ប្រទេសឥណ្ឌូណេស៊ី ៖ អាជ្ញាធរកោះបាលី នៃប្រទេសឥណ្ឌូណេស៊ី ដែលត្រូវបានទទួលស្គាល់តាមរយៈការបោះឆ្នោតជាប់ជាកោះស្រស់ស្អាតបំផុតនៅអាស៊ីនោះ កាលពីពេលថ្មីៗនេះ បានចេញការព្រមានមួយអំពីជំងឺឆ្កែឆ្កួតដល់ភ្ញៀវទេសចរបរទេស បន្ទាប់ពីបុរសជនជាតិឥណ្ឌូណេស៊ីម្នាក់បានស្លាប់បាត់បង់ជីវិត ដោយសារជំងឺនេះ បន្ទាប់ពីត្រូវឆ្កែខាំ។…
ប្រទេសឥណ្ឌូណេស៊ី ៖ អាជ្ញាធរកោះបាលី នៃប្រទេសឥណ្ឌូណេស៊ី ដែលត្រូវបានទទួលស្គាល់តាមរយៈការបោះឆ្នោតជាប់ជាកោះស្រស់ស្អាតបំផុតនៅអាស៊ីនោះ កាលពីពេលថ្មីៗនេះ បានចេញការព្រមានមួយអំពីជំងឺឆ្កែឆ្កួតដល់ភ្ញៀវទេសចរបរទេស បន្ទាប់ពីបុរសជនជាតិឥណ្ឌូណេស៊ីម្នាក់បានស្លាប់បាត់បង់ជីវិត ដោយសារជំងឺនេះ បន្ទាប់ពីត្រូវឆ្កែខាំ។
បើយោងតាមកាសែត South China Morning Post បានរាយការណ៍ថា បុរសជនជាតិឥណ្ឌូណេស៊ីម្នាក់អាយុ៣៥ឆ្នាំ បានស្លាប់ដោយសារជំងឺឆ្កែឆ្កួត កាលពីសប្តាហ៍មុន បន្ទាប់ពីមានរោគសញ្ញាដូចជា គេងមិនលក់ និងក្តៅខ្លួនខ្លាំង។ ប្រព័ន្ធផ្សព្វផ្សាយក្នុងស្រុកបានរាយការណ៍ថា បុរសរូបនោះ ត្រូវឆ្កែអនាថាមួយក្បាលខាំកាលពី៦ខែមុន នៅស្រុកស៊ូកាសាដា (Sukasada) ដែលធ្វើដំណើរប្រហែលពីរម៉ោងពីទីក្រុងដេនប៉ាសា (Denpasar) របស់កោះបាលី។ ហើយជំនួសឱ្យការស្វែងរកការព្យាបាលពីពេទ្យជំនាញ បុរសរូបនោះគ្រាន់តែលាងមុខរបួសធម្មតាប៉ុណ្ណោះ។
យោងតាមកាសែត The Bali Sun បានឱ្យដឹងថា លោក Ni Made Suparmi ប្រធានផ្នែកចិញ្ចឹមសត្វ និងសុខភាពសត្វ នៃសេវាកសិកម្មទីក្រុងដេនប៉ាសា បានប្រាប់អ្នកសារព័ត៌មានថា គិតត្រឹមថ្ងៃទី១៩ ខែកុម្ភៈ អាជ្ញាធរបានចាក់វ៉ាក់សាំងឆ្កែចំនួន ២,២៦៦ក្បាល គិតជាភាគរយត្រឹមតែ ២.៧៥% នៃចំនួនឆ្កែសរុបនៅទីនោះ។
រយៈពេលនៃការកកើតជំងឺឆ្កែឆ្កួតជាធម្មតាចាប់២-៣ខែ ប៉ុន្តែរោគសញ្ញាអាចលេចឡើងក្នុងរយៈពេលមួយឆ្នាំ អាស្រ័យលើកត្តាដូចជា ការផ្ទុកមេរោគ និងចំណុចចូលទៅក្នុងខ្លួនមនុស្ស។ នៅឆ្នាំនេះ អាជ្ញាធរក្នុងតំបន់មានគោលបំណងចាក់វ៉ាក់សាំងឆ្កែឆ្កួតរហូតដល់ ៩១% នៃចំនួនឆ្កែសរុប ៧៤,០០០ក្បាល ដែលបានប៉ាន់ស្មាននៅក្នុងទីក្រុងដេនប៉ាសា ដើម្បីទប់ស្កាត់ការរីករាលដាលនៃជំងឺឆ្កែឆ្កួត។
បើតាមប្រព័ន្ធផ្សព្វផ្សាយក្នុងស្រុកបានរាយការណ៍កាលពីខែមករាថាមាន៧ករណីស្លាប់ដោយសារជំងឺឆ្កែឆ្កួតនៅលើកោះ កាលពីឆ្នាំមុនពីចំនួនមនុស្សជិត៥៦,០០០នាក់ ដែលត្រូវឆ្កែឆ្កួតខាំ។ ទោះយ៉ាងណាចំនួនអ្នកស្លាប់បានថយចុះធៀបនឹងឆ្នាំ២០២៣។ ជាមួយគ្នានោះ អាជ្ញាធរអះអាងថា ពលរដ្ឋជាច្រើននៅតែស្ទាក់ស្ទើររាយការណ៍ករណីឆ្កែខាំមក អាជ្ញាធរ ដោយសារពួកគេជឿថា ឆ្កែចិញ្ចឹមពួកគេមិនមានផ្ទុកមេរោគនោះទេ។
សូមជម្រាបថា កោះបាលីដែលល្បីល្បាញសម្រាប់ទេសភាពស្រស់ស្អាតដ៏អស្ចារ្យ ឆ្នេរដ៏បរិសុទ្ធ និងបេតិកភណ្ឌវប្បធម៌ដ៏សម្បូរបែបនោះ បានស្វាគមន៍ភ្ញៀវទេសចរបរទេសចំនួន ៦.៣លាននាក់ កាលពីឆ្នាំមុន ដែលលើសពីកម្រិតមុនការរាតត្បាតជំងឺកូវីដ១៩។ ហើយសម្រាប់ឆ្នាំនេះ កោះបាលីបានកំណត់គោលដៅស្វាគមន៍ភ្ញៀវបរទេសចំនួន ៦.៥លាននាក់៕
ចែករំលែកព័តមាននេះ