ខេត្តព្រះវិហារ ៖ ដើម្បីបញ្ជាក់ពីសក្ខីភាពនៃសម្ព័ន្ធមេត្រីភាពកាន់តែស្និទ្ធស្នាល ផ្សារភ្ជាប់គ្នាជានិច្ចរវាងសមរភូមិមុខ និងសមរភូមិក្រោយ កាលពីថ្ងៃទី១២ និង១៣ កុម្ភៈ ប្រតិភូខណ្ឌមានជ័យ និងខណ្ឌចំការមន ដឹកនាំដោយលោកគួច ចំរើន អភិបាលខណ្ឌមានជ័យ និងលោកឡូ យុយ អភិបាលខណ្ឌចំការមន បានទៅសួរសុខទុក្ខកងទ័ព ដោយនាំយកអំណោយជាស្បៀងអាហារ និងថវិកាទៅចែកជូនដល់កងវរសេនាតូចលេខ៣៩២ ចំណុះកងពលអន្តរាគមន៍លេខ៩ តំបន់ជាំក្សាន្ត ខេត្តព្រះវិហារ។
ក្នុងឱកាសនោះ លោកឡូ យុយ និងលោកគួច ចំរើន បានពាំនាំការផ្តាំផ្ញើការសាកសួរសុខទុក្ខពីសំណាក់បងប្អូនប្រជាពលរដ្ឋ អាជីវករ ពាណិជ្ជករ រស់នៅក្នុងរាជធានីភ្នំពេញទាំងអស់ដែលជានិច្ចកាលតែងតែមានក្តីនឹករលឹក លើកតម្កើងចំពោះទឹកចិត្តដ៏អង់អាចក្លាហានរបស់នាយទាហាន នាយទាហានរង និងពលទាហានទាំងអស់ ដែលកំពុងបំពេញភារកិច្ចការពារទឹកដីពីការឈ្លានពានរបស់ចោរសៀម។
លោកអភិបាលខណ្ឌទាំង២បញ្ជាក់ថា បងប្អូនប្រជាពលរដ្ឋសមរភូមិក្រោយ យកចិត្តទុកដាក់ជួយឧបត្ថម្ភដល់កងទ័ពនៅសមរភូមិន្ទមុខមិនឱ្យខ្វះខាតឡើយ។ ជាក់ស្តែងចាប់ពីថ្ងៃទី៣១ មករា រហូតដល់ថ្ងៃទី១២ និង១៣ ខែកុម្ភៈ ប្រតិភូខណ្ឌមានជ័យ និងខណ្ឌចំការមនបានផ្ញើស្បៀងអាហារដល់កងទ័ពវរសេនាតូចលេខ៣៩២ ចំនួន៤លើកមកហើយ។
ការផ្សារភ្ជាប់សុខទុក្ខរវាងសមរភូមិមុខ និងសមរភូមិក្រោយធ្វើឱ្យនាយទាហាន នាយទាហានរង និងពលទាហានដែលកំពុងបំពេញបេសកកម្មនៅសមរភូមិមុខ កាន់តែមានទឹកចិត្តតស៊ូគ្មានញញើត ក្នុងការតបតប្រឆាំងចំពោះសត្រូវឈ្លានពានសៀម គឺមិនឱ្យបាត់បង់ទឹកដីជាដាច់ខាត។ អមដំណើរលោកអភិបាលខណ្ឌទាំង២ក្នុងឱកាសនោះ រួមមានលោកទុយ សេរីរ័ត្នមុនី នាយរងរដ្ឋបាលខណ្ឌចំការមន លោកឡេង គឹមហ៊ាង អធិការរងនគរបាលខណ្ឌចំការមន លោកហ៊ួយ វីរៈ ប្រធានផ្សារច្បារអំពៅ និងលោកសាន់ ប៊ុណ្ណា ប្រធានផ្សារបន្លែច្បារអំពៅ៕
ចែករំលែកព័តមាននេះ