អន្តរជាតិ ៖ ប្រទេសម៉ាឡេស៊ី និងប្រទេសថៃ បានជាប់ចំណាត់ថ្នាក់ក្នុងចំណោមប្រទេសជាគោលដៅល្អបំផុតទាំង១០នៅលើពិភពលោកឆ្នាំ ២០២៥ សម្រាប់និវត្តន៍ជន។ នេះបើយោងតាមរបាយការណ៍ប្រចាំឆ្នាំរបស់ទស្សនាវដ្តី International Living…
អន្តរជាតិ ៖ ប្រទេសម៉ាឡេស៊ី និងប្រទេសថៃ បានជាប់ចំណាត់ថ្នាក់ក្នុងចំណោមប្រទេសជាគោលដៅល្អបំផុតទាំង១០នៅលើពិភពលោកឆ្នាំ ២០២៥ សម្រាប់និវត្តន៍ជន។ នេះបើយោងតាមរបាយការណ៍ប្រចាំឆ្នាំរបស់ទស្សនាវដ្តី International Living ដែលមានមូលដ្ឋាននៅក្នុងប្រទេសអៀរឡង់បានចេញផ្សាយ។
ប្រទេសម៉ាឡេស៊ីជាប់ចំណាត់ថ្នាក់ទី៧។ ចំណែកប្រទេសថៃជាប់ចំណាត់ថ្នាក់ទី១០ នៅក្នុងសន្ទស្សន៍ប្រាក់សោធននិវត្តន៍សកលប្រចាំឆ្នាំ ២០២៥ ដោយផ្អែកលើការវាយតម្លៃកត្តាដូចជា លំនៅដ្ឋាន ទិដ្ឋាការ អត្ថប្រយោជន៍ តម្លៃចំណាយលើការរស់នៅ ការថែទាំសុខភាព លក្ខខណ្ឌអាកាសធាតុ ការអភិវឌ្ឍន៍ អភិបាលកិច្ច និងចំណាត់ថ្នាក់នៃការទំនាក់ទំនង។
យោងតាមរបាយការណ៍ខាងលើ ប្រទេសម៉ាឡេស៊ីមានភាពទាក់ទាញដ៏សំខាន់ ដែលអនុញ្ញាតឱ្យអ្នកចូលនិវត្តន៍ទទួលបានកម្រិតជីវភាពរស់នៅល្អ ជាមួយនឹងការចំណាយដ៏សមរម្យ។ នៅទីក្រុងកូឡាឡាំពួរ (Kuala Lumpur) អាផាតមិនមួយបន្ទប់ជាធម្មតាជួលក្នុងតម្លៃ ៣០០-៥០០ដុល្លារអាមេរិកក្នុងមួយខែ ជាមួយឧបករណ៍ប្រើប្រាស់មានតម្លៃប្រហែល ៤០-៦០ដុល្លារ។ ការទទួលទានអាហារនៅក្រៅផ្ទះវិញ ក៏មានតម្លៃថោកផងដែរ ដោយអាហារក្នុងស្រុកមានតម្លៃត្រឹមតែ ២ ទៅ ៣ ដុល្លារប៉ុណ្ណោះ។ លើសពីទីក្រុងកូឡាឡាំពួរ រដ្ឋផ្សេងទៀត ដូចជាប៉េណាង (Penang) និងម៉ាឡាកា (Malacca) ក៏ផ្តល់ជូននូវតម្លៃដ៏ល្អឥតខ្ចោះផងដែរទាក់ទាញនិវត្តន៍ជន។
ប្រទេសម៉ាឡេស៊ីមានអាកាសធាតុត្រូពិច និងសីតុណ្ហភាពចាប់ពី ២៥-៣៥ អង្សាសេ។សម្រាប់ការស្នាក់នៅរយៈពេលវែង ប្រទេសអាស៊ីអាគ្នេយ៍មួយនេះ ផ្តល់ជូននូវជម្រើសទិដ្ឋាការជាច្រើនតម្រូវសម្រាប់និវត្តន៍ជន និងជនបរទេសស្នាក់នៅម៉ាឡេស៊ីតែធ្វើការពីចម្ងាយដោយប្រើបច្ចេកវិទ្យាឌីជីថល និងអ៊ីនធឺណិតទៅកាន់ប្រទេសផ្សេងទៀត ដែលត្រូវបានហៅថា Digital Nomad Visa។
របាយការណ៍ដដែលនេះ ក៏បានរាយការណ៍ថា ប្រទេសថៃគឺជាបេះដូងនៃអាស៊ីអាគ្នេយ៍ ដោយរួមបញ្ចូលគ្នានូវប្រាសាទបុរាណជាមួយនឹងអគារខ្ពស់ៗ រថភ្លើងល្បឿនលឿន ទូកកន្ទុយវែង និងភោជនីយដ្ឋានគ្រប់កម្រិតជាច្រើន។ នៅទីក្រុងបាងកក និវត្តន៍ជនអាចជួលអាផាតមិនប្រភេទ Studio Room មានតម្លៃប្រហែល៦០០ដុល្លារក្នុងមួយខែ ចំណាយប្រហែល១៥ដុល្លារក្នុងមួយថ្ងៃលើការញ៉ាំអាហារ និងដើរលេងជុំវិញទីក្រុងក្នុងតម្លៃតិចជាង១០០ដុល្លារក្នុងមួយខែ។
ខេត្តឈៀងម៉ៃ ដែលល្បីល្បាញដោយសារព្រះវិហារពុទ្ធសាសនា និងបរិយាកាសស្ងប់ស្ងាត់ ក៏ជាជម្រើសដ៏ពេញនិយមសម្រាប់និវត្តន៍ជនផងដែរ។ អាផាតមិនមួយបន្ទប់គេងដ៏ធំទូលាយនៅទីនោះមានតម្លៃក្រោម៥០០ដុល្លារក្នុងមួយខែ ខណៈការទទួលទានអាហារនៅតូបលក់អាហារដ៏ពេញនិយមអាចមានតម្លៃ១២ដុល្លារ សម្រាប់មនុស្សពីរនាក់។
ប្រទេសថៃក៏មានគោលនយោបាយទិដ្ឋាការងាយស្រួលបំផុតមួយនៅលើពិភពលោក សម្រាប់និវត្តន៍ជនដោយផ្តល់ការស្នាក់នៅរហូតដល់១០ឆ្នាំ សម្រាប់ជនបរទេសដែលទទួលបានសិទ្ធិ។
យ៉ាងណាមិញ ក្នុងបញ្ជីដដែលនេះ ប្រទេសប៉ាណាម៉ាឈរនៅកំពូលតារាង គឺជាប្រទេសល្អបំផុតសម្រាប់និវត្តន៍ជនប្រចាំឆ្នាំ ២០២៥ តាមពីក្រោយដោយប្រទេសព័រទុយហ្គាល់ កូស្តារីកា ម៉ិកស៊ិក បារាំង អេស្ប៉ាញ ក្រិក និងអ៊ីតាលី៕ ដកស្រង់ ៖ VnExpress
ចែករំលែកព័តមាននេះ