កីឡាករលីយ៉ូណេល ម៉េសស៊ីខ្សែប្រយុទ្ធក្រុមជម្រើសជាតិអាហ្សង់ទីនរបស់ក្លឹប Barcelona នៅតែបង្កើតកេរ្តិ៍ឈ្មោះជាលក្ខណៈប្រវត្តិសាស្ត្របន្តទៀត ទាំងនៅខាងក្នុង និងក្រៅទីលានប្រកួត ។ បច្ចុប្បន្នគ្រោងបង្ហាញនៅលើគម្របទស្សនាវដ្តី «ថែម» ជាទស្សនាវដ្ដីឆ្នើមនៅលើពិភពលោកប្រចាំខែ កុម្ភៈ ឆ្នាំ២០១២ ដោយកាលពីមុននេះ ធ្លាប់ទទួលរង្វាន់ជាកីឡាករឆ្នើមប្រចាំឆ្នាំ ឬពានរង្វាន់បាល់មាសចំនួន៣ជំនាន់ជាប់គ្នា ។
តាមការបង្ហើបឱ្យដឹងរបស់វ៉េបសាយ ក្លឹប Barcelona (fcbarcelona.com) កាលពីថ្ងៃទី២៧ មករា បង្ហាញថា ជាលើកដំបូងដែលកីឡាករបាល់ទាត់ នឹងបង្ហាញមុខនៅលើទស្សនាវដ្តី «ថែម» (Time) តែម្នាក់ក្រោយមកក៏មានកីឡាករអាជីពផ្សេងទៀត ដូចជាលោកថៃហ្គ័រវូដ លោកម៉ៃឃើល ហ្ស័កដេន និងលោកម៉ូហាមាត់ អាលី ជាកីឡាករវាយកូនហ្គោលនិងប្រដាល់ ។
ទស្សនាវដ្តីដឹថែម ច្បាប់ចេញផ្សាយប្រចាំថ្ងៃចន្ទ ទី៦ កុម្ភៈ ឆ្នាំ២០១២ ដែលមានកីឡាករបាល់ទាត់ម៉េសស៊ីនៅលើទំព័រ នឹងដាក់លក់នៅលើពិភពលោក នៅថ្ងៃអាទិត្យ ទី២៩ មករា ។ សម្រាប់សាមីខ្លួន (ម៉េសស៊ី) បានទទួលការកោតសរសើរនៅខាងលើទំព័រទស្សនាវដ្តីថា «ឃីង លីយ៉ូ» (King Leo) ដោយ «ថែម» (Time) បានធ្វើអត្ថាធិប្បាយថា ម៉េសស៊ី ជាកីឡាករបាល់ទាត់ដ៏ឆ្នើម នៅលើពិភពលោក និងអាចលេចធ្លោនៅគ្រប់រដូវកាល ។
ស្របពេលជាមួយគ្នានេះ កីឡាករម៉េស៊ី ក៏បានរៀបរាប់ពីកីឡាកររ៉ូណាល់ដូ ខ្សែបម្រើក្រុមជម្រើសជាតិព័រទុយហ្គាល់របស់ក្លឹប Real Madrid នៅក្នុងបទសម្ភាសន៍របស់ «ថែម» ថា «ខ្លួនយល់ថា រ៉ូណាល់ដូជាមនុស្សល្អ គេជាកីឡាករល្អនៅក្លឹប Real Madrid » ៕
ចែករំលែកព័តមាននេះ