រាជធានីភ្នំពេញ ៖ សម្តេចបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជាបានគូសបញ្ជាក់ថា ទោះបីជាពេលបច្ចុប្បន្នកម្ពុជាបាន និងកំពុងជួបបញ្ហាប្រឈមជាមួយសមរភូមិសង្គ្រាមពាណិជ្ជកម្មក៏ដោយ ប៉ុន្តែរាជរដ្ឋាភិបាលកម្ពុជាដឹកនាំដោយគណបក្សប្រជាជនកម្ពុជា មិនរត់ចោលប្រជាពលរដ្ឋនោះទេ…
រាជធានីភ្នំពេញ ៖ សម្តេចបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជាបានគូសបញ្ជាក់ថា ទោះបីជាពេលបច្ចុប្បន្នកម្ពុជាបាន និងកំពុងជួបបញ្ហាប្រឈមជាមួយសមរភូមិសង្គ្រាមពាណិជ្ជកម្មក៏ដោយ ប៉ុន្តែរាជរដ្ឋាភិបាលកម្ពុជាដឹកនាំដោយគណបក្សប្រជាជនកម្ពុជា មិនរត់ចោលប្រជាពលរដ្ឋនោះទេ នៅតែបន្តខាំស្មៅជាមួយពលរដ្ឋជានិច្ច ។
ក្នុងពិធីសម្ពោធដាក់ឲ្យប្រើប្រាស់ ផ្លូវជាតិលេខ៣១, ៣៣,៤១ នាខេត្តតាកែវ នាព្រឹកថ្ងៃទី២៩ ខែមេសា ឆ្នាំ២០២៥ សម្តេចមហាបវរធិបតី ហ៊ុន ម៉ាណែត បានលើកឡើងថា នៅទូទាំងពិភពលោក បានជួបបញ្ហាជាបន្តបន្ទាប់មិនចេះអស់ មិនចេះហើយ ចប់ពីមួយចូលមួយ ។
ជាក់ស្តែង បន្ទាប់ពីបញ្ចប់បញ្ហាជំងឺកូវីដ ជាសកលមកចូលមកដល់សង្គ្រាមប្រដាប់អាវុធរវាងរុស្ស៊ី និងអ៊ុយក្រែន ហើយសព្វថ្ងៃនេះទៀត ទាំងកម្ពុជា និងបណ្តាប្រទេសជាច្រើន ក្នុងពិភពលោក កំពុងជួបបញ្ហាប្រឈមសង្គ្រាមពាណិជ្ជកម្ម ។ ចំពោះបញ្ហាខាងលើនេះ សម្តេចបវរធិបតីអះអាងថា នៅទូទាំងសកលលោក បានខកខានក្នុងការជួបប្រទះអស់រយៈពេលប្រមាណជា១០០ឆ្នាំមកហើយ ។ ប៉ុន្តែក្នុងពេលកំពុងជួបបញ្ហាទាំងអស់នេះ សម្តេចនាយករដ្ឋមន្ត្រីសង្កត់ធ្ងន់ថា គឺរាជរដ្ឋាភិបាលមិនបោះបង់ពលរដ្ឋម្នាក់ណាចោលនោះទេ នៅតែបន្តរួមរស់ជាមួយគ្នា ពោល គឺបន្តខាំស្មៅជាមួយប្រជាពលរដ្ឋ ។
សម្តេចធិបតី នាយករដ្ឋមន្ត្រីបានអះអាងថា រាជរដ្ឋាភិបាលកម្ពុជាដែលដឹកនាំដោយសម្តេចផ្ទាល់ កើតចេញពីគណបក្សប្រជាជនកម្ពុជា មិនរត់ចោលប្រជាពលរដ្ឋឡើយ គឺនៅតែបន្តខិតខំប្រឹងប្រែងការពារផលប្រយោជន៍ និងធានាជីវភាពរស់នៅរបស់ពលរដ្ឋ ។
ជាមួយគ្នានោះដែរ សម្តេចបវរធិបតីគូសបញ្ជាក់ថា ៖«យើងធ្វើពាណិជ្ជកម្មគ្រប់ប្រទេសទាំងអស់ អត់មានរើសពីណាគេទេ យើងធ្វើការងារជាមួយបណ្តាគ្រប់ប្រទេស ។ យើងនាំចេញគ្រប់ទំនិញទាំងអស់យើងមិនពឹងផ្អែកតែទៅលើទេសចរណ៍ យើងមិនពឹងផ្អែកតែទៅលើឧស្សាហ៍កម្ម យើងមិនពឹងផ្អែកតែទៅលើកសិកម្មទេ យើងត្រូវពង្រាយសក្តានុពល និងទាញយកសក្តានុពលរបស់ប្រទេសរបស់យើង ដើម្បីឲ្យបានគ្រប់វិស័យបង្កើតការងារឲ្យគ្រប់ច្រកល្ហក់ជូនប្រជាពលរដ្ឋយើងទាំងទីផ្សារក្នុងស្រុក និងក្រៅស្រុក ។ យើងធ្វើយ៉ាងណាបន្តដើរទៅមុខទៀត ប្រទេសយើងមិនឈប់ទេ ហើយសូមជឿចុះរដ្ឋាភិបាលមិនរត់ចោលបងប្អូនទេ យើងនៅខាំស្មៅជាមួយគ្នា» ។
សូមបញ្ជាក់ថា កាលពីថ្ងៃ៣ មេសា រដ្ឋបាលសហរដ្ឋអាមេរិកដឹកនាំដោយលោក ដូណាល់ ត្រាំ ប្រធានាធិបតីអាមេរិកបានប្រកាសដំឡើងពន្ធទៅដល់បណ្តាប្រទេសស្ទើរតែទាំងអស់នៅក្នុងពិភពលោករួមទាំងកម្ពុជាផងដែរ ដែលដំឡើងដល់៤៩% លើផលិតផលកម្ពុជា ៕
ចែករំលែកព័តមាននេះ