ទីក្រុងម៉ូស្គូ៖ មានហេតុការណ៍ផ្ទុះគ្រាប់បែកស្លាប់ឧត្ដមសេនីយ៍យោធារុស្ស៊ីម្នាក់នៅក្បែរទីក្រុងម៉ូស្គូកាលពីពេលថ្មីៗនេះមុនពេលមានកិច្ចជំនួបពិសេសរវាងលោកពូទីន និងលោកស្ទីវវីតខូស ប្រេសិតពិសេសរបស់លោកត្រាំ។ អាជ្ញាធររុស្ស៊ីកំណត់អត្តសញ្ញាណជនរងគ្រោះជាឧត្ដមសេនីយ៍យ៉ារូស្លាវ ម៉ូស្កាលីច (Yaroslav Moskalik) ជាមេបញ្ជាការរងនៃអគ្គសេនាធិការដ្ឋានកងទ័ពរុស្ស៊ី។
តាមមើលទៅ ករណីផ្ទុះគ្រាប់បែកដែលបង្កប់នៅក្នុងរថយន្តលើកនេះក៏មិនខុសពីករណីផ្ទុះដូចពេលមុនៗនោះទេ។ មិនយូរប៉ុន្មានអ៊ុយក្រែននឹងចេញមុខប្រកាសថាជាស្នាដៃរបស់ខ្លួន។ ករណីធ្វើឃាតនេះអាចជាស្រមោលខ្មៅតាមលងបន្លាចគម្រោងជួបគ្នារវាងលោកពូទីន និងលោកស្ទីវវីតខូស។ លោកត្រាំទើបតែផ្ដាំទៅលោកពូទីនហើយថ្មីៗថាគួរបញ្ឈប់ការវាយប្រហារទីក្រុងកៀវ។ ប៉ុន្តែបើផ្ទុះគ្រាប់បែកស្លាប់មេទ័ពប៉ុណ្ណាប៉ុណ្ណីបែបនេះតើលោកពូទីនសុខចិត្តស្ដាប់តាមសម្ដីរបស់ត្រាំដែរឬទេ?
គណៈកម្មការស៊ើបអង្កេតរុស្ស៊ីរកឃើញថាករណីនេះបង្កឡើងដោយគ្រឿងផ្ទុះដែលគេបង្កៃទុកចោល។ បណ្ដាញតេឡេក្រាមបាហ្សា (Baza) ដែលមានទំនាក់ទំនងជាមួយសមត្ថកិច្ចរុស្ស៊ីចុះផ្សាយថាគ្រាប់បែកត្រូវគេបង្កប់នៅក្នុងរថយន្តចតទុកស្ងៀមនៅទីក្រុងបាឡាស់ស៊ីកា (Balashikha)។ នៅពេលមន្ត្រីយោធាខាងលើនេះដែលរស់នៅម្ដុំនោះធ្វើដំណើរឆ្លងកាត់រថយន្ត គេក៏បញ្ជាពីចម្ងាយឱ្យផ្ទុះគ្រាប់បែកតែម្ដង។ តាមរយៈវីឌីអូឃ្លីប១ដែលគេបង្ហោះយ៉ាងគគ្រឹកគគ្រេងនៅលើបណ្ដាញសង្គមរុស្ស៊ី គេឃើញថាគ្រាប់បែកនោះផ្ទុះយ៉ាងកងរំពង។ រូបថតមួយចំនួនបង្ហាញរូបរថយន្តនោះឆេះយ៉ាងពេញទំហឹង។
រហូតមកដល់ពេលនេះ អ៊ុយក្រែនមិនទាន់ធ្វើអត្ថាធិប្បាយនៅឡើយទេ។ ករណីផ្ទុះគ្រាប់បែកលើកចុងក្រោយនេះ បើសិនជាស្នាដៃរបស់អ៊ុយក្រែនពិតមែនអាចនឹងមានបញ្ហាមិនស្រួល ហើយអាចនឹងផ្ទុយពីជំហររបស់ត្រាំ។ ត្រាំកំពុងរង់ចាំយ៉ាងអន្ទះសាចង់ឃើញដំណើរការចរចារីកចម្រើនទៅមុខមុនពេលខួប១០០ថ្ងៃនៃការឡើងកាន់អំណាចរបស់គាត់នៅអាទិត្យក្រោយ។
ទោះបីលោកពូទីនច្រានចោលសំណើបទឈប់បាញ់ម្ដងជាពីរដង និងបន្តវាយប្រហារអ៊ុយក្រែនដោយមីស៊ីល និងយន្តហោះដ្រូនជារៀងរាល់ថ្ងៃ ប៉ុន្តែត្រាំមិនហ៊ានដាក់ការស្ដីបន្ទោសទៅលើរុស្ស៊ីទេ។ លោកច្រើនរិះគន់លោកហ្សេឡិនស្គីថាជាអ្នកយកជើងរាទឹក។ ទើបតែយប់មិញប៉ុណ្ណោះដែលត្រាំរិះគន់ពូទីនថាមិនគួរវាយប្រហារទីក្រុងកៀវតទៅទៀតព្រោះគ្មានផលចំណេញសម្រាប់រុស្ស៊ី។
ចាប់តាំងពីសង្គ្រាមអ៊ុយក្រែនផ្ទុះឡើងកាលពីឆ្នាំ២០២២រហូតមកដល់ពេលនេះ មេបញ្ជាការកងទ័ពរុស្ស៊ីថ្នាក់វរសេនីយ៍ និងឧត្ដមសេនីយ៍ស្លាប់យ៉ាងរង្គាលក្រោមស្នាដៃរបស់អ៊ុយក្រែន។ មេទ័ពរុស្ស៊ីខ្លះស្លាប់ពេលបំពេញបេសកកម្មនៅលើសមរភូមិ និងខ្លះទៀតស្លាប់ដោយសារការផ្ទុះគ្រាប់បែកដែលបង្កប់នៅក្នុងរថយន្ត។ អ៊ុយក្រែនចោទប្រកាន់អ្នកទាំងនោះថាពួកឧក្រិដ្ឋជនសង្គ្រាម។ ខាងលើនេះជាការដកស្រង់ប្រភពពីកាសែតដឹហ្កាឌាន (The Guardian)៕
ចែករំលែកព័តមាននេះ