មេបញ្ជាការរបស់កងជីវពលមូលដ្ឋានមួយរាយការណ៍កាលពីថ្ងៃទី១១ ធ្នូ ថា ការបាញ់តគ្នាបានផ្ទុះឡើងកាលពីយប់ថ្ងៃទី១០ មកទី១១ ធ្នូ នៅជិតព្រលានយន្តហោះអន្តរជាតិក្រុងទ្រីប៉ូលីរវាងពួកអ្នកទទួលខុសត្រូវនៃកងទ័ពលីប៊ីថ្មី និងពួកជីវពលប្រដាប់អាវុធ ។ ការប៉ះទង្គិចគ្នានេះជាការប៉ះទង្គិចគ្នាចុងក្រោយមួយក្រោយការប៉ះទង្គិចគ្នាមួយចំនួនរវាងពួកជីវពលដែលប្រជែងរកអំណាចពិតប្រាកដនៅតាមវិថីនានានៃរដ្ឋធានីលីប៊ី ខណៈដែលរដ្ឋាភិបាលកណ្តាលមួយនៅពុំទាន់ធ្វើប្រតិបត្តិការពេញលេញ ។
យោងតាមមេបញ្ជាការពួកជីវពល២រូបថា ការប៉ះទង្គិចគ្នាកើតឡើងពេលក្បួនរថយន្តរបស់នាយសេនាធិការបណ្តោះអាសន្ន លោកខាលឺហ្វា ហាហ្វតារ បានមកដល់ក្បែរប៉ុស្តិ៍ត្រួតពិនិត្យមួយស្ថិតនៅចម្ងាយ៣គីឡូម៉ែត្រ ពីព្រលានយន្តហោះ។ វរសេនីយ៍ឯកមុកតារ ហ្វ័រណាណា គូសបញ្ជាក់ថា លោកខាលឺហ្វា ហាហ្វតារ និងក្បួនរថយន្តរបស់លោកបានមកដល់ប៉ុស្តិ៍ត្រួតពិនិត្យ ហើយពុំព្រមឈប់ដូចការស្នើ។
ពេលនោះពួកអ្នកប្រចាំការនៅប៉ុស្តិ៍នេះបានប៉ុនប៉ងឃាត់ឱ្យឈប់តែត្រូវកងការពាររបស់លោកហាហ្វតារ បាញ់ប្រហារ បណ្តាលឱ្យមនុស្ស២នាក់ត្រូវរបួស។ ក្បួនរថយន្តនេះត្រូវបានដេញតាមរហូតដល់ជំរំយោធាមួយនៅជិតហាមហ្សា ជាកន្លែងផ្ទុះការបាញ់តគ្នាជាលើកទី២ ។ ដោយមានអន្តរាគមន៍របស់បណ្តាមេដឹកនាំលីប៊ីថ្មី ទើបអំពើហិង្សាត្រូវបញ្ចប់ ៕
ចែករំលែកព័តមាននេះ