យោងតាមប្រវត្តិរូបផ្លូវការថា លោកគីម ជុងអ៊ីល កើតថ្ងៃទី១៦ កុម្ភៈ ឆ្នាំ១៩៤២ ក្នុងព្រៃជ្រៅនៃភ្នំពិសិដ្ឋ PAEKDU ក្នុងជំរំមួយស្ថិតនៅជិតព្រំដែនចិន ក្នុងសម័យសង្គ្រាមទ័ពព្រៃកូរ៉េប្រឆាំងជប៉ុន ។ ក៏ប៉ុន្តែពួកអ្នកជំនាញការបរទេសយល់ថា លោកគីម ជុងអ៊ីល ដែលពលរដ្ឋកូរ៉េខាងជើងហៅមេដឹកនាំជាទីស្នេហាកើតនៅវ៉្លាឌីវ៉ូស្តុក ចុងបូព៌ាសូវៀត បច្ចុប្បន្នគឺប្រទេសរុស្ស៊ី ហើយលោករស់នៅក្នុងប្រទេសចិនសម័យសង្គ្រាមកូរ៉េ (១៩៥០-១៩៥៣)។
យោងតាមការឃោសនានានាថា លោកមានស្មារតីបដិវត្តន៍តាំងតែពីនៅរៀនសាលាបឋមសិក្សាដោយធ្វើជាអ្នកនាំមុខគេឆ្ពោះទៅកាន់ទីលានប្រយុទ្ធប្រឆាំងការកាន់កាប់របស់ជប៉ុន។ ពេលរៀននៅអនុវិទ្យាល័យ លោកក្លាយជាកម្មករគំរូម្នាក់ដែលអាចជួសជុលបណ្តារថយន្តកាំមីញ៉ុង និងគ្រឿងម៉ាស៊ីនអគ្គិសនី។ បន្ទាប់មកលោកបានបន្តការសិក្សានៅសាកលវិទ្យាល័យគីម អ៊ីលស៊ុង ដែលនៅទីនោះលោកសិក្សាពីគំនិតម៉ាក្សនិយម ព្រមទាំងបណ្តាទ្រឹស្តីបដិវត្តន៍របស់ឪពុកលោក។
ពួកអ្នកជំនាញការយល់ទៀតថា លោករស់នៅក្នុងជីវភាពបែបអភ័យឯកសិទ្ធិនៅក្រុងព្យុងយ៉ាង បន្ទាប់ពីគ្រួសារលោកវិលត្រឡប់មកកាន់ឧបទ្វីបកូរ៉េដែលបែងចែកគ្នាវិញ ។ ចំណែកឪពុកលោកត្រូវបានពួកសូវៀតលើកបន្តុបឱ្យកាន់អំណាច។ ពិតណាស់ លោកគីម ជុងអ៊ីល ក្នុងបណ្តាឆ្នាំយុវវ័យស្ថិតនៅប្រទេសចិន ដើម្បីទទួលការអប់រំមួយ ហើយចៀសពីគ្រោះថ្នាក់នៃ សង្គ្រាមកូរ៉េ (១៩៥០-១៩៥៣)។
លោកគីម ជុងអ៊ីល ចូលក្នុងបក្សពលករកូរ៉េកាលពីឆ្នាំ១៩៦៤ ហើយឡើងឋានៈយ៉ាងឆាប់រហ័ស។ ក្នុងឆ្នាំ១៩៧៣ លោកក្លាយរួចហើយជាអ្នកទទួលខុសត្រូវខាងចាត់តាំង និងឃោសនាអប់រំរបស់បក្ស ហើយនាឆ្នាំបន្ទាប់ពីនោះ ត្រូវបានឪពុកលោកជ្រើសតាំងជាអ្នកត្រូវឡើងបន្តវេន។ លោកគីម ជុងអ៊ីល បានពង្រីកជាបន្តបន្ទាប់នូវឥទ្ធិពលរបស់លោកក្នុងបក្ស ហើយក្នុងឆ្នាំ១៩៨០ លោកបានចូលក្នុងការិយាល័យនយោបាយ និងគណៈកម្មាធិការយោធា។
យោងតាមពួកអ្នកជំនាញការខាងស៊ើបការណ៍លោកខាងលិចថា លោកជាអ្នកនៅពីក្រោយការវាយប្រហារដោយគ្រាប់បែកមួយនៅភូមាកាលពីឆ្នាំ១៩៨៣ ដែលបណ្តាលឱ្យស្លាប់អ្នកទទួលខុសត្រូវកូរ៉េខាងត្បូង១៧នាក់ បន្ទាប់មកក្នុងឆ្នាំ១៩៨៧ ស្ថិតនៅពីក្រោយការកម្ទេចយន្តហោះដឹកអ្នកដំណើរមួយគ្រឿងរបស់ក្រុមហ៊ុនអាកាសចរណ៍កូរ៉េខាងត្បូងបណ្តាលឱ្យមនុស្សស្លាប់១១៥នាក់។ លោកក៏ត្រូវគេសង្ស័យដែរថា បានរៀបចំការចាប់ពង្រត់បណ្តាជនជាតិជប៉ុន ដើម្បីទាមទារប្រាក់លោះ។
យោងតាមបណ្តាមនុស្សនៅជាប់កៀករូបលោកមុនពេលរត់គេចខ្លួនចេញពីប្រទេសថា លោកគីម ចូលចិត្តទស្សនាផ្ទាំងទស្សនីយភាពរបស់បណ្តាអ្នករបាំរុស្ស៊ី ហើយលោកបានបង្កើតបន្ទប់ក្រោមដីដែលតម្កល់ទុកស្រាល្អៗ ដល់ទៅ១០.០០០ដប។ ក៏ប៉ុន្តែបណ្តាម៉ាស៊ីនឃោសនាកូរ៉េខាងជើងបង្ហាញប្រវត្តិរូបរបស់លោកគីម ជុងអ៊ីល ខុសពីនេះ។ យោងតាមម៉ាស៊ីនឃោសនាទាំងនេះថា លោកគីម ជុងអ៊ីល ជាអ្នកបើកយន្តហោះចម្បាំង ខណៈដែលគេឃើញតែលោកទៅណាមកណាពិសេសចេញទៅបរទេស (ចិន-រុស្ស៊ី) តែតាមរថភ្លើងពុំដែលឃើញលោកជិះ យន្តហោះម្តងណាឡើយ។ មេដឹកនាំជាទីស្នេហា ជាអ្នករៀបរៀងល្ខោនអូប៉េរ៉ាជាច្រើន និងផលិតខ្សែភាពយន្តទាំងឡាយ ហើយជាអ្នកពូកែខាងវាយកូនហ្គោលផង។
ពេលលោកឡើងកាន់អំណាចបន្តពីឪពុកលោក គឺលោកគីម អ៊ីលស៊ុង កាលពីឆ្នាំ១៩៩៤ ពួកអ្នកឯកទេសនៃរបបកូរ៉េខាងជើងមានការសង្ស័យលើសមត្ថភាពរបស់លោកក្នុងការដឹកនាំប្រទេសមកពីឥទ្ធិពលខ្លាំងរបស់បណ្តាប្រមុខយោធា។ ក៏ប៉ុន្តែលោកគីម ជុងអ៊ីល អាចគ្រប់គ្រងអំណាចលោកបាន។ លោករហូតដល់អាចអនុវត្តការកែទម្រង់នានា។ កាលពីថ្ងៃទី១៥ មិថុនា ឆ្នាំ២០០០ លោកគីម ស្រាប់តែលេចត្រដែតលើឆាកអន្តរជាតិ ដោយធ្វើកិច្ចប្រជុំកំពូល លើកដំបូងរវាងមេដឹកនាំកូរ៉េទាំង២ ដែលនាឱកាសនោះគឺទស្សនកិច្ចរបស់ប្រធានាធិបតីកូរ៉េខាងត្បូង លោកគីម ដេយុង នៅក្រុងព្យុងយ៉ាង។ បន្ទាប់ពីនេះ លោកគីម បានទទួលរដ្ឋមន្ត្រីការបរទេសអាមេរិកលោកស្រីម៉ាដឺឡែន អាល់ប្រាយ និងប្រធានាធិបតីរុស្ស៊ី លោកវ៉្លាឌីមៀរ ពូទីន។
ខែកុម្ភៈ ឆ្នាំ២០០៥ កូរ៉េខាងជើងប្រកាសថា ខ្លួនមានអាវុធនុយក្លេអ៊ែរបន្ទាប់មកក្នុងខែ តុលា ឆ្នាំ២០០៦ កូរ៉េខាងជើងធ្វើឱ្យបណ្តាប្រទេសជិតខាងញាប់ញ័រដោយធ្វើការសាកល្បងនុយក្លេអ៊ែរ។ ប្រទេសនេះធ្វើការសាកល្បងនុយក្លេអ៊ែរម្តងទៀតក្នុងខែឧសភា ឆ្នាំ២០០៩។ អាកប្បកិរិយានេះញ៉ាំងឱ្យមានការពង្រឹងទណ្ឌកម្មរបស់សហរដ្ឋអាមេរិក កូរ៉េខាងត្បូង និងជប៉ុន។ លោកគីម ជុងអ៊ីល មានកូនប្រុស៣នាក់ ។ កូនប្រុសក្មេងជាងគេ លោកគីម ជុងអ៊ុន ពេលនេះត្រូវក្លាយជាមហាទាយាទ ៕
ចែករំលែកព័តមាននេះ