រាជធានីភ្នំពេញ ៖ លោកប៉ូ សំណាង ប្រធានមជ្ឈមណ្ឌលវប្បធម៌ជាតិនិងសីលធម៌សង្គមបានថ្លែងថា តាមការស្រាវជ្រាវរបស់មជ្ឈមណ្ឌលវប្បធម៌ជាតិនិងសីលធម៌សង្គមបានឱ្យដឹងថា ការជួញដូរមនុស្សមានលក្ខណៈពីរសណ្ឋានគឺ ទីមួយ ការជួញដូរផ្លូវភេទ ទីពីរ ជួញដូរពលកម្ម ហើយការជួញដូរផ្លូវភេទនោះគឺបំបែកជាបីរូបភាពផ្សេងទៀត គឺទីមួយ រូបភាពជាក្រុមនារីម៉ាស្សា ទីពីរ ជាក្រុមនារីខារ៉ាអូខេ និងទីបី ជាក្រុមនារីឡង់សេ ។
លោកប៉ូ សំណាង បានបញ្ជាក់ថា ក្រុមនារីម៉ាស្សានៅក្នុងរាជធានីភ្នំពេញមាននៅ៨៦០កន្លែង ក្នុងខណ្ឌទាំង៩ កំពុងបម្រើសេវាផ្លូវភេទ១០០% ហើយមានមេដឹកនាំចំនួន១២ក្រុម ស្មើ១២នាក់ ។ ឯក្រុមនារីខារ៉ាអូខេវិញមាននៅ៧០កន្លែងក្នុងរាជធានីភ្នំពេញ ក្នុងនោះមាននារីដែលស្ម័គ្រចិត្ត និងរងគ្រោះចំនួន៣.៥០០នាក់ កំពុងបម្រើផ្លូវភេទ១០០% ហើយក្រុមទីបីគឺជាក្រុមនារីឡង់សេ មានចំនួន២.៩០០នាក់ក្នុងរាជធានីភ្នំពេញ កំពុងបម្រើផ្លូវភេទ៣០% ។ ឯការជួញដូរកម្លាំងពលកម្មគឺកើតមាននៅភ្នំពេញចំនួន២០កន្លែង ស្មើនឹង២០ក្រុមហ៊ុន ក្រុមនាំពលករចេញទៅក្រៅប្រទេសតាមរបៀបទាក់ទាញកម្លាំងនគរបាលមូលដ្ឋានរួមទាំងអាជ្ញាធរដើម្បីសហការក្នុងការចេញលិខិតស្នាមបញ្ជាក់ដំឡើងអាយុឱ្យគ្រប់អាយុស្របទៅតាមច្បាប់រដ្ឋធម្មនុញ្ញ ។ ជារៀងរាល់ឆ្នាំ មានយុវនារីកម្ពុជា៣០ម៉ឺននាក់បានចាកចេញទៅបម្រើការងារនៅក្រៅប្រទេស ភាគច្រើនគឺជានារីមកពីតាមបណ្តាខេត្តមានជីវភាពខ្វះខាតត្រូវចាកចេញទៅប្រទេសម៉ាឡេស៊ី ថៃ និងកូរ៉េ ។
លោកប៉ូ សំណាង បានថ្លែងបែបនេះកាលពីថ្ងៃទី១៩ មករា នៅមជ្ឈមណ្ឌលវប្បធម៌ជាតិនិងសីលធម៌សង្គម នៅក្នុងពិធីផ្សព្វផ្សាយទប់ស្កាត់ការប្រើប្រាស់គ្រឿងញៀន ការជួញដូរមនុស្ស និងគ្រោះថ្នាក់ចរាចរណ៍ឆ្នាំ២០១២-២០១៤ ។
លោកប៉ូ សំណាង បានបន្តទៀតថា សកម្មភាពផ្សព្វផ្សាយទប់ស្កាត់ការប្រើប្រាស់គ្រឿងញៀន ការជួញដូរមនុស្ស និងគ្រោះថ្នាក់ចរាចរណ៍ដែលធ្វើចាប់ពីឆ្នាំ២០១២ដល់២០១៤ខាងមុខនេះ លោកបានទទួលការអនុញ្ញាតពីក្រសួងមហាផ្ទៃឱ្យធ្វើកិច្ចសហការជាមួយស្នងការដ្ឋាននគរបាលរាជធានីភ្នំពេញ ស្នងការដ្ឋាននគរបាលខេត្តបន្ទាយមានជ័យ ស្នងការដ្ឋាននគរបាលខេត្តសៀមរាប ដើម្បីធ្វើការផ្សព្វផ្សាយនិងចែកសៀវភៅជំនួយស្មារតីស្តីពីការទប់ស្កាត់ការជួញដូរពលកម្មទៅក្រៅប្រទេស សម្រាប់នាយកដ្ឋានរដ្ឋបាលប្រើប្រាស់កម្លាំងកម្មករផ្សព្វផ្សាយបន្តដល់និយោជិតចំនួន១ម៉ឺនច្បាប់ចាប់ពីឆ្នាំ២០១២ ដល់ឆ្នាំ២០១៤ខាងមុខនេះ ។ ក្នុងនោះលោកមានបើកវគ្គបណ្តុះបណ្តាលចំនួន៣០វគ្គ ដោយអញ្ជើញម្ចាស់ផ្ទះសំណាក់ សណ្ឋាគារ និងក្រុមហ៊ុននាំពលករចេញទៅក្រៅប្រទេស ឱ្យមកចូលរួមដើម្បីឱ្យមានការយល់ដឹងអំពីការទប់ស្កាត់ការប្រើប្រាស់គ្រឿងញៀន ការជួញដូរមនុស្ស និងបញ្ហាគ្រោះថ្នាក់ចរាចរណ៍ដែលជាបញ្ហាកង្វល់របស់រាជរដ្ឋាភិបាលកម្ពុជា ។
លោកប៉ូ សំណាង បានថ្លែងអំណរគុណចំពោះលោកនេត សាវឿន អគ្គស្នងការនគរបាលជាតិ លោកគួច ម៉េងលី និងលោកកែប ជុតិមា ផងដែរ ដែលបានចូលរួមជួយឧបត្ថម្ភគាំទ្រដល់មជ្ឈមណ្ឌលវប្បធម៌ជាតិនិងសីលធម៌សង្គម ៕
ចែករំលែកព័តមាននេះ