រាជធានីភ្នំពេញ ៖ គណៈបញ្ជាការឯកភាពខណ្ឌ ៧មករា បានបន្តការចុះធ្វើរដ្ឋបាលនៅតំបន់អគារបុរីកីឡា និងបាននាំមនុស្សចំនួន៤នាក់ ទៅអធិការដ្ឋាននគរបាលខណ្ឌ កាលពីព្រឹកថ្ងៃទី២៨ ខែមេសា ឆ្នាំ២០២៥…
រាជធានីភ្នំពេញ ៖ គណៈបញ្ជាការឯកភាពខណ្ឌ ៧មករា បានបន្តការចុះធ្វើរដ្ឋបាលនៅតំបន់អគារបុរីកីឡា និងបាននាំមនុស្សចំនួន៤នាក់ ទៅអធិការដ្ឋាននគរបាលខណ្ឌ កាលពីព្រឹកថ្ងៃទី២៨ ខែមេសា ឆ្នាំ២០២៥ ។ លោក ថេង សុថុល អភិបាលខណ្ឌ បានចាត់ឲ្យលោកណុប ផា អភិបាលរងខណ្ឌ ដឹកនាំកម្លាំងគណៈបញ្ជាការឯកភាព ចុះធ្វើរដ្ឋបាលនៅតំបន់ដែលមានភាពស្មុគស្មាញ ក្នុងភូមិសាស្ត្ររបស់ខ្លួន ។
ការចុះធ្វើរដ្ឋបាលនេះ គឺដើម្បីបង្ការទប់ស្កាត់នូវរាល់បញ្ហាអសន្តិសុខ ដែលអាចកើតមានឡើង បង្កភាពភ័យខ្លាចដល់ពលរដ្ឋ និងបានឃាត់ខ្លួនមនុស្សប្រុសស្រីចំនួន៤នាក់ ធ្វើតេស្តរកសារធាតុញៀន រួចបញ្ជូនទៅមន្ទីរសង្គមកិច្ចអតីតយុទ្ធជន និងយុវនីតិសម្បទា ធ្វើការកែប្រែអប់រំបន្ត ។
លោក ណុប ផា បានឱ្យដឹងថា អាជ្ញាធរខណ្ឌតែងតែយកចិត្តទុកដាក់ក្នុងការចុះធ្វើរដ្ឋបាលជាប់ជាប្រចាំនៅតំបន់អគារបុរីកីឡានេះ ព្រោះតំបន់នេះ ជាតំបន់ភូមិសាស្ត្រស្មុគស្មាញ ឧស្សាហ៍កើតមានសកម្មភាពក្មេងទំនើង ជនញៀនថ្នាំ និងអំពើអសន្តិសុខមួយចំនួន ដែលកើតមានឡើងទាំងពេលយប់ និងពេលថ្ងៃ បង្កជាក្តីព្រួយបារម្ភដល់ពលរដ្ឋរស់នៅក្នុងតំបន់អគារមួយនេះ ។
លោកអភិបាលរងខណ្ឌបន្តថា ភាពអនាធិបតេយ្យ និងសកម្មភាពអសន្តិសុខមួយចំនួននៅតំបន់បុរីកីឡា ត្រូវបានបង្ក្រាប ដែលបច្ចុប្បន្នមានភាពល្អប្រសើរឡើងច្រើនហើយ។ ទោះជាយ៉ាងណា កម្លាំងអាជ្ញាធរ ក៏មិនបានបន្ធូរដៃក្នុងការមានវិធានការរដ្ឋបាលលើបញ្ហានេះឡើយ គឺនៅបន្តធ្វើកិច្ចការងារនេះ រហូតទទួលបានប្រសិទ្ធភាពខ្ពស់ ដើម្បីជាការធានាបានសន្តិសុខល្អជូនពលរដ្ឋ ។
ប្រជាពលរដ្ឋរស់នៅតំបន់បុរីកីឡានេះ បានសម្តែងក្តីសប្បាយរីករាយ និងពេញចិត្តបំផុត ចំពោះសកម្មភាពចុះធ្វើរដ្ឋបាលរបស់អាជ្ញាធរ។នេះជាការទប់ស្កាត បង្ការបានពីសកម្មភាពអសន្តិសុខនានា ដែលតែងកើតមានឡើងពីសំណាក់ជនទំនើង ឬមុខសញ្ញាជាក្រុមជនសង្ស័យផ្សេងៗ ដែលយកតំបន់អគារបុរីកីឡាជាទីកន្លែងសម្រាប់ប្រព្រឹត្តបទល្មើស ឬប្រើប្រាស់គ្រឿងញៀនជាដើម ។
សូមបញ្ជាក់ថា នេះមិនមែនជាលើកទី១នោះទេ ដែលកម្លាំងគណៈបញ្ជាការឯកភាពខណ្ឌ ៧មករា ចុះធ្វើរដ្ឋបាលនៅតំបន់បុរីកីឡានេះ ។ការចុះធ្វើរដ្ឋបាលកាលពីពេលកន្លងៗទៅ គឺតែងតែបានប្រមូលក្រុមជនទំនើង ក្មេងញៀនថ្នាំ ជនអនាថា ឬជនសង្ស័យមួយចំនួន ដែលបានប្រព្រឹត្តបទល្មើសលួច ឆក់ ឬគ្រឿងញៀនជាដើម ដោយបានដកហូតវត្ថុតាងជាច្រើនជាបន្តបន្ទាប់ និងបានឃាត់ខ្លួនមនុស្ស ហើយបានប្រើវិធានការអប់រំ រួមជាមួយវិធានការច្បាប់ ៕
ចែករំលែកព័តមាននេះ