ខេត្តស្វាយរៀង ៖ សង្ស័យភ្លើងប្រចណ្ឌ បុរសជាប្តីយកកាំបិតអារកប្រពន្ធ បណ្តាលឱ្យស្លាប់ រួចរត់ទៅចងកសម្លាប់ខ្លួននៅលើដើមស្តៅ ។ ករណីខាងលើនេះបានកើតឡើងនៅវេលាម៉ោង ១០យប់ថ្ងៃទី២៤ មេសា…
ខេត្តស្វាយរៀង ៖ សង្ស័យភ្លើងប្រចណ្ឌ បុរសជាប្តីយកកាំបិតអារកប្រពន្ធ បណ្តាលឱ្យស្លាប់ រួចរត់ទៅចងកសម្លាប់ខ្លួននៅលើដើមស្តៅ ។
ករណីខាងលើនេះបានកើតឡើងនៅវេលាម៉ោង ១០យប់ថ្ងៃទី២៤ មេសា ឆ្នាំ២០២៥ នៅចំណុចក្នុងផ្ទះលក់ផ្លែឈើមួយកន្លែង យីហោ «ស្រីណាលក់ផ្លែឈើបោះដុំ និងលក់រាយ» ស្ថិតនៅភូមិធ្លក ឃុំក្រោលគោ ស្រុកស្វាយជ្រំ ខេត្តស្វាយរៀង ។
បើតាមសមត្ថកិច្ចបានឲ្យដឹងថា ស្ត្រីរងគ្រោះឈ្មោះស្រីណា អាយុ៤៥ឆ្នាំ មុខរបរលក់ផ្លែឈើ បោះដុំនិងលក់រាយ ដែលមានយីហោ (ស្រីណា) មានស្រុកកំណើតនៅខេត្តមណ្ឌលគីរី ។ ក្រោយមកក៏បានមករកស៊ីបើកហាងលក់ផ្លែឈើ នៅភូមិកើតហេតុខាងលើ ។
តាមប្រភពដដែលបានឱ្យដឹងបន្តថា តាមពិតស្ត្រីរងគ្រោះជាស្ត្រីមេម៉ាយ រស់នៅខេត្តមណ្ឌលគីរី ក្រោយមកបានទាក់ទងបុរសជាជនសង្ស័យខាងលើ យកគ្នាជាប្តីប្រពន្ធ (យកប្តីគេជាប្រពន្ធចុង)ហើយបុរសដៃដល់ជាប្តីបានហៅនាងឲ្យមកបើកហាងរកស៊ីលក់ផ្លែឈើនៅផ្ទះរបស់ខ្លួន ដោយបងស្រីស្ត្រីរងគ្រោះនៅខេត្តមណ្ឌលគីរីផ្ញើរផ្លែឈើពីខេត្តមណ្ឌលគីរីមកឲ្យលក់ដូរ។
តាមប្រភពដដែលបានបន្តឱ្យដឹងទៀតថា មួយរយៈចុងក្រោយនេះ បុរសជាប្តី មានភាពរកាំរកុះ ជាមួយស្ត្រីរងគ្រោះ និងមានការឈ្លោះប្រកែកគ្នា រឿងប្រចណ្ឌ មិននឹកស្មានថា ភ្លើងប្រចណ្ឌក្លាយជាគុំនុំ ហ៊ានយកកាំបិតអារកប្រពន្ធសម្លាប់យ៉ាងសាហាវបែបនេះទេ បណ្តាលឲ្យស្លាប់បាត់បង់ជីវិតនៅក្នុងថ្លុកឈាម រួចជនដៃដល់ជាប្តីរត់ទៅចង-កសម្លាប់ខ្លួនតាមក្រោយនៅលើដើមស្តៅ បណ្តាលឱ្យស្លាប់បាត់បង់ជីវិតដែរ។
លុះព្រឹកឡើងថ្ងៃទី២៥ មេសា ឆ្នាំ២០២៥ សមត្ថកិច្ចមកពិនិត្យធ្វើកោសល្យវិច្ច័យរួចបានប្រគល់សព២នាក់ប្តីប្រពន្ធនេះឲ្យសាច់ញាតយកទៅធ្វើបុណ្យតាមប្រពៃណី ៕
ចែករំលែកព័តមាននេះ