន សែន ដែលតែងតែគិតគូរពីបញ្ហាសុខភាពរបស់បងប្អូនប្រជាពលរដ្ឋក្រីក្រជានិច្ច ។ ជាក់ស្តែងរថយន្តទាំង២គ្រឿងនេះបូករួមទាំងបុគ្គលិកសង្គ្រោះពិសេស១៨នាក់ទៀត គឺបង្កើតឡើងក្នុងគោលបំណងបំរើសេវាសង្គ្រោះជាសាធារណៈជូនដល់ប្រជាពលរដ្ឋដោយមិនគិតពីការនឿយហត់ឡើយ ៕
ចែករំលែកព័តមាននេះ