ទីក្រុងម៉ូស្គូ៖ នេះជាដំណឹងល្អកម្ររកបាន។ នៅទីបំផុត លោកពូទីនប្រកាសបទឈប់បាញ់ដ៏ពេញលេញ១នៅក្នុងសង្គ្រាមអ៊ុយក្រែន មានន័យថាផ្អាកផ្ទុះអាវុធទាំងស្រុងលើគ្រប់សមរភូមិទាំងអស់។ ប៉ុន្តែជាបទឈប់បាញ់រយៈពេលខ្លីចាប់ពីថ្ងៃទី៨-១០ ខែឧសភាដើម្បីអបអរសាទរទិវាជ័យជម្នះលើរបបណាហ្ស៊ីអាល្លឺម៉ង់នៅអំឡុងសង្គ្រាមលោកលើកទី២។
វិមានក្រឹមឡាំងថ្លែងថាលោកពូទីនបញ្ជាឱ្យត្រៀមផ្អាកផ្ទុះអាវុធលើគ្រប់សមរភូមិដោយផ្អែកទៅលើគោលការណ៍មនុស្សធម៌នៅក្នុងឱកាសដែលរុស្ស៊ីរៀបចំទិវាជ័យជម្នះនៅថ្ងៃទី៩ ខែឧសភា។ ចំណាត់ការនេះធ្វើឡើងស្របពេលដែលលោកត្រាំកំពុងចង់បានបទឈប់បាញ់នេះជាខ្លាំង។ លោកចង់បានបទឈប់បាញ់រយៈពេល៣០ថ្ងៃ ប៉ុន្តែលោកពូទីនឈប់បាញ់តែបីថ្ងៃ។
នៅលើសមរភូមិជាក់ស្ដែងកាលពីយប់មិញ រុស្ស៊ី និងអ៊ុយក្រែនបន្តវាយប្រហារគ្នាឥតបន្ធូរដៃ។ ក្រសួងការពារជាតិរុស្ស៊ីថ្លែងថាខ្លួនបានបាញ់ទម្លាក់ដ្រូនរបស់អ៊ុយក្រែន១១៩គ្រឿងដែលហោះទៅវាយប្រហារតំបន់ប្រ៊ីយ៉ង់ (Bryansk) ស្ថិតនៅជាប់នឹងព្រំដែនរុស្ស៊ី-អ៊ុយក្រែនតែម្ដង។ រីឯនៅអ៊ុយក្រែន គេស្ដាប់ឮសំឡេងស៊ីរ៉ែនប្រកាសអាសន្នស្រែកកងរំពឹងនៅពេលទៀបភ្លឺ។
សំណើឈប់បាញ់ដែលបញ្ជូនដោយអាមេរិកត្រូវរុស្ស៊ីច្រានចោលម្ដងជាពីរដង។ រុស្ស៊ីបានដាក់លក្ខខណ្ឌជាច្រើនត្រឡប់ទៅវិញ។ កាលពីពេលជួបគ្នាម្សិលមិញនៅពេលទៅចូលរួមគោរពវិញ្ញាណក្ខន្ធសម្ដេចសង្ឃ លោកត្រាំ លោកម៉ាក្រុង និងលោកហ្សេឡិនស្គីបានឯកភាពគ្នាថានឹងខិតខំរៀបចំសំណើឈប់បាញ់ដ៏ហ្មត់ចត់មួយនៅក្នុងរយៈពេលប៉ុន្មានថ្ងៃខាងមុខនេះ។
ចំណុចសំខាន់មួយដែលធ្វើឱ្យអាមេរិកមិនទាន់ដកខ្លួនថយទៅណាដោយសារកិច្ចព្រមព្រៀងរ៉ែកម្រ។ ការចរចារ៉ែកម្រហាក់ដូចជារីកចម្រើនទៅមុខគួរឱ្យកត់សម្គាល់។ ភាគីទាំង២ អាមេរិក និងអ៊ុយក្រែន បានឯកភាពគ្នាថាអាមេរិកមិនត្រូវការទាមទារត្រឡប់មកវិញនូវជំនួយយោធាដែលខ្លួនបានផ្ដល់ទៅឱ្យអ៊ុយក្រែនទេ។ នេះបើតាមនាយករដ្ឋមន្ត្រីអ៊ុយក្រែន លោកដេនីស ស្ម៊ីហាល (Denys Shmyhal)។
ការប្រកាសបទឈប់បាញ់នេះធ្វើឡើងតែប៉ុន្មានម៉ោងប៉ុណ្ណោះបន្ទាប់ពីកូរ៉េខាងជើងទទួលស្គាល់ថាខ្លួនបានបញ្ជូនកងទ័ពទៅជួយរុស្ស៊ីនៅតំបន់ខឺសពិតមែន។ ថ្ងៃនេះ លោកពូទីនអរគុណកូរ៉េខាងជើងដែលជួយទាំងកងទ័ព ទាំងសម្ភារៈសឹក។ អាមេរិក និងបស្ចិមប្រទេសប៉ាន់ស្មានថាទាហានកូរ៉េខាងជើងដែលបញ្ជូនទៅខឺសប្រហែល១,៤ពាន់នាក់។ ចំនួននេះគិតទាំងទាហានជាងបីពាន់នាក់ដែលបញ្ជូនទៅលើកទី២ដើម្បីជំនួសកងទ័ពដែលបានស្លាប់ និងរបួស។ នេះបើយោងតាមប្រភពពីទីភ្នាក់ងារព័ត៌មានអេភី (AP) និងប្រភពដទៃទៀត៕
ចែករំលែកព័តមាននេះ