បង្ក្រាបជនសង្ស័យមួយសំបុកធំនាំមកបង្ហាញមុខ
- ភ្នំពេញ
រាជធានីភ្នំពេញ ៖ នគរបាលបង្ហាញមុខជនសង្ស័យលួច ឆក់ បង្កហិង្សា គំរាមកំហែង បន្លំឯកសារ រំលោភលើទំនុកចិត្ត ជួញដូរមនុស្ស និងបង្ខាំងមនុស្សដោយខុសច្បាប់ចំនួន៣២នាក់…
រាជធានីភ្នំពេញ ៖ នគរបាលបង្ហាញមុខជនសង្ស័យលួច ឆក់ បង្កហិង្សា គំរាមកំហែង បន្លំឯកសារ រំលោភលើទំនុកចិត្ត ជួញដូរមនុស្ស និងបង្ខាំងមនុស្សដោយខុសច្បាប់ចំនួន៣២នាក់ ត្រូវបានកម្លាំងនគរបាលជំនាញ នៃស្នងការដ្ឋាននគរបាលរាជធានីភ្នំពេញ និងនៅតាមបណ្ដាខណ្ឌនានា ស្រាវជ្រាវបង្ក្រាបបានជាបន្តបន្ទាប់ ក្នុងរយៈពេល៣ថ្ងៃ ហើយយកទៅបង្ហាញមុខជាសាធារណៈរួមគ្នានៅស្នងការដ្ឋាននគរបាលរាជធានីភ្នំពេញ កាលពីព្រឹកថ្ងៃទី២៨ ខែមេសា ឆ្នាំ២០២៥ នេះ ។
មន្ត្រីនគរបាលបានឲ្យដឹងថា ដោយអនុវត្តតាមបទបញ្ជារបស់លោកឧត្ដមសេនីយ៍ឯក ជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ និងដឹកនាំបញ្ជាផ្ទាល់ដោយលោកឧត្ដមសេនីយ៍ត្រី ប៊ុន សត្យា ស្នងការរងផែនការងារព្រហ្មទណ្ឌ កម្លាំងការិយាល័យនគរបាលព្រហ្មទណ្ឌកម្រិតស្រាល បានសហការជាមួយនគរបាលនៅតាមបណ្ដាលខណ្ឌនានា ធ្វើការស្រាវជ្រាវបង្ក្រាបបទល្មើសជាក់ស្តែងជាបន្តបន្ទាប់ ។
តាមរបាយការណ៍នៃការបង្ហាញមុខជនសង្ស័យ នៅថ្ងៃទី២៨ ខែមេសា របស់ស្នងការដ្ឋាននគរបាលរាជធានីភ្នំពេញ ផែន ការ ងារ ន គរ បាល ព្រហ្ម ទណ្ឌ បាន ឱ្យ ដឹងថា ដោយ មាន ការស្រាវជ្រាវបង្ក្រាបជាក់ស្តែងក្នុងរយៈ៣ថ្ងៃ គឺចាប់ពីថ្ងៃទី២៦រហូតដល់ថ្ងៃទី២៨ ខែមេសា ឆ្នាំ២០២៥ ជាលទ្ធផល បង្ក្រាបបានសរុប១៣ករណី ដោយឃាត់ខ្លួនជនសង្ស័យបានចំនួន២៧នាក់ ក្នុងនោះស្រី៣នាក់ និងជនជាតិបរទេសចំនួន២នាក់(ជនជាតិចិន១នាក់ ជនជាតិស៊ុយអែត១នាក់) ។ នៅក្នុងនោះមានករណី លួច ឆក់ បង្កហិង្សា គំរាមកំហែង បន្លំឯកសារ រំលោភលើទំនុកចិត្ត ជួញដូរមនុស្ស និងបង្ខាំងមនុស្សដោយខុសច្បាប់ ។
តាមនគរបាលបានឱ្យដឹងទៀតថា ក្នុងចំណោមជនសង្ស័យចំនួនទាំង២៧នាក់ ក្នុងនោះនគរបាលការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានីភ្នំពេញ បង្ក្រាបបាន៣ករណី ដោយឃាត់ខ្លួនបានជនសង្ស័យចំនួន១០នាក់ ៖
ក្នុងនោះករណីហិង្សាដោយចេតនាមានស្ថានទម្ងន់ទោសចំនួន២ករណី ឃាត់ខ្លួនបានចំនួន៦នាក់ និងករណីជួញដូរមនុស្ស ចាប់ឃុំឃាំង និងបង្ខាំងខុសច្បាប់១ករណី ឃាត់ខ្លួនបានចំនួន ៤នាក់ ។
នគរបាលខណ្ឌឫស្សីកែវ បង្ក្រាបបាន១ករណី ឃាត់ខ្លួនជនសង្ស័យចំនួន៧នាក់ (ស្រី៣នាក់) ក្លែងបន្លំឯកសារសាធារណៈ និងរំលោភលើទំនុកចិត្ត ដោយយកប្រាក់ធ្វើសញ្ញាបត្រមធ្យមសិក្សាទុតិយភូមិក្លែងក្លាយ ។
នគរបាលខណ្ឌទួលគោក បង្ក្រាបបាន៣ករណី ឃាត់ខ្លួនបានជនសង្ស័យចំនួន៤នាក់ ករណីលួច និងឆក់ ។
នគរបាលខណ្ឌ៧មករា បង្ក្រាបបាន២ករណី ឃាត់ខ្លួនជនសង្ស័យ២នាក់ ពីបទគំរាមកំហែង និងសម្លាប់ ដោយកកូនកាំបិតចុងស្រួចដេញចាក់មកលើជនរងគ្រោះ ។
នគរបាលខណ្ឌពោធិ៍សែនជ័យ បង្ក្រាបបាន២ករណី ឃាត់ខ្លួនជនសង្ស័យ២នាក់ លួចម៉ូតូ និងលួចកុំព្យូទ័រ ។
នគរបាលខណ្ឌចំការមន បង្ក្រាបបាន២ករណី ឃាត់ខ្លួនបាន២នាក់ គឺជនជាតិបរទេស(ជនជាតិចិនលួចយកម៉ូតូកង់៣ ជនជាតិស៊ុយអែតលួចម៉ូតូ) ។
ដោយឡែកជនសង្ស័យចំនួន៥នាក់ទៀត សមត្ថកិច្ចពុំបានបញ្ជាក់ថា ជាករណីអ្វីឱ្យពិតប្រាកដនោះឡើយ ដោយដាក់បញ្ចូលបង្ហាញមុខរួមគ្នានៅព្រឹកនេះផងដែរ សរុបទាំងអស់៣២នាក់ ។ ជនសង្ស័យទាំង៣២នាក់ ត្រូវបានកម្លាំងនគរបាលជំនាញ និងនគរបាលនៅតាមបណ្ដាខណ្ឌ កសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ ដើម្បីចាត់ការតាមច្បាប់ ៕
ចែករំលែកព័តមាននេះ