អន្តរជាតិ ៖ បណ្តាមេដឹកនាំអឺរ៉ុបប្រមូលគ្នា ដើម្បីឈរពីក្រោយ និងគាំទ្រលោក វ្ល៉ូឌីមៀរ ហ្សេឡេនស្គី (Volodymyr Zelensky) បន្ទាប់ពីកើតមានការតឹងសរសៃកដាក់គ្នារវាងប្រធានាធិបតីអ៊ុយក្រែនរូបនេះ…
អន្តរជាតិ ៖ បណ្តាមេដឹកនាំអឺរ៉ុបប្រមូលគ្នា ដើម្បីឈរពីក្រោយ និងគាំទ្រលោក វ្ល៉ូឌីមៀរ ហ្សេឡេនស្គី (Volodymyr Zelensky) បន្ទាប់ពីកើតមានការតឹងសរសៃកដាក់គ្នារវាងប្រធានាធិបតីអ៊ុយក្រែនរូបនេះ ជាមួយប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) នៅឯសេតវិមានកាលពីថ្ងៃសុក្រ ជុំវិញកិច្ចពិភាក្សាពាក់ព័ន្ធបញ្ហាសង្គ្រាមអ៊ុយក្រែន-រុស្ស៊ី។
លោក ត្រាំ ប៉ះទង្គិចពាក្យសម្តីជាច្រើនជាមួយលោក ហ្សេឡេនស្គី ដោយលោកចង់ផ្តោតជាសំខាន់លើការចុះហត្ថលេខាកិច្ចព្រមព្រៀងរ៉ែ។ លោកបានប្រាប់សមភាគីអ៊ុយក្រែនឱ្យធ្វើកិច្ចព្រមព្រៀងជាមួយរុស្ស៊ី ឬយើងទាំងពីរនាក់ដើរចេញទៅក្រៅ។ ហើយជាលទ្ធផល គ្មានការចុះហត្ថលេខាលើកិច្ចព្រមព្រៀង និងការធ្វើសន្និសីទសារព័ត៌មានអ្វីទាំងអស់។
យោងតាមប្រភពពីសារព័ត៌មាន BBC កាលពីថ្ងៃទី១ ខែមីនា បានឱ្យដឹងថា មេដឹកនាំប្រទេសអាល្លឺម៉ង់ បារាំង អេស្ប៉ាញ ប៉ូឡូញ ហូឡង់ និងជាមេដឹកនាំអឺរ៉ុបជាច្រើនផ្សេងទៀត ផ្ទុះប្រតិកម្មជុំវិញព្រឹត្តិការណ៍ដែលបានកើតឡើងនៅឯសេតវិមាន ដោយមេដឹកនាំទាំងនោះបានបង្ហោះសារនៅលើប្រព័ន្ធផ្សព្វផ្សាយសង្គម ដើម្បីគាំទ្រអ៊ុយក្រែនក្នុងន័យជារួមសំដៅថា «អ៊ុយក្រែនមិនឯកានោះទេ»។ ស្របពេលលោក ហ្សេឡេនស្គី ក៏បានឆ្លើយតបដោយផ្ទាល់ទៅកាន់សារលើកទឹកចិត្តនីមួយៗ ដើម្បីថ្លែងអំណរគុណចំពោះការគាំទ្រដ៏សំខាន់ស្ថិតក្នុងពេលវេលាដ៏លំបាកមួយនេះ។
ជាក់ស្តែង ការិយាល័យផ្លូវការរបស់នាយករដ្ឋមន្ត្រីចក្រភពអង់គ្លេសបានចេញផ្សាយថា ប្រធានាធិបតីអ៊ុយក្រែនបានធ្វើដំណើរមកដល់ទីក្រុងឡុងដ៍ ដើម្បីចូលរួមកិច្ចប្រជុំកំពូលរៀបចំដោយនាយករដ្ឋមន្ត្រីចក្រភពអង់គ្លេស លោក គែរ ស្តារម័រ (Keir Starmer) ដែលបន្តរក្សាការគាំទ្រមិនផ្លាស់ប្តូរសម្រាប់អ៊ុយក្រែន។
ខាងក្រោមនេះជាសម្រង់សារ និងការលើកឡើងដោយផ្ទាល់ពីមេដឹកនាំសំខាន់ៗ ពិភពលោក ដើម្បីចេញមុខការពារអ៊ុយក្រែន និងលោក ហ្សេឡេនស្គី ៖
-លោក Donald Tusk នាយករដ្ឋមន្ត្រីប៉ូឡូញ បានសរសេរថា «សូមគោរពលោក ហ្សេឡេនស្គី និងមិត្តភក្តិអ៊ុយក្រែនជាទីស្រឡាញ់ អ្នកនឹងមិនឯកោទេ»។
-លោក Gitanas Nausea ប្រធានាធិបតីលីទុយអានី៖ «អ៊ុយក្រែនអ្នកនឹងមិនដែលដើរតែម្នាក់ឯងនោះទេ»។
-លោកស្រី Mette Frederiksen នាយករដ្ឋមន្ត្រីដាណឺម៉ាក៖ «សូមគោរពលោក ហ្សេឡេនស្គី ដាណឺម៉ាកមានមោទនភាពជាមួយអ៊ុយក្រែន និងប្រជាជនអ៊ុយក្រែន»។
លោក Emmanual Macron ប្រធានាធិបតីបារាំង៖ «មានអ្នកឈ្លានពានគឺ រុស្ស៊ី។ មានមនុស្សត្រូវបានគេឈ្លានពានគឺ អ៊ុយក្រែន។ យើងបានធ្វើត្រឹមត្រូវក្នុងការជួយអ៊ុយក្រែន និងដាក់ទណ្ឌកម្មរុស្ស៊ីកាលពីបីឆ្នាំមុន ហើយបន្តធ្វើដូច្នេះទៀត។ យើង ក្នុងនោះទាំងជនជាតិអាមេរិក អឺរ៉ុប កាណាដា ជប៉ុន និងអ្នកផ្សេងជាច្រើនទៀត។ សូមអរគុណអ្នកទាំងអស់គ្នាដែលបានជួយ និងបន្តធ្វើដូច្នេះ។ ហើយគោរពអ្នកតាំងពីដើមនៃជម្លោះមកម្ល៉េះ។ ព្រោះពួកគេកំពុងតស៊ូដើម្បីសេចក្តីថ្លៃថ្នូរ ឯករាជ្យភាពរបស់ពួកគេ ដើម្បីកូនៗ និងដើម្បីសន្តិសុខអឺរ៉ុប»។
-លោក Pedro Sanchez នាយករដ្ឋមន្ត្រីអេស្ប៉ាញ៖ «អ៊ុយក្រែន អេស្ប៉ាញ ឈរជាមួយគ្នា»។
-លោក Justin Trudeau នាយករដ្ឋមន្ត្រីកាណាដា៖ កាណាដានឹងបន្តឈរជាមួយអ៊ុយក្រែន និងប្រជាជនអ៊ុយក្រែនក្នុងការសម្រេចបានសន្តិភាពដ៏ត្រឹមត្រូវ និងយូរអង្វែង»។
-លោក Anthony Albanese នាយករដ្ឋមន្ត្រីអូស្ត្រាលី៖ «អូស្ត្រាលីគាំទ្រដោយមោទនភាពចំពោះប្រជាជនអ៊ុយក្រែនដ៏ក្លាហានក្នុងការតស៊ូដើម្បីការពារអធិបតេយ្យភាពរបស់ពួកគេប្រឆាំងនឹងភាពព្រៃផ្សៃនៃការឈ្លានពានរបស់រុស្ស៊ី និងគាំទ្រដល់ច្បាប់អន្តរជាតិ»។
-លោកស្រី Maia Sandu ប្រធានាធិបតីម៉ុលដាវី៖ «ការពិតគឺសាមញ្ញ។ រុស្ស៊ីឈ្លានពានអ៊ុយក្រែន។ រុស្ស៊ីជាអ្នកឈ្លានពាន។ អ៊ុយក្រែនការពារសេរីភាពខ្លួន និងរបស់យើង។ យើងឈរជាមួយអ៊ុយក្រែន»។
-លោក Ulf Kristersson នាយករដ្ឋមន្ត្រីស៊ុយអែត៖ «ស៊ុយអែត ឈរជាមួយអ៊ុយក្រែន។ អ្នកមិនត្រឹមតែតស៊ូដើម្បីសេរីភាពរបស់អ្នកប៉ុណ្ណោះទេ ថែមទាំងសម្រាប់អឺរ៉ុបទាំងមូលផងដែរ។ Slava អ៊ុយក្រែន ឬ រុងរឿង អ៊ុយក្រែន!»។
-លោក Friedrich Mer អធិការបតីអាល្លឺម៉ង់៖ «សូមគោរពលោក វ្ល៉ូឌីមៀរ ហ្សេឡេនស្គី យើងឈរជាមួយអ៊ុយក្រែនក្នុងពេលវេលាល្អ និងបញ្ហាប្រឈម។ យើងមិនត្រូវច្រឡំអ្នកឈ្លានពាន និងជនរងគ្រោះក្នុងសង្គ្រាមដ៏អាក្រក់នេះឡើយ»។
-លោក Andrej Plenkovic នាយករដ្ឋមន្ត្រីក្រូអាត៖ «ក្រូអាតដឹងតាមបទពិសោធន៍របស់ខ្លួនថា មានតែសន្តិភាពទើបអាចស្ថិតស្ថេរបានយូរ។ រដ្ឋាភិបាលក្រូអាតប្រកាន់ជំហរយ៉ាងមុតមាំជឿជាក់របស់ខ្លួនថា អ៊ុយក្រែនត្រូវការសន្តិភាពបែបនេះ គឺជាសន្តិភាពដែលមានន័យថា អធិបតេយ្យភាព បូរណភាពទឹកដី និងសន្តិសុខអឺរ៉ុប»។
-លោក Petteri Orpo នាយករដ្ឋមន្ត្រីហ្វាំងឡង់៖ «ហ្វាំងឡង់ និងប្រជាជនហ្វាំងឡង់ឈរយ៉ាងរឹងមាំជាមួយអ៊ុយក្រែន។ យើងនឹងបន្តការគាំទ្រឥតងាករេ ហើយធ្វើការឆ្ពោះទៅរកសន្តិភាពដ៏ត្រឹមត្រូវ និងស្ថិតស្ថេរ»។
-លោក Kristen Michal នាយករដ្ឋមន្ត្រីអេស្តូនី៖ «យើងឈរជាមួយលោក វ្ល៉ូឌីមៀរ ហ្សេឡេនស្គី និងអ៊ុយក្រែនក្នុងការតស៊ូដើម្បីសេរីភាពរបស់យើង។ ជានិច្ច។ ព្រោះវាជារឿងដ៏ត្រឹមត្រូវ»។
-លោក Simon Harris ឧបនាយករដ្ឋមន្ត្រីអៀរឡង់៖ «អ៊ុយក្រែនមិនត្រូវស្តីបន្ទោសចំពោះសង្គ្រាមដែលកើតឡើងដោយការលុកលុយខុសច្បាប់របស់រុស្ស៊ីនោះទេ។ យើងឈរជាមួយអ៊ុយក្រែន»។
-លោក Edgars Rinkevics ប្រធានាធិបតីប្រទេសឡេតូនី៖ «អ៊ុយក្រែនគឺជាជនរងគ្រោះនៃការឈ្លានពានរបស់រុស្ស៊ី។ ពួកគេប្រយុទ្ធនឹងសង្គ្រាមដោយមានជំនួយពីមិត្តភ័ក្តិ និងដៃគូជាច្រើន។ យើងត្រូវធ្វើអ្វីៗគ្រប់យ៉ាងដែលអាចធ្វើទៅបានខិតខំដើម្បីសន្តិភាពដែលត្រឹមត្រូវ និងស្ថិតស្ថេរ។ ជួនកាលការទូតគឺជាសិល្បៈដែលមិនអាចទៅរួចក្នុងកាលៈទេសៈដ៏លំបាក។ ឡេតូនី ឈរជាមួយអ៊ុយក្រែន»។
-លោក Dick Schoof នាយករដ្ឋមន្ត្រីហូឡង់៖ «ហូឡង់គាំទ្រអ៊ុយក្រែន យ៉ាងម៉ឺងម៉ាត់ដូចសព្វដង។ ឥឡូវនេះច្រើនជាងពេលណាៗទាំងអស់។ យើងចង់បានសន្តិភាពយូរអង្វែង និងបញ្ចប់សង្គ្រាមឈ្លានពានចាប់ផ្តើមដោយរុស្ស៊ី។ សម្រាប់អ៊ុយក្រែន និងប្រជាជនរបស់ខ្លួន និងសម្រាប់អឺរ៉ុប»។
-លោក Luc Friedsen នាយករដ្ឋមន្ត្រីលុចសំបួ៖ «លុចសំបួរឈរជាមួយអ៊ុយក្រែន។ អ្នកកំពុងតស៊ូដើម្បីសេរីភាពរបស់អ្នក និងច្បាប់ផ្អែកលើសណ្តាប់ធ្នាប់អន្តរជាតិ»។
លោក Antonio Costa ប្រធានសហភាពអឺរ៉ុប និងលោកស្រី Ursula von der Leyen ប្រធានគណៈកម្មការអឺរ៉ុប បានធានាដល់លោក ហ្សេឡេនស្គី នៅក្នុងសេចក្តីថ្លែងការណ៍រួមថា «អ្នកមិនដែលនៅម្នាក់ឯងនោះទេ។ យើងនឹងបន្តធ្វើការជាមួយអ្នក ដើម្បីសន្តិភាពដ៏ត្រឹមត្រូវ និងយូរអង្វែង»។
ទោះជាយ៉ាងណាក៏ដោយ ផ្ទុយពីមិតភាគច្រើន លោក Viktor Orban នាយករដ្ឋមន្ត្រីហុងគ្រីឯណោះវិញ បានសម្តែងការគាំទ្រចំពោះលោក ត្រាំ ដោយសរសេរថា «បុរសខ្លាំងបង្កើតសន្តិភាព មនុស្សទន់ខ្សោយបង្កើតសង្គ្រាម។ ថ្ងៃនេះប្រធានាធិបតី ដូណាល់ ត្រាំ បានឈរយ៉ាងក្លាហានដើម្បីសន្តិភាព។ ទោះបីជាវាពិបាកសម្រាប់មនុស្សជាច្រើនក្នុងការរំលាយវាក៏ដោយ។ សូមអរគុណលោកប្រធានាធិបតី!»៕ ដកស្រង់ ៖ BBC
ចែករំលែកព័តមាននេះ