ប្រទេសស្កុតឡែន ៖ សកម្មជនគាំទ្រប៉ាឡេស្ទីនមួយក្រុមបានអុកឡុក និងបំផ្លិចបំផ្លាញទីលាន និងរមណីយដ្ឋានវាយកូនហ្គោលដ៏ធំមួយកន្លែងស្ថិតក្នុងប្រទេសស្កុតឡែន ដែលជាកម្មសិទ្ធិរបស់លោក ដូណាល់ ត្រាំ (Donald Trump)…
ប្រទេសស្កុតឡែន ៖ សកម្មជនគាំទ្រប៉ាឡេស្ទីនមួយក្រុមបានអុកឡុក និងបំផ្លិចបំផ្លាញទីលាន និងរមណីយដ្ឋានវាយកូនហ្គោលដ៏ធំមួយកន្លែងស្ថិតក្នុងប្រទេសស្កុតឡែន ដែលជាកម្មសិទ្ធិរបស់លោក ដូណាល់ ត្រាំ (Donald Trump) កាលពីថ្ងៃសៅរ៍ ដើម្បីឆ្លើយតបនឹងសំណើរបស់ប្រធានាធិបតីសហរដ្ឋអាមេរិករូបនេះ ចង់លុបចោលតំបន់ហ្គាស្សា (Gaza) នៃប្រជាជនប៉ាឡេស្ទីន។ នេះបើយោងតាមប្រភពពី BBC និង AP ចេញផ្សាយនៅថ្ងៃទី៩ ខែមីនា ឆ្នាំ២០២៥។
សកម្មជនគាំទ្រប៉ាឡេស្ទីនមួយក្រុមនេះ បានចូលទៅអុកឡុក និងបំផ្លិចបំផ្លាញទីលានវាយកូនហ្គោល និងសណ្ឋាគារ Trump Turnberry របស់លោក ត្រាំ ស្ថិតនៅភាគនិរតី ប្រទេសស្កុតឡែន កាលពីវេលាទៀបភ្លឺឈានចូលថ្ងៃសៅរ៍ ដោយបានគូររូប និងសរសេរអក្សរធំៗលើស្មៅថា «ហ្គាស្សាមិនមែនសម្រាប់លក់នោះទេ» (Gaza Is Not For Sale) ពួកគេក៏បានប្រើប្រាស់ថ្នាំពណ៌ក្រហមគូសវាសលើជញ្ជាំង ទ្វារ បង្អួច នៃអគាររមណីយដ្ឋានផងដែរ។
ក្រុមសកម្មភាពគាំទ្រប៉ាឡេស្ទីនអះអាងថា ពួកគេច្រានចោលទាំងស្រុងចំពោះការលើកឡើង និងចង់បានតាមអំពើចិត្តរបស់លោក ត្រាំ ចំពោះតំបន់ហ្គាស្សា។ ពួកគេបញ្ជាក់ក្នុងសេចក្តីថ្លែងការណ៍មួយថា «ដើម្បីបញ្ជាក់ឱ្យច្បាស់ ពួកយើងបានបង្ហាញលោក ត្រាំ ថា ទ្រព្យសម្បត្តិផ្ទាល់ខ្លួនរបស់គាត់គ្មានសុវត្ថិភាពពីទង្វើនៃការតស៊ូមតិ»។
ពាក់ព័ន្ធជុំវិញបញ្ហានេះ ប៉ូលិសស្កុតឡែនបានអះអាងថា ខ្លួនទទួលបានរបាយការណ៍អំពីការខូចខាតទីលានវាយកូនហ្គោលនៅព្រឹកព្រលឹមថ្ងៃសៅរ៍ និងបានបើកការស៊ើបអង្កេតភា្លមៗ។ អ្នកតំណាង Trump Turnberry បានហៅសកម្មភាពនេះថា អំពើឧក្រិដ្ឋកម្មកូនក្មេង ហើយធានាថា សកម្មភាពនេះមិនបានប៉ះពាល់ដល់អាជីវកម្មខ្លួននោះទេ។
រហូតមកដល់ពេលនេះ អនាគតតំបន់ហ្កាហ្សាកំពុងស្ថិតក្នុងភាពមិនប្រាកដប្រជា ខណៈដែលដំណាក់កាលទី១ នៃបទឈប់បាញ់ដែលផ្អាកសង្គ្រាមរយៈពេល១៥ខែរវាងប្រទេសអ៊ីស្រាអែល និងក្រុមហាម៉ាស់បញ្ចប់ទៅដោយគ្មានការបញ្ជាក់ច្បាស់លាស់អំពីអ្វីដែលនឹងកើតឡើងពេលក្រោយ ដោយសារតែដំណាក់កាលទី២ នៃកិច្ចព្រមព្រៀងមិនទាន់ត្រូវបានបញ្ចប់នៅឡើយទេ។ ទន្ទឹមនឹងនេះ លោក ត្រាំ បានអំពាវនាវឱ្យប្រជាជននៅតំបន់ហ្គាស្សាតាំងទីលំនៅថ្មីនៅកន្លែងផ្សេងជាអចិន្ត្រៃយ៍ ដើម្បីឱ្យអាមេរិកអាចកាន់កាប់ទឹកដីនេះ និងអភិវឌ្ឍវាសម្រាប់អ្នកផ្សេងទៀត។ ប៉ុន្តែទោះយ៉ាងណា ភាគីប៉ាឡេស្ទីនបានច្រានចោលទាំងស្រុង ចំពោះការអំពាវនាវឱ្យចាកចេញនេះ។
សូមជម្រាបថា Turnberry ជាទីលាន និងរមណីយដ្ឋានវាយកូនហ្គោលមួយក្នុងចំណោមទីលានវាយកូនហ្គោលចំនួន ១៧ ទូទាំងពិភពលោក ដែលជាកម្មសិទ្ធិរបស់លោក ត្រាំ ដោយធ្លាប់ទទួលរៀបចំការប្រកួតធំៗជាច្រើន។ Turnberry រួមបញ្ចូលទាំងទីលានវាយកូនហ្គោលចំនួន ៣ សាលាកីឡាវាយកូនហ្គោល សណ្ឋាគារលំដាប់ផ្កាយប្រាំ James Miller ដែលរចនាឡើងតាំងពីឆ្នាំ ១៩០៦ រួមជាមួយនឹងផ្ទះឈើ និងផ្ទះលំហែតូចៗជាច្រើន។
លោក ត្រាំ បានយកទិញសណ្ឋាគារ និងទីលានវាយកូនហ្គោល Turnberry ពីក្រុមហ៊ុន Leisurecorp នៅឆ្នាំ ២០១៤ ក្នុងតម្លៃ៦០លានដុល្លារ ហើយរមណីយដ្ឋាននេះត្រូវបានប្តូរឈ្មោះទៅជា Trump Turnberry។ ទោះយ៉ាងណា លោកបានលាលែងពីតំណែងជានាយកក្រុមហ៊ុនគ្រប់គ្រងក្រុមហ៊ុន Trump Turnberry នៅឆ្នាំ ២០១៧ មុនពេលលោកចូលកាន់តំណែងជាប្រធានាធិបតីសហរដ្ឋអាមេរិក ហើយបានប្រគល់ការគ្រប់គ្រងទៅឱ្យកូនប្រុស Donald Jr និង Eric ខណៈក្រុមហ៊ុនបានចំណាយប្រាក់ប្រហែល២០០លានដុល្លារលើការជួសជុលកែលម្អ៕
ចែករំលែកព័តមាននេះ